İrandan narkotik gətirən şəbəkə üzvləri sərhəddə tutulmamaları ilə bağlı açıqlamalar verdilər İrandan Azərbaycana külli miqdarda narkotik vasitə gətirməkdə ittiham olunan Lənkəran rayon sakinləri - 1978-ci il təvəllüdlü Vüqar Məmmədov, 1975-ci il təvəllüdlü Tahir Qasımov, Biləsuvar rayon sakini, 1983-cü il təvəllüdlü Ziyad Əliyevin cinayət işi üzrə məhkəmə prosesi başa çatıb. İttihama görə, Vüqar Məmmədov, Tahir Qasımov və Ziyad Əliyev Azərbaycan Respublikasında və İran İslam Respublikası ərazisində olan şəxslərlə satış məqsədi ilə qanunsuz olaraq külli miqdarda narkotik vasitələri əldə etmə, qaçaqmalçılıq yolu ilə Azərbaycan Respublikasının ərazisinə keçirilmə, saxlanma və daşıma barədə qabaqcadan əlbir olub, bir qrup şəxs halında cinayət əlaqəsinə girib. Bu məqsədlə Vüqar Məmmədov 2016-cı il noyabr ayının ortalarında Ağstafa rayonunda mərkəzi bazarın yaxınlığında cinayətkar qrupun şəxsiyyəti istintaqla müəyyən edilməmiş digər üzvü ilə görüşərkən cinayətkar qrupun həmin üzvü ona külli miqdarda heroin narkotik vasitəsini sifariş edib. İlkin ödəniş kimi ona 2400 ABŞ dolları məbləğində pul verib.
Sərhəddən keçirilən narkotik
Vüqar Məmmədov almış olduğu sifarişin icrası ilə əlaqədar olaraq 29 dekabr 2016-cı il tarixdə İran İslam Respublikasına gedib, orada cinayətkar qrupun digər üzvləri ilə görüşərək onlara 10.000 manat pul müqabilində külli miqdarda heroin və qurudulmuş marixuana sifariş edib. O, həmin şəxslərə ilkin ödəniş kimi 4000 manat məbləğində pul verib. Vüqar Məmmədovun tapşırığı ilə Ziya Əliyev 2 yanvar 2017-ci il tarixdə, Tahir Qasımov isə yanvarın 4-də İran İslam Respublikasına gedib. Tahir Qasımov həmin ölkədə Vüqar Məmmədov və İranda olan həmin şəxslərlə görüşüb, narkotik vasitələrin qaçaqmalçılıq yolu ilə İran İslam Respublikasından Azərbaycan Respublikası ərazisinə keçirilməsi barədə ümumi razılığa gəliblər. Bu razılıqdan sonra Tahir Qasımov narkotik vasitələri İran İslam Respublikasından Azərbaycan Respublikasına keçirmək məqsədi ilə həmin ölkədə qalıb. Vüqar Məmmədov və Ziyad Əliyev yanvarın 5-də Azərbaycan Respublikasına qayıdaraq, Ziyad Əliyevin yaşadığı Biləsuvar rayonu Bağbanlar kəndindəki evində İrandan qaçaqmalçılıq yolu ilə narkotik vasitələri gətirməli olan Tahir Qasımovu qarşılamaq məqsədi ilə gözləyiblər. Tahir Qasımov yanvarın 9-da, saat 21-22 radələrində Azərbaycan Respublikasının mühafizə olunan dövlət sərhədini nəzarət-buraxılış məntəqələrindən kənarda, Biləsuvar rayonunun Səmədabad kəndi ərazisindən qanunsuz olaraq Azərbaycan Respublikasına keçib, 1386,02 qram heroini və 1697,86 qram qurudulmuş marixuananı qaçaqmalçılıq yolu ilə ölkəmizə gətirə bilib.
DTX narkotik alverçilərini necə həbs etdi?
