Əli Nəbiyev: “Abdin Fərzəliyev onu da yaxşı bilir ki, “Xocalı” kiçik müəssisəsinə məxsus torpaq sahəsi, mərhum prezidentimiz, xalqımızın ulu öndəri Heydər Əliyevin tapşırığı əsasında mənə verilib”

“Gündəm Xəbər” qəzetinin ötən saylarında bir neçə dəfə Nərimanov rayonu Ağa Nemətulla küçəsi bina 61a ünvanında yaşayan və əslən Xocalı rayonundan məcburi köçkün düşən, 2-ci qrup Qarabağ əlili, ehtiyatda olan zabit və əlli gündən çox erməni əsirliyində qalan 75 yaşlı Xocalı kiçik müəssisəsinin təsisçisi Nəbiyev Əli İbad oğlunun üz-üzə qaldığı problemlərdən bəhs etmişdik. O, bu günədək üzləşdiyi probleminin həllinə nail ola bilmədiyi üçün, yenidən “Gündəm Xəbər” qəzetinin redaksiyasına üz tutmaq məcburiyyətində qalır və təkrar yazdığı müraciətində bildirir ki, “mən 1969-cu ildə Gəncə Kənd Təsərrüfatı İnstitunun Mexanikləşdirilməsi fakültəsini bitirməklə bərabər, hərbi rütbə almağa da müyəssər oldum. İlk təyinatım Kənd Təsərrüfatı Nazirliyinin təchizatı strukturuna verildi ki, həmin ildə, yəni 1969-cu ildə xalqımızın ulu öndəri, mərhum prezidentimiz Heydər Əliyev, AKPMK-nın birinci katibi təyin olunmuşdu. Heydər Əliyev təyinatının ilk günlərindən başlayaraq, Qarabağ ərazisində azərbaycanlı kadrların işlə təminatını həyata keçirməyə başladı ki, bu da olduqca uğurlu addım oldu. Əslən Xocalıdan olduğum üçün o, məni Dağlıq Qarabağ ərazisi üzrə texnikalara nəzarətçi təyin etdi.

Bundan əlavə, Heydər Əliyev Qarabağın müxtəlif ərazisində institut açdırdı, ərazidə azərbaycanlı kadrları çoxaltdı. Amma, ermənilər 1988-ci ilin fevralından başlayaraq biz azərbaycanlıları həm işdən, həm də Dağlıq Qarabağın ayrı-ayrı şəhərlərindən qovmağa başladılar. Həmin ildə Xocalıya şəhər statusu da verdilər.

Elə ki, Qarabağ müharibəsi başladı, biz gecə-gündüz yata bilmədik. 26 fevral 1992-ci ildə Xocalı soyqırımı törədilən zaman, mən “vzvod komandiri” vəzifəsini daşıyırdım. Müharibənin davam etdiyi illər ərzində ağır yaralandım, əsir düşdüm, ağzımın içindən güllə atdılar, dişlərimi kəlbətinlə çəkdilər, qollarımı qırdılar, ayaqlarıma xaç çəkdilər, bədənimin müxtəlif yerlərini deşik-deşik etdilər, nəslimizdən neçə-neçə nəfəri qətlə yetirdilər, bu gün də xəstəxanalarda qalmışam.

1996-cı ildə Heydər Əliyev Qarabağ müharibəsi əlillərinə köşk qoymaq məqsədilə, torpaq sahəsinin ayrılması üçün aidiyyəti qurumlara müəyyən tapşırıqlarını verdi. O, həmin vaxt Bakı şəhər İcra Hakimiyyətinin başçısı olmuş mərhum Rəfail Allahverdiyevə tapşırdı ki, “vaxt gələcək köşklər söküləcək, ona görə də “Xocalı” kiçik müəssisəsi üçün torpaq sahəsi ayır, tapşır ona iki faizlə pul verilsin, nə lazımsa köməklik edin. İmkan verin bina tiksin, binadan istifadə olunanda da götürdüyü pulları qaytarar” deyə tapşırıqlarını verdi. Düzdür, şəhər meri mənə torpaq sahəsi ayırdı, mən isə binanın bünövrəsini qazdırıb Uzaq Sibirdə yaşayan həmyerlilərimizdən ili 20 faizə 1 milyon 100 min dollar pul aldım. Götürdüyüm pulların faizi ildən-ilə artsa da, mən həmin pullarla altımərtəbəli bina tikdim və onu kirayə də verdim. Binanın üçüncü mərtəbəsində 4 qaçqın ailəsi yaşayırdı”.

Əli Nəbiyev onu da vurğulayır ki, “Nərimanov rayon İcra Hakimiyyətinin başçısı Abdin Fərzəliyev 2011-ci ilin əvvəllərindən bilirmiş ki, “Xocalı” kiçik müəssisəsinə məxsus bina söküləcək. O, 01 iyun 2011-ci il tarixdə Əmlak Məsələləri üzrə Dövlət Komitəsinin sədri Kərəm Həsənovdan xahiş edir ki, “Xocalı” kiçik müəssisəsinə məxsus binanın alt hissəsindəki torpaq sahəsinin özəlləşdirilməsinə imkan verməsin. Abdin Fərzəliyev onu da yaxşı bilir ki, “Xocalı” kiçik müəssisəsinə məxsus torpaq sahəsi, mərhum prezidentimiz, xalqımızın ulu öndəri Heydər Əliyevin tapşırığı əsasında verilib. Abdin Fərzəliyevə vəzifəni isə, onun oğlu Əliyev İlham Heydər oğlu verib. Belə olan halda düşünürdüm ki, Abdin Fərzəliyev hörmətlə yanaşıb, mənə heç bir problem yaratmayacaq. Amma, düşündüklərimin və gözlədiklərimin əksini gördüm. Görəsən, Abdin müəllimin mənə problem yaratmaqda məqsədi nədir? Bəlkə mən ermənilərlə döyüşmüşəm, onlara güllə atmışam, ona görə də o, məndən onların heyfini çıxır?

