Fiziki cəhətdən olduqca zəif olan Tofiq Məmmədovun bir neçə nəfər polis əməkdaşına müqavimət göstərməsi, heç də inandırıcı hal deyil

Bu günlərdə ildırım sürətilə yayılan, hər kəsin təəccüb və təşvişinə səbəb olacaq xəbərlərdən biri də, Astara rayonu Ərçivan kənd sakini Məmmədov Tofiq Oruc oğlunun, 09 oktyabr 2017-ci il tarixdə, səhər saat 9:00 radələrində həbs olunması olur. Belə ki, adı çəkilən şəxs sakini olduğu rayon ərazisində hər hansı iş-güc tapa bilmədiyindən, ailələrinin dolanması problemə çevrilməsi səbəbindən, xeyli müddət bundan əvvəl Bakı şəhərinə üz tutur və şəhərin İnşaatçılar Metrostansiyasının həndəvərində limon satmaqla, məhz ailələrinə qəpik-quruş da qazanır. Tofiq Məmmədovun bildirdiyinə görə, 09 oktyabr 2017-ci il tarixdə, səhər saat 9:00 radələrində ərzaq mağazasından bayıra çıxan zaman görür ki, Yasamal rayon Polis İdarəsi rəisinin sürücüsü Cavid adlı şəxs, mülki formada onun arabada olan limonlarını dağıdır. Atılan addımın səbəbini soruşduqda, dərhal rəisin sürücüsü post patrul xidmətinin əməkdaşlarına zəng edir. Çox keçmir ki, əraziyə bir neçə post patrul xidmətinin əməkdaşı gəlir və Tofiq Məmmədovu Yasamal rayon Polis İdarəsinin 29-cu polis bölməsinə aparırlar. Zərərçəkən şəxs onu da iddia iddia edir ki, polis bölməsində hər kəs ona “sən içəri atılmalısan” deyir. Diqqəti cəlb edən hal o olur ki, bir neçə saatdan sonra onu Yasamal rayon Məhkəməsinə apararaq “polisə müqavimət” adı altında 200 manat məbləğində cərimə də etdirirlər. Bu da olduqca hər kəsi düşündürən hal olur ki, fiziki cəhətdən olduqca zəif olan Tofiq Məmmədovun bir neçə nəfər polis əməkdaşına müqavimət göstərməsi, heç də inandırıcı hal deyil.

02 noyabr 2017-ci il tarixdə Bakı şəhər Apelliyasiya Məhkəməsində yaşanan olayla bağlı apellyasiya şikayətinə baxış keçirilsə də, çıxarılmış məhkəmə hökmü təkrar qüvvədə saxlanılır. Hələ bu azmış kimi Tofiq Məmmədov 18 oktyabr tarixdən 28 oktyabr tarixə kimi, atası isə 24 oktyabr tarixdən 03 noyabra kimi Astara rayon Polis Şöbəsində saxlanılır. Adı çəkilən şəxs onu da vurğulayır ki, mənə qarşı atılan addımların kökündə başqa-başqa motivlər durur. Çünki, bu ilin 20 sentyabrından mənə qarşı təzyiqlər, edilən naməlum zənglər durmadan artmağa başlayıb ki, bu da mənim bir vətəndaş olaraq təhdid edilməyim deməkdir.
Mövzu diqqətimizdədir.

Akif
gundemxeber.az