Tahir Qasımov əvvəlcədən əldə edilmiş razılaşmaya əsasən onu həmin ərazidə qrupun digər üzvləri Ziyad Əliyev və Vüqar Məmmədov qarşılayıb. Onlar qrup şəxs halında satış məqsədi ilə qanunsuz olaraq əldə etdikləri həmin külli miqdarda narkotik vasitələri Vüqar Məmmədovun idarə etdiyi “VAZ 21013” markalı avtomobillə daşıyaraq, Ziyad Əliyevin yaşadığı Biləsuvar rayonunun Bağbanlar kəndindəki evinə gətiriblər. Bundan başqa Ziyad Əliyev istintaqa məlum olmayan vaxtda və mənbədən odlu silah hesab edilən 9 mm kalibrli, “BV 3112 M” nömrəli “Makarov” (“PM”) konstruksiyalı tapançanı, onun komplekt hissəsi olan 1 ədəd sandıqçanı və döyüş sursatı hesab edilən 9X18 mm kalibrli 8 ədəd patronu qanunsuz olaraq əldə edib. Dövlət Təhlükəsizliyi Xidmətinin əməkdaşları tərəfindən keçirilmiş əməliyyat-axtarış tədbirləri nəticəsində Vüqar Məmmədov, Tahir Qasımov və Ziyad Əliyev yanvarın 10-da Ziyad Əliyevin yaşadığı Biləsuvar rayonunun Bağbanlar kəndindəki evində saxlanılıblar. Həmin evə keçirilmiş baxış zamanı qaçaqmalçılıq yolu ilə Azərbaycan Respublikası ərazisinə keçirilmiş külli miqdarda narkotik vasitələr, habelə Ziyad Əliyevin qanunsuz olaraq əldə etdiyi silah-sursat aşkar edilərək götürülüb.
Cinayət işi
Təqsirləndirilən şəxslər Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən qaçaqmalçılıq törətmək), 234.4.1-ci (qabaqcadan əlbir olan bir qrup şəxs tərəfindən və ya mütəşəkkil dəstə tərəfindən narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma), 234.4.3-cü (külli miqdarda narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) və 318.1-ci (Azərbaycan Respublikasının mühafizə olunan dövlət sərhədini müəyyən edilmiş sənədlər olmadan və ya dövlət sərhədinin nəzarət-buraxılış məntəqələrindən kənarda keçmə) maddələri ilə ittiham eiliblər. Onların barəsində olan cinayət işi baxılması üçün Lənkəran Ağır Cinayətlər Məhkəməsinə göndərilib. Cinayət işi hakim Xamməd Nuriyevin sədrlik etdiyi kollegiyada araşdırılıb.
“Heroin verəcəyini vəd etdi”
Təqsirləndirilən şəxs qismində ifadə verən Ziyad Əliyev bildirib ki, narkotik vasitələrdən asılılığı var: “Təxminən 2015-ci ilin əvvəllərində müayinə və müalicə olunmaq üçün İran İslam Respublikasında olarkən Behnam adlı şəxslə tanış olmuşam. Yanvarın 1-də, axşam saat 19 radələrində Biləsuvar rayonunda olan zaman Behnam adlı şəxs mənə zəng edərək İran İslam Respublikasına gəlməyimi dedi. Ertəsi gün, saat 13 radələrində taksi ilə İran İslam Respublikasının Biləsuvar yaşayış məntəqəsində Behnam adlı şəxsin qayınatasının yaşadığı ünvana getsim. Behnamla görüş zamanı sonuncu, Vüqar Məmmədovun İran İslam Respublikasından Azərbaycan ərazisinə qaçaqmalçılıq yolu ilə qanunsuz olaraq narkotik vasitələr keçirtmək istədiyini bildirdi, Vüqar Məmmədovun İran-Azərbaycan sərhədindəki yollara yaxşı bələd olmadığı üçün həmin şəxsə bələdçilik etməsini mənə təklif etdi. Görəcəyim bu işə görə mənə 100 qram narkotik vasitə heroin verəcəyini vəd etdi. Narkotik vasitə istifadəçisi olduğum üçün bu təkliflə razılaşdım”.