Onu da qeyd edim ki, Abdin Fərzəliyev 01 iyun 2011-ci il tarixdə ünvanladığım 238 saylı məktubuma 3 ay sonra, yəni 05 sentyabr 2001-ci il tarixdə cavab vermiş və imzaladığı 377 saylı sərəncamda onu da qeyd etmişdir ki, “Xocalı” kiçik müəssisəsinin sökülən binasının köçürülməsi üçün, Nərimanov rayonu Ağa

Nemətulla küçəsində 420kvm-lik torpaq sahəsi ayrılsın. Bundan əlavə o, həmin binaya 3 milyon 500 min manat kompensasiya da ayırır. Elə ki, mən həmin pulu ondan istədim və bildirdim ki, binanı özüm tikmək istəyirəm. Bu zaman o, cavab olaraq bildirdi ki, “mən həm ölkə rəhbəri İlham Əliyevlə, həm də Mehriban xanım Əliyeva ilə razılaşmışam ki, binanın tikintisini biz həyata keçirək”. Bu minvalla çox keçmədi ki, BŞİH, Memarlıq və Şəhərsalma Baş İdarəsini təsdiq etdiyi layihəni və “ARAZ-2011A”-nin zəmanət müqaviləsini mənə verdilər. Müqavilə şərtində zamin olublar ki, 2012-ci ilin iyun ayına kimi “Xocalı” kiçik müəssisəsinin binasını tam tikib, sənədləri ilə birlikdə mənə təhvil verəcəklər. 2011-ci ilin sentyabrında 4 qaçqın ailəsini kirayə çıxartdılar və bu günə kimi də onların kirayə pulunu vermirlər. Binanı isə təsdiq olunan layihə və zəmanət müqaviləsi əsasında təmir etmədilər.

Təsdiq olunmuş layihəyə əsasən, binanın 6-cı mərtəbəsi yaşayış evi üçün nəzərdə tutulsa da, otaqlara mavi qaz çəkilməyib, qızdırıcı qazan qoyulmayıb, quraşdırılmış 48 pəncərə açılıb-bağlanmır, döşəmə parket olmalı olduğu halda, o da vurulmayıb, tavana vurulan materiallar ayda bir dəfə dəyişdirilməlidir, binanın üstünə yağan yağış suları otaqlara axır, yanğın təhlükəsizliyinə aid heç bir avadanlıq quraşdırılmayıb, hətta torpağa da sənəd vermirlər. Bu gün Nərimanov rayon İcra Hakimiyyətinin başçısı vəzifəsini daşıyan Abdin Fərzəliyev qarşımda belə bir şərt qoyub bildirir ki, “əgər binanı bu qayda təhfil götürməsən, son anda sənin üçün pis olacaq” deyir.

Hörmətli Prezident! Mən əksər dövlət qurumlarında olmuşam, çoxsaylı şikayət ərizələrimi və teleqrammalarımı da vurmuşam. Atdığım addımların qarşılığında bir kimsə mənim problemim ilə maraqlanmır. Çünki, Abdin Fərzəliyev hər bir vəzifə sahibinə deyir ki, “mən bu problemlə bağlı ölkə rəhbəri cənab Ilham Əliyevlə və Meriban xanım Əliyeva ilə razılaşmışam”. Belə bir səbəb üzündən də, idarə, müəssisə, təşkilat rəhbərləri məni qəbul etmirlər, problemimin həllinə cəhd göstərmirlər. Mən bu günədək şəxsən Sizin ünvanınıza 20 ədəd ərizə, Mehriban xanımın ünvanına 25 ədəd ərizə, Leyla xanımın ünvanına 5 ədəd ərizə, Ramiz Mehdiyevin ünvanına 15 ədəd ərizə, Əli Əsədovun ünvanına 15 ədəd ərizə və 5 dəfə də qəbulunda olmuşam, Qaçqınların və Məcburi Köçkünlərin İşləri Üzrə Dövlət Komitəsinin sədri Əli Həsənovun ünvanına isə 10 ədəd ərizə yazsam da, təəssüflər olsun ki, ünvanladığım ərizələrin heç birinə cavab verilmir. Görünür Abdin Fərzəliyevin adamları yazdığım ərizələrin ünvanı üzrə çatdırılmasına imkan vermirlər.

İndi bu gün Sizdən istəyim və xahişim odur ki, “Xocalı” kiçik müəssisəsinə məxsus binanın sənədləşmə işlərinin həllində və təhvil verilməsində, mənə öz köməkliyinizi göstərəsiniz. Qarşı tərəfin də mövqeyini dinləyə bilərik.

gundemxeber.az