Əziz Saleh bəy!

Hüquq müdafiəçisi Oqtay Gülalıyev siyasi məhbus Saleh Rüstəmova ünvanladığı təbrik məktubunu vətənpərvər xalqımızın oxuması üçün təqdim edirik: ''Vətən sizin kimi fədakar oğulların çiynində ucalır
Bu gün sizin doğum gününüzdür, sizi təbrik edirəm. Çox təəssüf ki, siz növbəti doğum gününüzü Azərbaycanda insan həyat üçün təhlükəli olan ən yararsız həbsxanalarından birində - 13 saylı Cəza Çəkmə Müəssisəsində qeyd edirsiniz. Torpaqlarımızın ərazi bütövlüyü uğrunda vuruşmuş qazimiz ən dəhşətli və yararsız "zon"- da haqq etmədiyi cəzanı çəkir...

Sizin həbsiniz sizi yenidən, daha ətraflı və olduğu kimi cəmiyyətə təqdim etdi. Sizin Vətən torpaqlarının azad olunması və qorunması uğrunda göstərdiyiniz misilsiz xidmət, Başkəndin ermənilərdən azad olunmasındakı sücəatiniz, 1992- 93- cü illərdə Gədəbəy rayon icra hakimiyyətinin başçısı kimi nümunəvi fəaliyyətiniz, eyni zamanda şərlənib həbs olunmuş siyasi məhbuslara son illər verdiyiniz dəstək və digər xeyirxah əməlləriniz sizin nə qədər vicdanlı, Vətənini, xalqını sevən bir şəxsiyyət olduğunuzu göstərdi.

Hazırda siz siyasi məhbus həyatı yaşayırsınız. Etmədiyiniz cinayətə görə sizdən vətəni sevməyi və onu göz bəbəyi kimi qorumağın qisasını alırlar. Amma qədrbilən xalqımız çox gözəl bilir ki, Vətən sizin kimi fədakar oğulların çiynində ucalır. Sizlər xalqımızın xoş, firavan gələcəyi uğrunda çarpışdığınıza görə, həbsdəsiniz. Amma biz inanırıq və əminik ki, bütün bunlar ötüb keçəcək. Başda siz olmaqla bütün siyasi məhbuslarımız haqq etdikləri azadlığına qovuşacaq. Ölkəmizdə azad, demokratik cəmiyyət quracayıq. O cəmiyyətdə vətən üçün, xalq üçün, torpaq uğrunda mübarizə aparan insanlar şərlənib həbs olunmayacaq, əksinə ən ali hörmətə layiq görüləcəklər. Sizlər indidən o sevgini, hörməti qazanmısınız...

Bir daha doğum gününüzü təbrik edirəm! Azad, demokratik, Bütöv Azərbaycanda yaşamaq nəsibiniz olsun! Tezliklə azadlıqda görüşmək ümidi ilə...''

GundemXeber.Az