“Sərhəddən keçirməyə köməklik edəcəkdim”
Ziyad Əliyev bildirib ki, yanvarın 4-də, saat 15-16 radələrində Behnamın yaşadığı evdə Vüqar Məmmədov və Tahir Qasımovla görüşüb: “Bu görüş zamanı olan söhbətdən mənə məlum oldu ki, Vüqar Məmmədov Behnam adlı şəxsə Azərbaycana qaçaqmalçılıq yolu ilə keçirdərək satmaq üçün təxminən 1,5 kiloqram kakos adlanan narkotik vasitə olan heroin sifariş edib. Bu narkotik vasitəyə görə ödəniləcək puldan bir hissəsini Behmana verəcəyini vəd edib. Aramızda əldə olunmuş razılaşmaya əsasən, Azərbaycan Respublikasının Biləsuvar rayonunun İranla sərhəd kəndində yaşadığım üçün bu ərazilərə yaxşı bələd olduğuma görə zəhmət haqqı kimi ona veriləcək 100 qram heroinin müqabilində külli miqdarda narkotik vasitələri qaçaq yolla Azərbaycan Respublikası ərazisinə keçirtməyə köməklik edəcəkdim. Tahir Qasımovu həmin sərhəd ərazilərində qarşılamalı və evimə aparmalı idim. Yanvarın 5-də Vüqar Məmmədovıa birlikdə Azərbaycana geri qayıtdıq. Tahir Qasımov isə narkotik vasitələri Azərbaycana qaçaq yolla keçirmək üçün İran İslam Respublikasında qaldı”. “Vəhşi heyvanların olması ehtimalını nəzərə aldım” Təqsirləndirilən şəxsin sözlərinə görə, Behnam adlı şəxslə Vüqar Məmmədovun danışıqlarında iştirak edib: “Mənə məlum oldu ki, Behnam adlı şəxs Vüqar Məmmədova narkotik vasitə olan heroinlə yanaşı satış məqsədi ilə təxminən eyni çəkidə marixuana da təklif edib. Sonuncu da bu təklifi qəbul edərək, Behmana narkotik vasitə olan marixuana sifariş edib. Sifariş olunan həmin marixuanadan 500 qramı isə zəhmət haqqı kimi Tahir Qasımova çatmalı olsa da, mənə həmin narkotik vasitədən heç nə verilməyəcəkdir. Yanvarın 9-da, axşam saat 8-9 radələrində Behnam mənə zəng edərək, Tahir Qasımovu artıq narkotik vasitələrlə birlikdə İrandan Azərbaycan Respublikasına yola saldığını bildirdi. Bundan sonra Tahir Qasımovla telefonla danışaraq harada olduğunu və nə vaxt çatacağını dəqiqləşdirdim. Həmin günü axşam saat 10 radələrində Vüqar Məmmədovla görüşərək, Tahir Qasımova məxsus “VAZ” markalı, Az 44-BD-547 dövlət qeydiyyat nişanlı avtomobil ilə onu qarşılamaq üçün Azərbaycanın İranla sərhəd ərazisinə getdik. Tahir Qasımovu qarşılamağa gedərkən həmin ərazinin düzənlik ərazi olması və vəhşi heyvanların olması ehtimalını nəzərə alaraq, həmin heyvanlardan qorunmaq məqsədi ilə özümə məxsus “Makarov” tipli tapançasını 1 ədəd sandıqçası və 8 ədəd patronu ilə birlikdə üzərimdə götürdüm. Lakin bu barədə Vüqar Məmmədova bildirmədim”. Təqsirləndirilən şəxs qeyd edib ki, Vüqar Məmmədovla birlikdə Biləsuvar rayonunun İranla sərhəd kəndi olan Səmədabad kəndi ərazisində Tahir Qasımovu qarşılayaraq, gecə saat 24 radələrində onun Biləsuvar rayonu Bağbanlar kəndindəki evinə getirib: “Evdə Tahir Qasımovun İran İslam Respublikasından qaçaqmalçılıq yolu ilə gətirdiyi idman çantasını açdıq. İçərisində olan narkotik vasitələr - heroin və marixuanaya nəzər saldıq”.
