İndiyə kimi redaksiyamıza Badamdar bələdiyyəsinin əhatə etdiyi ərazi hüdudlarında yaşayan bəzi sakinlər tərəfindən, bələdiyyə sədrinin və adı çəkilən qurumda vəzifə sahibi olan ayrı-ayrı şəxslərin qol qoyduqları çoxsaylı qanunsuzluqlarla bağlı silsilə müraciətlər daxil olub ki, biz həmin müraciətlərdə sadalanan problemləri zaman-zaman ictimailəşdirmişik. Təəssüflər olsun ki, tərəfimizdən bu yöndə lazımi addımları atsaq da, bu gün də Badamdar bələdiyyəsi ərazisində çoxsaylı problemlərin yaşanması haqda məlumatlara malikik.

Bir-iki gün bundan öncə isə, “Gündəm Xəbər”in redaksiyasına belə bir məlumat daxil olmuşdu ki, 8 noyabr 2018-ci il tarixdə saat 16:00-da Səbail rayon İcra Hakimiyyətinin başçısı cənab Vüqar Zeynalovla, Batamdar bələdiyyəsi sədrinin və şura üzvlərinin iştirakı ilə, qəsəbənin 3-cü yaşayış massivindəki 329 saylı orta məktəbdə geniş görüş keçiriləcək. Söylənilənlərə görə, Batamdar bələdiyyəsinin sədri Həbib Əsədov, həmin görüşə ciddi hazırlıq işləri görüb. Yəni, belə bir məlumat daxil olmuşdu ki, bələdiyyə sədri keçiriləcək görüşdə çıxış etmək üçün, bir neçə nəfər şəxsi xüsusi hazırlayıb ki, həmin şəxslər də, görüş zamanı “odlu-alovlu” çıxış edəcəklər və Həbib Əsədovun “əvəzolunmaz sədr” olacağını, hər kəsin diqqətinə də çatdıracaqlar. Bələdiyyə sədrinin əvvəlcədən düzüb-qoşduğu belə bir planların varlığına baxmayaraq, inanırıq ki, cənab Vüqar Zeynalov bu günə kimi əldə etdiyi idarəçilik təcrübəsindən lazımınca istifadə edib, “ağı-qaradan seçməyi” bacaracaq və yerli sakinlərin haqlı narazılıqlarını nəzərə alacaq.

Onu da bildirək ki, Badamdar bələdiyyəsi ərazisində qol qoyulan çoxsaylı qanunsuzluqlarla bağlı 5.11.2018-ci il tarixdə gundemxeber.az saytında “Bələdiyyə sədri icra başçısının “sınaq imtahanı”ndan keçə biləcəkmi?” başlıqlı tənqidi açıqlama dərc etmişik. Məqaləni oxumaq üçün hər kəs aşağıdakı linkə daxil ola bilər.