Azər Allahverdiyev: “Ölkə üzrə yeni iş yerlərinin açıldığı bir vaxtda, Texnologiya Universitetində çoxsaylı əməkdaşlar işdən çıxarılırlar”

Bu günlərdə “Gündəm Xəbər”in redaksiyasına Texnologiya Universitetinin əməkdaşı Azər Allahverdiyev tərəfindən müraciət daxil olub. Adı çəkilən şəxs ünvanladığı müraciətində rektor Akif Süleymanovun qanunsuzluğa söykənən əməllərindən, heç bir əsas olmadan daşıdığı vəzifəsindən uzaqlaşdırılmasından, səriştəsiz kadr təyinatlarının həyata keçirilməsindən, Universitet rəhbərinin övladının bu təhsil ocağında “at oynatmasından” və s. kimi olayların varlığından bəhs edir. O, üz-üzə qaldığı qanunsuzluqların varlığını media vasitəsilə ölkə rəhbəri cənab İlham Əliyevə və digər dövlət qurumlarının rəhbərlərinə çatdırmaq niyyətini ortaya qoymaqla bərabər, həm də onların ictimailəşdirilməsini də xahiş edir. Odur ki, Azər Allahverdiyev tərəfindən ünvanlanan müraciətin mahiyyətini çoxsaylı oxucuların diqqətinə olduğu kimi çatdırmağı, məhz özümüz üçün borc bildik. Müraciət müəllifi yazır ki, “Sizə müraciətimi ünvanlamağıma əsas səbəb, Texnologiya Universitetinə rəhbərlik edən Akif Süleymanovun qol qoyduğu əməllərlə bağlıdır. Belə ki, 2013-cü ildən adı çəkilən təhsil ocağına rəhbərlik edən Akif Süleymanovun yarıtmaz idarəçiliyi ucbatından, bu təhsil müəssisəsində baş verən qanunsuzluqlar bitib tükənmək bilmir. Hələ bir müddət bundan öncə Universitetdə Maliyyə Nazirliyi tərəfindən aparılan yoxlamalar nəticəsində 1,3 milyon manat məbləğində mənimsəmə faktı aşkarlanmış, sonda Baş Prokurorluq Yanında Korrupsiyaya Qarşı Mübarizə Baş İdarəsi tərəfindən istintaq araşdırmaları aparılmış, az sonra isə toplanmış sənədlər Gəncə Ağır Cinayətlər Məhkəməsinə göndərilmişdir. Bu işlə bağlı yüzlərlə şahid məhkəməyə də dəvət olunmuşdu. Rektor Akif Süleymanovun əvvəlki və indiki maliyyə pozuntularında birbaşa əli olduğundan, rəhbərlik etdiyi kollektivdə bu gün onun heç bir nüfuzu, hər hansı hörməti qalmayıb. O, Universitetə rəhbərlik etmək üçün gərəkli olan mənəvi haqqını da çoxdan itirib. İnanıram ki, bundan sonra Azərbaycan Respublikasının qanunları Akif Süleymanovun qol qoyduğu çoxsaylı qanunsuzluqlara son qoymağa imkan verəcək. Bu şəxsin qanunsuzluğa söykənən əməlləri ilə bağlı bir çox instansiyalara, o cümlədən Prezident Administrasiyasına, Nazirlər Kabinetinə, Milli Məclisə, Baş Prokurorluğa, Dövlət Təhlükəsizlik Xidmətinə, Təhsil Nazirliyinə davamlı rəsmi müraciətlər etmişik. Təəssüf hissi ilə qeyd edim ki, müraciətlərimizə hər zaman pərdəarxası yanaşıblar və şikayətlərimizi araşdırılması üçün Təhsil Nazirliyinə yönəltsələr də, adı çəkilən nazirlikdə şikayətlərimizi heç zaman lazımınca araşdırmayıblar.