“Narkotik və silahı DTX əməkdaşlarına təqdim etdim”
Ziyad Əliyev bildirib ki, yanvarın 9-dan 10-na keçən gecə saat təxminən 04 radələrində o, həyətin darvazasının səsini eşidib və pəncərədən baxanda bir neçə nəfər həyətə daxil olduğunu görüb: “Masanın altında saxladığım “Makarov” tipli tapançanı və narkotik bükülüləri cəld şəkildə çantaya doldurdum və arxa otağa apardım. Daha sonra həyətə girən şəxslər evə daxil olaraq, özlərini Dövlət Təhlükəsizliyi Xidmətinin əməkdaşları kimi təqdim etdilər. Onlar evə baxış keçirmək istədiklərini bildirdilər və bu barədə məhkəmə qərarını bizə elan etdilər. Baxış keçirilməsinə etiraz etmədim. Hal şahidlərinin iştirakı ilə keçirilən baxış zamanı yaşadığım mənzilin yataq otağında gizlətdiyim, içərisində külli miqdarda narkotik vasitələr olan çantanı DTX əməkdaşlarına təqdim etdim. Həmin çantanın içərisindən təxminən 1 kiloqram yarıma yaxın çəkidə heroin və 1 kiloqram yarımdan bir qədər artıq çəkidə isə marixuana, sonradan həmin çantaya atdığım 1 ədəd “Makarov” tipli tapança, tapançanın 1 ədəd sandıqçası və 8 ədəd patronu DTX əməkdaşları tərəfindən aşkar edilərək qablaşdırıldı. Bu barədə protokol tərtib edilərək götürüldü”. DTX-nin tutduğu narkotik alverçilərinə cəza Lənkəran Ağır Cinayətlər Məhkəməsinin hökmü ilə Vüqar Məmmədov 13 il, Tahir Qasımov 12 il, Ziyad Əliyev 11 il müddətinə azadlıqdan məhrum edilib. Hökmdən narazı qalan təqasirləndirilən şəxslər apelyasiya şikayəti veriblər. Onlar barələrində olan hökmün ləğv edilməsini, ədalətli hökm qəbul edilməsini xahiş ediblər. Təqsirləndirilən şəxslərin şikayətləri araşdırılması üçün Şirvan Apelyasiya Məhkəməsinə göndərilib. Şikayət hakim Ələsgər Novruzovun sədrlik etdiyi kollegiyada araşdırılıb. Ziyad Əliyevin müdafiəçisi apelyasiya şikayətində qeyd edib ki, Lənkəran Ağır Cinayətlər Məhkəməsi işin həqiqi hallarını ətraflı araşdırmayıb. Nəticədə məhkum edilmiş şəxs barəsində ədalətsiz, qeyri obyektiv ağır və sərt cəza verilməsinə dair hökm çıxarılıb. Bu səbəbdən də Ziyad Əliyevin əməli düzgün tövsif edilməyib. Ona təyin edilmiş cəza törədilmiş cinayətin ağırlığına, həm də məhkumun şəxsiyyətinə uyğun deyil. Ziyad Əliyev üç uşaq atasıdır, ilk dəfə məhkum olunmayıb, yaşlı ata, anası onun himayəsindədir, həyat yoldaşı heç bir yerdə işləmir və ağır Hepatit C xəstəliyindən əziyyət çəkir”. Vəkilin qeydinə görə, Ziyad Əliyev Cinayət Məcəlləsinin 228.1-ci (qanunsuz olaraq odlu silah, onun komplekt hissələrini, döyüş sursatı (yivsiz odlu ov silahı və həmin silah üçün döyüş sursatı istisna olmaqla), partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) maddəsi ilə də törətdiyiəməlini etiraf edib: “Göstərilənlərə əsasən Lənkəran Ağır Cinayətlər Məhkəməsinin 17 avqust 2017-ci il tarixli hökmünün dəyişdirilməsi üçün əsasların olduğunu nəzərə alaraq cəzanın aşağı endirilməsi barədə qərar qəbul edilməsini xahiş edirəm”. Digər təqsirləndirilən şəxslər də apelyasiya şikayətlərini müdafiə ediblər. Onlar barələrində yüngül cəzaların təyin edilməsini xahiş ediblər. Dövlət ittihamçısı Zəfər ramazanov isə çıxış edərək, təqsirləndirilən şəxslərin apelyasiya şikayətlərinin dəlillərini əsassız hesab edib. O, apelyasiya şikayətlərinin təmin edilməməsini istəyib. Sonda qərar elan edən hakim heyəti Lənkəran Ağır Cinayətlər Məhkəməsinin hökmündə dəyişiklik edib. Məhkəmə Ziyad Əliyevin cəzasını 10 il 6 aya endirilməsi barədə qərar qəbul edib. Digər təqsirləndirilən şəxslərin şikayəti təmin edilməyib.
Sorğu
Yay istirahətini harada keçirmək niyyətindəsiniz?