Bunun nəticəsidir ki, özlərinə yüksək tərzdə varidat yığıb, həyatda hər şeyə nail olublar

Tovuz Gömrük İdarəsində baş alıb-gedən rüşvətxorluq, korrupsiya və özbaşınalıq halları səngimək bilmir. Onun ana xətti hesab edilən “Sınıq Körpü” sərhəd keçid məntəqəsində əhaliyə edilən zülm isə heç cürə bağışlanılmazdır. Yaşından asılı olmayaraq insanlar təqib və təzyiqlərə məruz qalırlar. Gözgörəsi vətəndaşların şəxsiyyəti alçaldılır, yeri gələndə gömrük işçiləri tərəfindən qulaqları pis söyüşlər də eşidir. Görəsən, bu səlahiyyəti onlara kim verib?
Tovuz Gömrük İdarəsində bir neçə məntəqə öz əksini tapır: “Sınıq Körpü”, “Poylu”, “Böyük Kəsik”, “Sadaxlı” və “Candargöl” gömrük məntəqələri. Bunların hər birində özlərindən razı olan məntəqə rəisləri işləyirlər. Məsələn, dili daş deyəndən Poylu gömrük məntəqəsinin rəisi vəzifəsində işləyən Surxay Zeynalov demək olar ki, həmin məntəqəni özəlləşdirib. Xidməti işində ağlı kəsən kimi hərəkət edir. Süründürməçilk və vətəndaşların haqqını tapdamağı özünə peşə seçib.
“Böyük Kəsik” gömrük məntəqəsinin rəisi Tohid Məsimov da uzun illərdi ki, bu orqandadır. O da Surxay Zeynalov kimi məntəqəni özəlləşdirib. “Sadaxlı” və “Candarğöl”ün əvvəlki məntəqə rəisləri dəyişilsə də yenə məntəqədə keyfiyyət yoxdur. Nizam-intizam bərbad gündədir. Vətəndaşların həmin məntəqələrdən narazılığı da öz yerində...

Bəs belə bir gömrük işçilərini guya təcrübəli mütəxəssis adından bu qədər işlətmək kimə xeyir edir? Əlbəttə ki, onun havadarlarına. Çünki onlar qanunsuz şəkildə əhalidən pul çıxarmağın yolunu yaxşı bilirlər. Bunun nəticəsidir ki, özlərinə yüksək tərzdə varidat yığıb, həyatda hər şeyə nail olublar. Özlərindən başqa cəmiyyətə 1 qara qəpik belə xeyirləri yoxdur.
Tovuz Gömrük İdarəsinin özündə lövbər salmış şəxslərdən biri də, idarənin rəis müavini Elmuraz Hüseynovdur. Bu şəxs yalnız özünü düşünən, necə deyərlər “bildiyini babasına verən” deyil. Hələ Elmuraz Hüseynov vaxtı ilə “Sınıq Körpü” Gömrük Məntəqəsində növbə rəisi vəzifəsində işləyərkən, rüşvətxor və qeyri - leqal yollarla pul qazanan olub. Mənbənin “Gündəm Xəbər”ə dediyinə görə, əsli Gürcüstandan olan Hüseynovun mal-mülkiyyəti yoxlanılsa, ölkənin yarısını rahat dolandıra bilər. Bəli, belə halda hər şey aşkardırsa, niyə rüşvətxor və korrupsionerlər kənar yerlərdə axtarılır? Adları çəkilən həmin şəxslər, yəni o qədərmi tapılmazdılar ki, onları əvəzedəcək kadrlar yoxdur?
Aparılan araşdırmalar göstərir ki, yuxarıda adaları çəkilən gömrük işçiləri dəbdəbəli həyat sürülər. Hətta, onlardan bir neçəsi ölkəmizdəki istirahət mətkəzlərini bəyənməyib, xaricdə dincəlirlər. Xarici pasportlarına vurulan möhürlər deyilənləri sübuta yetirir.
Onu da demək yerinə düşər ki, Azərbaycanda hər bir sahəyə avropasayağı yanaşılıdığı halda hələ də gömrük “monopoliyası” və orada çalışan “ordu” inzibati-amirlik çərçivəsindən çıxa bilmirlər. Bunların başında isə rüşvət və korrupsiya halları durur. Tovuz Gömrük İdarəsinin tabeçiliyində olan məntəqədə çalışanlar daha dəhşət formada özlərini büruzə verirlər. Yerli və xarici vətəndaşlarla onların rəftarı hər şeyə son qoyur. Elə hallar olur ki, vətəndaşı rahatca heç nəyin üstündə vura da bilirlər. İmtiyazlarını bilməyən vətəndaşlar isə acizyana şəkildə qorxmağa üstünlük verirlər.
Xaricdən ölkəmizə gələn vətəndaşlarla rəftar isə həm ağlamalı, həm də gülməlidir. İstər-istəməz nəsə qoparmağa çalışır, bir şey əldə etməyəndə kobudcasına yola salınırlar. Onların gömrükdəcə millətimizə qarşı qəlbində etiraz yarnmağa başlayır. Halbuki, burada millətin heç bir günahı yoxdur. Vətənpərvərlik, qonaqsevərlik kimi atributları bu cür gömrük işçilərinin kobud rəftarına heç cürə qurban vermək olmaz.
Bəzən sərhəd keçid gömrük məntəqələrindən tez-tez keçib gedən dolanması üçün az miqdarda pampers, yuyucu toz, kolbasa, sosiska , meyvə və sairə kimi məhsullar gətirən vətəndaşlarla gömrük işçiləri arasında dava-dalaş da olur. Əlbəttə, vətəndaşlar da gömrük haqqında verilən qanunlara tabeçilk göstərməlidir. Bu öz yerində. Vətəndaşların isə dediyi budur ki, qanun qanundu. Bəs necə olur ki, gecə və gündüz gömrükdən rüsumsuz və ya cüzi rüsumla qiymətli mallar keçirən iri maşın sahiblərinə qanun şamil edilmir? Əslində isə düzgün fikirdi. Məsələ isə aydındır. Bir ildən artıq vaxtdır ki, “qara paket”ləri kəsilən gömrük işçiləri onun yerini doldurmaq üçün rüşvətxorluq və korrupsiyaya yol verməlidirlər, ya yox? Əslində onlar “qara paket” alanda da korrupsiya və rüşvətxorluqla məşğul olublar. Yenə də davam etdirirlər.
Azərbaycan gömrük orqanı və orada çalışanlar haqqında qəti tədbirin görülməsinin də vaxtı çoxdan keçib. Onu da qeyd edək ki, vergi və onun başında duran korrupsioner sabiq nazir Fazil Məmmədov haqqında tənqidi yazanda çoxlarının təqib və təzyiqlərinə məruz qaldıq. Həmişə də günahkar hesab edilirdik. Şükürlər olsun ki, bir neçə il bundan əvvəl vergi haqqında söylədiklərimiz bu yaxınlarda prezident sərəncamı ilə öz həllini tapdı. Əslində, bu proses, yəni Fazil Məmmədovun taxtdan salınması çoxdan olmalıydı.
Yəqin ki, qaldırdığımız məsələ də gec-tez öz həllini tapacaq. Biz isə redaksiya olaraq mövzunu gündəmdə saxlayacağıq.

Anar Baxış