GundemXeber.Az saytının redaksiyasına Tovuz rayonu, Qovlar şəhər sakinlərinin ölkə rəhbəri İlham Əliyevə ünvanladıqları müraciətləri daxil olub.

Müraciət müəllifləri qeyd edirlər ki, “Bura Tovuz rayonunun Qovlar Dəmir Yol Stansiyasıdır. Stansiyada piyadaların gedib gəlişini, təhlükəsizliyini təmin etmək üçün, bu stansiyada yeraltı keçid inşa olunmayıb. Belə bir halın varlığı da sakinlərin haqlı narazılıqlarına səbəb olmaqdadır. Dəmir yol xətləri Qovlar şəhərininin yaşayış sahəsini iki yerə bölür. Yolun alt hissəsində 400-dən çox yaşayış evləri var və qeyd olunan yaşayış sahəsində nə xəstəxana, nə bağça, nə məktəb, nə də ki, hansısa iaşə obyekti yoxdur. Tovuz RİH-i başçısının İƏD üzrə nümayəndəliyi, Qovlar şəhər bələdiyyəsi, xəstəxanalar, bağçalar, məktəblər, mağazalar, marketlər dəmir yolunun üst hissəsində yerləşdiyindən, dəmir yolunun alt hissəsində yaşayan sakinlər xəstəxanalara, bağçalara, məktəblərə və s. getmək üçün, dəmir yolu xətlərinin üstündən keçmək məcburiyyətində qalırlar. Hal-hazırda Qovlar Dəmir Yol Stansiyasında dörd ədəd dəmir yol xətti var. Əgər həmin yollardan birində yük qatarı dayanarsa, o halda yaşlı insanlar, uşaqlar, qadınlar, məktəblilər dayanan vaqonların altından əyilib keçmək məcburiyətində qalırlar. Hətta, elə vaxtlar da olur ki, yük qatarları saatlarla stansiyada dayanır, vaqonların altından keçə bilənlər keçib gedirlər, keçə bilməyən yaşlılar, qadınlar, uşaqlar isə, xeyli müddət gözləməli olurlar. Bu da şagirdlərin məktəblərə, yaşlıların xəstəxanalara, mağazalara və s. gedib geri qayıtdıqları zaman çoxsaylı problemlər yaradır. Dayanmış qatarın altından keçərkən hər an, hər dəqiqə faciəli hadisə baş verə bilər. Fakt budur ki, bu gün sakinlərin heç bir təhlükəsizliyi təmin edilmir. Gün ərzində piyadaların istifadə etdikləri həmin ərazidən təqribən 2000-3000 insan istifadə edir. Bakı-Qazax, Qazax-Bakı avtomobil yolundan istifadə edən sərnişinlər də, məhz həmin dəmir yol xətlərinin üstündən keçmək məcburiyyətində qalırlar.

Bundan başqa, Qovlar Dəmir Yol Stansiyasının yaxınlığında, yəni Bakı-Qazax avtomobil yolunun alt hissəsində Aran Yanıxlısı, Aşırallar kəndləri də var. Həmin kəndlərdə də heç bir bağça, xəstəxana, bir dənə olsun belə iaşə obyekti yoxdur. Həmin kəndlərin sakinləri də, hansısa ünvana getdikləri halda Qovlar stansiyasındakı xətlərin üst hissəsindən keçməli olurlar. Belə bir səbəblər üzündən də, biz Qovlar şəhər sakinləri 07 yanvar 2020-ci il tarixdə saat 16:00-da dinc aksiya keçirdik və illər uzunu üz-üzə qaldığımız belə bir problemin həll olunması üçün Azərbaycan Respublikasının Prezidenti cənab İlham Əliyevə müraciət etmək qərarına gəldik. Ona görə də bu müraciətimizi yazıb cənab Prezidentdən xahiş edirik ki, CƏNAB PREZİDENT! YAŞLI İNSANLARIN, AZYAŞLI UŞAQLARIN, MƏKTƏBLİLƏRİN TƏHLÜKƏSİZLİYİNİ NƏZƏRƏ ALIB, QOVLAR DƏMİR YOL STANSİYASINDA PİYADALARIN RAHAT GEDİB GƏLİŞİNİ TƏMİN ETMƏK MƏQSƏDİLƏ, QOVLAR DƏMİR YOL STANSİYASINDAKI DƏMİR YOL XƏTLƏRİNİN ALT HİSSƏSİNDƏ EKSKALATORLU YERALTI KEÇIDİN QURAŞDIRILMASI ÜÇÜN SƏLAHİYYƏTLİ QURUMLARA LAZIMİ TAPŞIRIĞINIZI VERƏSİNİZ. Əvvəlcədən təşəkkürümüzü bildiririk”.

Vaqif Əhmədov