Fariz Quliyev: "Mənim günahım YAP-çı, Naxçıvanlı olmağımdır, yoxsa Sizə olan rəhbər sevgim?”

Cənab Prezident!
Çox uzun-uzadı yazaraq, Sizin qızıl kimi dəyərli vaxtınızı almaq istəmirəm. Ona görə də fikirlərimi qısa yazmağa çalışacağam.
Mən, "Araz Media" adlı ictimai-siyasi qəzetin, eyni adlı xəbər portalının (arazmedia.az) Baş redaktoru və YAP-ın ən sadiq üzvlərindənəm. Rəhbərlik etdiyim qəzet və saytın bir şüarı var: “Dövlətçiliyə Sadiq Olaq!”.
Himayəmdə yaşlı təqaüdçü müəllimə anam və Birinci qrup Qarabağ əlili qardaşım var. Ailə üzvlərimizin hamısı YAP-ın üzvləridirlər. Ailəlikcə Sizə, dövlətə və dövlətçiliyə daim sədaqətlə xidmət etmişik. Lakin müəyyən məmurlar var ki, ailəmizi Sizdən narazı, incik salmağa çalışırlar. Kirayədə yaşadığımız darısqal, cansıxıcı bir otaqlı "ev”dən genişliyə çıxmaq istəyimiz bizə çox baha başa gəldi.
Belə ki, min-bir əziyyətlə illərdir əldə etdiyimiz 7.330 manat pulu, bir neçə adamla sövdələşərək onlara verdik ki, onlar bizə Abşeron rayonunun Qobu kəndi ərazisində bir neçə sot torpaq satsınlar. Həmin adamların dələduz olduqlarını dörd-beş ay sonra, ortaya sənəd çıxara bilməyəndə başa düşdük. Həmin adamlardan torpağımıza sənəd istəyəndə "sənəd yoxdur" dedilər və daha sonra ortaya çıxdı ki, bizdən pulu alıb aldadanlar məşhur dələduzlar imiş. Məlum oldu ki, hətta onlardan birinin Poladov Ərəstun Məbud oğlunun barəsində eyni əməllər törətdiyinə görə, bir neçə istintaq orqanlarında cinayət işi var imiş. Çoxsaylı şikayətlərimdən, haqlı tələblərimdən sonra həmin adamlara Yasamal Rayon Polis İdarəsinin İstintaq şöbəsi Cinayət Məcəlləsinin 178.2-ci (dələduzluq) maddəsi ilə fakt üzrə cinayət işi başladı. Amma başladı, nə başladı... Elə mənim də, xəstə anamın da, əlil qardaşımın da qara günləri bundan sonra başladı. İllərdir axtarışda olan adamı sanki öz əlləri ilə qoyubmuş kimi, bir neçə saat ərzində guya "tutub" gətirdilər. 178.2-ci maddə ilə cinayət işi başladılar, heç bir yüngülləşdirici hal olmadan dələduzu dərhal da azad etdilər. İstintaq orqanı çox gülünc bir cinayət işinə başladı. Çünki bu gün dələduz Ərəstun Poladov və onun şəriki Əliyoldaşov Məmmədhəşim çöldə sərbəst gəzirlər, bəlkə də hər gün mənim kimi digər vətəndaşları da aldadırlar. Əminliklə deyirəm ki, həmin dələduzların sərbəst gəzməsinə səbəbkar Yasamal Rayon Polis İdarəsinin İstintaq şöbəsinin rəisi Şahin Quliyevdir. Təqsirləndirilən şəxs qismində tanınan, haqqında cinayət işi açılan həmin dəlduzlara zəng çatmamağına baxmayaraq, hansısa maraqlarına görə, Şahin Quliyev onların barəsində axtarış elan etmir. Halbuki, təqsirləndirilən şəxslərin daimi iş yerləri olmadıqda, istintaq aparan orqanın ərazisində daimi pasport qeydiyyatında olmadıqda, çöldə sərbəst gəzərək, hadisə şahidlərinə təzyiq göstərmək imkanları olduğuna və sairə bu kimi hallara görə dərhal həbs edilməlidirlər.