Dövlət qurumlarına Universitet əməkdaşları aldadıcı cavablar verirlər və belə bir addımları ilə onlar açıq-aşkar şəkildə Akif Süleymanovun çirkin əməllərinə don geyindirirlər. Elmdən və təhsildən uzaq olan şəxslərin universiteti bərbad vəziyyətə salacaqları əvvəlcədən məlum idi. Çünki, Akif Süleymanovun özü elm və təhsilə ləkə olan vəzifə sahibidir və bunu Təhsil Nazirliyinin əməkdaşları da bilirlər. 05 dekabr 2017-ci ildə Təhsil Nazirliyində oldum və Nazirlik əməkdaşlarına rektorun çirkin əməllərindən, özbaşınalığından, üzümə iki qız qoymaqla mənə şər-böhtan atdırmasından şikayət etdim. Buna baxmayaraq, onunla bağlı heç bir ciddi tədbir görmədilər. Görünür rektor Akif Süleymanov hansısa yüksək çinli vəzifə sahibinə bağlı şəxsdir ki, barəsində lazımi tədbirlər görülmür. Bu şəxsin çirkin əməllərinin qarşısını almaqda sanki dövlət qurumları çətinlik çəkir, yaxud da onunla heç cür bacara bilmirlər. İndiyə kimi Akif Süleymanovun özbaşınalığı haqda bir çox media qurumlarında silsilə tənqidi açıqlamalar da dərc olunub. Bu gün isə qeyd olunur ki, Texnologiya Universitetində əməkdaşlar Prezident seçkisi öncəsi məqsədli şəkildə narazı salınırlar. Ölkə üzrə yeni iş yerlərinin açıldığı bir vaxtda, Texnologiya Universitetində rektorun tapşırığı ilə çoxsaylı əməkdaşlar işdən çıxarılırlar. Bir müddət bundan əvvələ 30 nəfərə yaxın professor, dosent, müəllim, 100 dən çox texniki işci çalışdıqları işlərindən uzaqlaşdırıldılar.
Cənab Prezident! Siz bir çox tədbirlərdə etdiyiniz çıxşlar zamanı məmurlara, vəzifə sahibi olan şəxslərə xəbərdarlığınızı çatdırmısınız, lazımi tapşırıqlarınızı vermisiniz. Bütün bunlara baxmayaraq Texnologiya Universitetinin rektoru Akif Süleymanovun oğlu Şamil Süleymanov, atasının rektoru olduğu bu təhsil ocağından sanki “dədə malı” kimi istifadə edir və bunu əksər dövlət qurumları ilə bərabər Təhsil Nazirliyi də bilir. Buna misal olaraq 30 yanvar 2018-ci ildə Təhsil Nazirliyinin üç əməkdaşı Aydın Rəhimov, hüquqşünas Rasim və Nicat adlı şəxslər, Texnologiya Universitetinin dosentləri Həsən Musayevin və Məsim Abadovun, baş müəllim Alim Əliyevin, müəllimələr Məhəbbət Kərimovanın, Afət Məmmədovanın və mənim, həmçinin digər şikayətçi əməkdaşların yazmış olduqları şikayətləri araşdırmaq üçün, bu təhsil ocağına ezam olunsalar da, Nazirlikdən gələnlər şikayətlərimizi pərdəarxası araşdırdılar, əsl həqiqətləri üzə çıxarmağa çalışmadılar. Ulu Öndər Heydər Əliyevin birbaşa diqqət və qayğısı ilə yaradılan Azərbaycan Texnologiya Universiteti, bu gün Akif Süleymanovun yarıtmaz idarəçiliyi ucbatından, hal-hazırda bir çox göstəricilərinə görə digər təhsil ocaqlarından olduqca geridə qalır. Bu təhsil ocağında çalışmış və işindən kənarlaşdırılan əməkdaşların hər birinin öhdəsində 4-5 nəfər ailə üzvünün olduğunu nəzərə alsaq, yüzlərlə insanın maddi durumunun dözülməz həddə çatdığını isbat etmək heç də çətin deyil. Onu da bildirim ki, işdən çıxarılan əməkdaşların tam əksəriyyəti Yeni Azərbaycan Partiyasının üzvləridirlər.
