Bir-iki gün bundan öncə GündemXeber.Az saytının redaksiyasına üz tutan və illər uzunu üz-üzə qaldığı problemin həllinə heç cür nail ola bilməyən, həmçinin Abşeron rayonu, Xırdalan şəhəri, Quşçuluq Y\M, Fizuli küçəsi, ev-34 ünvanda Şabanov İbadət Aslan oğlu, redaksiyamıza təqdim etdiyi müraciətində qeyd edir ki, “1998-ci ildə mərhum prezidentimiz Heydər Əliyev Türkiyənin İstanbul şəhərində türk iş adamları ilə görüş keçirdi və görüş zamanı o, iş adamlarına müraciət edib bildirdi ki,

“Siz Orta Asiya respublikalarında tikinti sahəsinə sərmayələr qoyursunuz, bu olduqca gözəl haldır. Həmin respublikalarda yaşayan xalqlar da, müsəlman qardaş-bacılarımızdır. Mən hər birinizi Azərbaycana da dəvət edirəm, gəlin bizim respublikaya da yatırımlar qoyun, yeni-yeni iş yerləri açın, sizə lazımi şərait yaradılacaq”. Həmin vaxt mən Bakı şəhərində idim və televiziya ekranlarında mərhum prezidentimiz Heydər Əliyevin belə bir çağırışını eşitdim. O halda onun iş adamlarına etdiyi çağırışı əsas tutub, Binəqədi RİH-nin sabiq başçısı İnqilab Nadirova müraciət ünvanladım. Məqsədim Bakı şəhərinin 7-ci və 8-ci mkr-nın kəsişməsində yerləşən və bu gün “Kəmalə və Nərmin” şadlıq sarayının əhatə etdiyi ərazidə, məhz böyük tikinti kompleksi inşa etdirmək idi. Onu da bildirim ki, həmin illərdə qeyd olunan ərazi olduqca bərbad halda idi və zibilliklərlə əhatə olunmuşdu. Etdiyim müraciət əsasında RİH-dən cavab verdilər ki, “Get ərazini qaydaya sal və görmək istədiyin işlərə başla”. Aparılacaq tikinti kompleksi işi ilə bağlı Bakı şəhər İH-dən lazım olan sərəncamı da əldə edə bildim.
İxtisasım tikinti mühəndisi olduğundan, həmin vaxt yaxın qohumlarım Ilyas Rzayevlə, Yaqub Məmmədovla və iş icraçısı işlərində çalışan Arif Rüstəmov adlı şəxslərlə görüşüb məsləhətləşdim. Ümumi müzakirələrdən sonra belə qərara gəldik ki, bu işi başa çatdırmaq üçün xeyli məbləğdə pul vəsaiti lazımdır. Düzdür, əvvəlcə belə bir razılıq əldə etdik ki, bu işi başa çatdırmaq üçün lazım olan əsas pul vəsaitini mən, İlyas Rzayev və Yaqub Məmmədov düzüb qoşmalı idik. Həmin vaxtlarda Ilyas Rzayevin Moskvada yaşayan yaxın qohumu reketlər tərəfindən oğurlandı və başı belə bir problemə qarışdığından, o üzərinə düşən pul vəsaitini tam şəkildə düzüb qoşa bilmədi. Belə olan halda iş yarımçıq qalmasın deyə, mən dost-tanışlardan borc pul aldım, həmçinin tikinti işlərinə lazım olan materialları da nisyə götürdüm. Biz ilk əvvəl aramızda şifahi formada belə bir razılaşma əldə etmişdik ki, inşa etdirdiyimiz tikinti kompleksində mən və Yaqub Məmmədov 15 faizə, İlyas Rzayev isə 70 faizə payçı olmalı idik. Yuxarıda qeyd etdiyim kimi, İlyas Rzayevin başı problemə qarışdığından o, ona aid olan vəsaiti tam şəkildə ödəyə bilmədi. Belə olan halda mən bir qohum olaraq aramızda əldə etdiyimiz razılaşmanın pozulmasını istəmədim. Elə ki, tikinti kompleksində işləri başa çatdırdıq və 2000-ci ildə obyektin açılışı oldu, o halda Binəqədi RİH-nin sabiq başçısı, ona yaxın şəxslər, çoxsaylı dost-tanışlar açılışda iştirak etdilər. Bu minvalla iki ilə yaxın müddət ərzində mənim iştirakımla obyekti işlətdik və ayrı-ayrı ünvanlardan nisyə götürülən tikinti materiallarına görə, nəğd şəklində qoyulan pullara görə əmələ gələn borcları əldə olunan gəlirlər hesabına ödədik. İki ildən sonra isə, İlyas Rzayevə müraciət etdim ki, gedək vaxtilə aramızda əldə etdiyimiz şifahi razılaşmanı notariusda notarial qaydada təsdiq edək. O, mənim belə bir təklifimə ciddi yanaşmadı və hər dəfə minbir bəhanələr danışmaqla məni aldada bildi. Son anda da notariusa getməkdən birdəfəlik imtina etdi. Ona notariusa getməklə bağlı təklif etməkdə məqsədim, məhz vaxtilə aramıza əldə etdiyimiz şifahi razılaşma əsasında mənə çatacaq 15 faiz payı notarial qaydada rəsmiləşdirmək idi. Onun belə bir mövqeyindən sonra hər şeyi başa düşdüm və 2002-ci ildən başlayaraq İlyas Rzayevlə aramızda ciddi problemlər yaşanmağa başladı. Artıq vəziyyət o həddə gəlib çatıb ki, mən belə bir halın varlığına heç cür dözə bilmirəm və bu gün özümə qəsd etmək haqda da düşünürəm. Ona görə də media vasitəsilə belə bir problemin, yəni vaxtilə özümə yaxın bildiyim İlyas Rzayevin ədalətsiz mövqeyinin ictimailəşdirilməsinə qərar verdim.