Qeyd edim ki, Yasamal Rayon Polis İdarəsinin İstintaq şöbəsi Sizin cəzaların humanistləşdirilməsi barədə imzaladığınız sərəncamı, sözün əsl mənasında başına "qalxan" edir. Onları başa salan yoxdur ki, Cənab Prezidentin bu humanist sərəncamı, ilk dəfə cinayət törədənlərə, bilməyərəkdən cinayətə alət olanlara və ən nəhayət cəmiyyətə ictimai təhlükə saçmayanlara aiddir. Dələduzluq əməli cəmiyyətə açıqca təhlükədir. Ərəstun Poladov kimi, eyni əməllərlə, təkrar cinayət törətmiş Bakının Nizami Rayon Polis İdarəsində və Şamaxı Rayon Polis Şöbəsində barəsində açıq cinayət işləri olan, axtarışda olan cinayətkara şamil oluna bilməz! Xatırladıram ki, bu Yasamal rayon Polis İdarəsinin və Yasamal rayon Prokurorluğunun mənə qarşı atdığı birinci qanunazidd əməlləri deyil. Ölkəmizdə ilk Avropa Oyunları keçirilən zaman da tanımadığım şəxs mənə hücum etmiş, müəyyən xəsarətlər yetirmişdir. O vaxt da, Yasamal rayon prokuroru Rasim Hacıyev idi, indi də... Həmin hadisə zamanı da, Yasamal hüquq-mühafizə orqanları mənə qarşı soyğunçuluq və xuliqanlıq etmiş şəxsin başını tumarlayaraq sərbəst buraxdılar, indi də. Bəzən fikirləşirəm, hüquq-mühafizə orqanları bəlkə mənim dövlətimə, Sizə etdiyim xidmətlərimə görə məni cəzalandırırlar, şikayəltərimə baxmırlar. Bunlar bir jurnalist kimi məndən kimin və nəyin qisasını alırlar? Bununla bağlı dəfələrlə daxili İşlər Naziri Ramil Usubova, Baş Prokuror Zakir Qaralova, Bakı Şəhər Prokuroruna və digər səlahiyyətli şəxslərə müraciət etmişəm. Əfsuslar olsun ki, onlar da mənə qaranlıq qalan məqamlara görə, dələduzların həbsini təmin etməyiblər.
2018-ci ilin avqust ayında məsələ ilə əlaqədar Bakı Şəhər Baş Polis İdarəsinin rəisi, general-mayor Mirqafar Seyidovun da qəbulunda olmuşam. Sağ olsun, Mirqafar müəllim mənim şikayətimə xüsusi həssaslıqla yanaşaraq dələduzların həbsi və ya dəymiş zərərin ödətdirilməsi üçün Yasamal rayon Polis İdarəsinin rəisinə şifahi tapşırıqlar da verdi. Lakin Yasamal Polis İdarəsinin rəisi İsfəndiyar Mehbalıyev və İstintaq şöbəsinin rəisi Şahin Quliyev, Mirqafar Seyodovun da tapşırığına məhəl qoymadı. Yasamal polisində mənə “bura arzular, istəklər verilişi deyil ki, həmin şəxsləri tutaq” dedilər. Deməli, cinayətkarı tutmur və məni də borclu çıxarırlar. Üstəlik, Bakı Şəhər Baş Polis İdarəsinin rəisinə qarşı da hörmətsizlik edirlər.
Əslinə qalsa, 17 illik mətbu fəaliyyətimə nəzər salsaq, mənə iki dəfə Sizin sərəncamınızla jurnalistlər üçün inşa edilmiş binalarda, mənzil verilməli idi. Əslində... Çünki şəxsi vəsaitim hesabına, 9 il qəzet buraxmışam və qəzet səhifələrində yalnız dövləti və dövlətçiliyi, iqtidarımızın yürütdüyü uğurlu daxili və xarici siyasəti təbliğ etmişəm. Bu, məsələnin başqa bir tərəfidir. Minnət qoymuram. Əstağfurullah. Əksinə deyirəm ki, əməyimiz, illərdir qəzetimizin çapına sərf etdiyimiz pullar dövlətimizə, iqtidarımıza fəda olsun!
Möhtərəm Cənab Prezident!
7.330 manat pul bir dləduza bağışlanılası pul deyil. Biz onu zülümlə yığmışdıq ki, bir kiçik ev tikib içində yaşayaq. Mən rüşvət almadan yaşayıram, beynimin məhsulu ilə pul qazanıram. Elə 7.330 manat pulu da gözümün nuru ilə qazanmışdım... Siz hər bir Azərbaycanlının normal yaşamasının, həyatda qalmasının qarantısınız. Ola bilər ki, 7.330 manat kimlər üçünsə kiçik puldur. Lakin mənim kimi kasıb jurnalist ailəsi üçün bu çox böyük bir məbləğdir.
Sizdən xahiş edirəm ki, həmin dələduzların tutularaq həqiqi istintaqın qarşısına çıxarılması üçün göstəriş verəsiniz. Əgər, Yasamal rayon Polis İdarəsinin İstintaq şöbəsinin rəisi Şahin Quliyevin, Yasamal rayon Polis İdarəsinin rəisi İsfəndiyar Mehbalıyevin, Yasamal rayon Prokuroru Rasim Hacıyevin dələduzlara "yazıqları" gəlirsə, onlara ürəkləri "yanırsa" eybi yox, zəhmət çəkib ciblərindən mənə dəymiş zərəri ödəsinlər. Ya da ki, cinayətkarları dərhal həbs etsinlər.
Mən, Prezidentimin o tip ictimai təhlükə saçan insanların hər gün günahsız insanları aldatmalarına göz yummayacağına əminəm.

Dərin hörmət və ehtiramla,
jurnalist Fariz Quliyev.