Çoxmərtəbəli binanın damına çıxaraq intihar etmək istəyən sakin Ruslan Məhərrəmovla danışıqlar nəticə verib. O, binanın damından düşürülüb.

Sakinlər bildiriblər ki, hadisə yerinə Yasamal Rayon İcra Hakimiyyətinin nümayəndələri gəliblər. “İcra nümayəndələri sakinlərin şikayətinin nəzərə alınacağını, ərazidə təkrar ekspertiza aparılacağını söylədilər. Bundan sonra Ruslan binanın damından düşüb”, sakinlər söyləyiblər.

Hazırda ərazi polis nəzarətindədir.

* * *16:15

Bakının Yasamal rayonunda, Zahid Xəlilov küçəsi, 30A, 36A, 36B, 36V, Əhməd Cəmil küçəsi, 23, 25, 27 və Şəhriyar küçəsi, 5 ünvanında yerləşən binaların həyətində çoxmərtəbəli bina tikintisinə etiraz edən sakinlərdən biri intihar etmək istəyir. Doqquzmərtəbəli binanın damına çıxan sakin özünü atacağını bildirib. Əraziyə polis əməkdaşları gəlib, onlar intihara cəhd edən vətəndaşı fikrindən çəkindirməyə çalışırlar.

gundemxeber.az virtualaz.org-a istinadla bildirir ki, bu barədə sakinlər məlumat veriblər. İntihara cəhd edən şəxsin kimliyi məlum deyil, ancaq qonşuları onun üç azyaşlı uşaq atası olduğunu deyirlər

Xatırladaq ki, virtualaz.org oktyabrın 25-də həmin ünvanda “Elit City MMC şirkəti tərəfindən tikintiyə hazırlıq məqsədi ilə həyətdəki ağacların kəsilməsi barədə sakinlərin şikayətini, foto və videokadrları yaymışdı.

Sakinlərin gözlərinə görə, 20 dəqiqədən artıqdır ki,polislər narazı sakinlə söhbət aparır. “Ötən həftədən bina tikintisinə başlanılıb, ərazidəki su quyusu dağıdılıb. Dəfələrlə etiraz etsək də, nəticəsi olmadı”, sakinlər deyiblər.

◀▶
Sakinlər ağ parçaya tikintiyə etiraz etdiklərini yazaraq binadan asıblar. Lakin bu gün tezdən polis əməkdaşları plakatların yığışdırılması üçün xəbərdarlıq ediblər. Plakatlar yığışdırılandan sonra isə sakin etirazını intihar etməklə bildirməyə çalışır. Hazırda ərazi nəzarətdədir və sakinlə danışıqlar aparılır.

Qeyd edək ki, 9 mərtəbəli binaların əhatəsində yeni bina tikiləcəyi halda həyətə nəinki avtomobillərin, hətta sakinlərin belə giriş-çıxışı çətinləşəcək.

Yasamal rayonun keçmiş icra başçısı İbrahim Mehdiyev vəzifəsindən azad olunmadan 10 gün əvvəl “Elite City” MMC tərəfindən göstərilən ünvanda-9 mərtəbəli yaşayış binalarının həyətində yeni çoxmərtəbəli bina tikintisinə icazə verilməsi üçün sərəncam imzalayıb. 1 saylı Bakı İnzibati İqtisad Məhkəməsi isə ərazidə yenidən ekspertiza aparılmasına qərar verib. Qərar icra olunmadan tikintiyə başlanılıb.

Binanın damına çıxaraq intihar etmək istəyən sakinin 30 yaşı var. O, hadisə yerinə baş nazirin müavini Abid Şərifovun gəlməsini tələb edir. Hələlik danışıqlar nəticə vermir.