Hal-hazırda 60 yaşımı keçmişəm və xeyli müddətdir ki, insulit xəstəsiyəm. Belə bir səbəblər üzündən də, heç bir əmək fəaliyyəti ilə məşğul ola bilirəm və normal hərəkət etmək imkanım da yoxdur. Mən vaxtilə bu günüm üçün tikinti kompleksi inşa etməyə qərara vermişdim ki, gələcəkdə dolanışığımı müəyyən qədər təmin edə bilim. İndi isə, İlyas Rzayevin belə bir ədalətsiz mövqeyi məni dolanışıq imkanlarımdan məhrum edib. Ona görə də istərdim ki, üz-üzə qaldığım belə bir problemin həllində ölkə rəhbəri cənab İlham Əliyev mənə öz köməkliyini göstərsin. Çünki, uzun illərdir ki, mən İlyas Rzayevin mənə qarşı etdiyi olmazın haqsızlığın qurbanı olmuşam. Ona görə də düşünürəm ki, belə bir problemim ictimailəşdirildikdən sonra, həmişə xalqına sıx bağlı olan, hər kəsin üz-üzə qaldığı problemin ədalətli həlli yöndə aidiyyəti üzrə lazımi tapşırıqlarını verən cənab Prezidentimiz, mənə də öz köməkliyini göstərəcək və aidiyyəti üzrə lazımi tapşırığını da verəcək. Bundan əlavə, çox hörmətli Mehriban xanım Əliyeva da, hər zaman haqqı müdafiə edib, haqsızlığa qarşı barışmaz mövqeyini ortaya qoyub, hər kəsə, daha çox isə, sadə sakinlərə məxsus problemlərin həllində lazımi dəstəyini də göstərib. Mən hər zaman əsası mərhum prezidentimiz Heydər Əliyev tərəfindən qoyulan, bu gün isə ölkə rəhbəri cənab İlham Əliyev tərəfindən uğurla həyata keçirilən siyasətin müdafiəçilərindən olmuşam. Məhz, bu gün də həmin siyasətin müdafiəçilərindənəm.
Mənim iş fəaliyyətim haqda vaxtilə Binəqədi RİH-nin, Bakı şəhər İcra Hakimiyyətinin rəhbər şəxsləri, hətta digər vəzifə sahibləri də lazımınca məlumatlı olublar. Həmişə xalq və dövlət üçün çalışmışam, xalqımızın və dövlətimizin mövqeyini müdafiə etmişəm. Ona görə də düşünürəm ki, bir vətəndaş olaraq pozulmuş haqqımın müdafiə olunmasında mənə lazımi dəstək göstəriləcək. Mən buna olduqca əminəm və əmin olduğum üçün də, məhz belə bir problemin ictimailəşdirilməsinə qərar vermişəm”.

Bu məqalədə qeyd olunanlar Abşeron rayonu, Xırdalan şəhəri, Quşçuluq Y\M, Fizuli küçəsi, ev-34 ünvanda yaşayan Şabanov İbadət Aslan oğluna məxsusdur və biz də bir redaksiya olaraq haqqın-ədalətin qorunmasına tərəfdar olduğumuzu bildiririk. Məqalədə adı çəkilən hər kəsin mövqeyini dərc etməyə hazırıq.
Mövzu diqqətimizdədir.

GundemXeber.Az