Bu da danılmaz bir həqiqətdir ki, Siz ölkə rəhbəri olaraq bütün gənclərə öz övladınız kimi diqqət və qayğı göstərirsiz. Bu gün 29 yaşım var və atam dünyasını dəyişdiyindən ailəmiz mənim öhdəmdə qalıb. 30 oktyabr 2017-ci ildə rektor Akif Süleymanov mənim üzümə iki qız qoyaraq işimdən kənarlaşdırdı. Bunlardan biri Universitetinin “Qiyabi və Distant Təhsil Mərkəzinin” mütəxəssisi Zamiqə Yuris qızı Xəlilova, digəri isə II kurs tələbəsi Cəmilə Əsgərzadə idi. Bu cür qanunsuzluqlarla bağlı məhkəməyə iddia ərizəsi ilə müraciət etdim. 25 dekabr 2017-ci ildə Kəpəz rayon Məhkəməsi tərəfindən bəraət aldım və mənimlə bağlı verilən əmrlər məhkəmənin qərarı ilə ləğv olundu. Həmçinin bir ay ərzində çıxarılmış məhkəmə qətnaməsinin icra olunması və işə qaytarılmağımla bağlı qərar da çıxarıldı.
Bəraət aldığm məhkəmə qətnaməsinin surətini təqdim edirəm:
Akif Süleymanov Universitetin istənilən əməkdaşını hansı yolla olursa-olsun işindən kənarlaşdırmaq fikirinə düşübsə, deməli o, insanlığa və rəhbər şəxslərə yaraşmayan üsullara əl atır. Şəratma kompaniyası zamanı o, Universitetin tələbə qızlarından və xanım əməkdaşlardan məharətlə istifadə edir. Üzümə qoyulan qızlardan biri, hansı ki, “Qiyabi və Distant Təhsil Mərkəzinin” mütəxəssisi olan Zamiqə Xəlilovanın atası Yuris Xəlilov, Gəncə şəhərindəki 34 saylı orta məktəbin direktorudur. Akif Süleymanovun siyasi xəyanətindən saxtakarlığınadək olan əməlləri haqda, bu gün əksər dövlət qurumlarında vəzifə sahibi olan şəxslər də məlumatlıdırlar. Bu şəxsin yarıtmaz idarəçiliyinin hansı səviyyədə olduğunu müəyyən etmək, heç də çətin deyil. Ölkəmizin ikinci böyük şəhərində fəaliyyət göstərən Texnologiya Universitetində təkcə korrupsiya və rüşvətxorluq deyil, eyni zamanda siyasi xəyanət hesab oluna biləcək məqamlara da rast gəlmək mümkündür. Akif Süleymanov və Gəncə 34 saylı orta məktəbin direktoru Yuris Xəlilov rəhbərlik etdikləri təhsil ocaqlarında çirkin addımlarını atmaqla, açıq-aşkar şəkildə gələcəyimiz hesab olunan gənclərin adlarına ləkə gətirməkdədirlər. Məqsədim heç də kimisə təhqir etmək, kiminsə şərəf və ləyaqətinə toxunmaq, kiminsə haqqını tapdamaq deyil. Müraciətimin məqsədi Akif Süleymanovun və Yuris Xəlilovun səriştəsiz, bacarıqsız hərəkətlərini qınamaq, etdikləri xəyanətləri hər kəsin diqqətinə çatdırmaq, onların övladlarının özbaşınalğının qarşısını almaqan ibarətdir. 05 dekabr 2018-ci ildə Təhsil Nazirliyində olarkən sadaladıqlarımı nazirlik əməkdaşlarının diqqətinə çatdırsam da, təəssüflər olsun ki, onlar danışdıqlarıma məhəl qoymadılar. Mən gənc yazıçıyam, bir çox əsərlərin müəllifiyəm. Heç çür o halı qəbul edə bilmirəm ki, işdən azad olunmağım hansısa xanıma qarşı pis münasibətimdən irəli gələn səbəb olsun. Mən Akif Süleymanovun vəzifə səlahiyyətlərini aşması ilə bağlı, hətta Baş Prokur cənab Zakir Qaralova ərizə ilə müraciət etmişəm. İstərdim ki, onun əməlləri ilə bağlı cinayət işi açılsın və adı çəkilən şəxs qanun qarşısında da cavab versin.
Qarşı tərəfin də mövqeyini dinləyə bilərik.

Aslan