18 saylı Nərimanov-Nizami seçki dairəsi seçicilərinin diqqətinə!

Dəyərli seçicilər!

Hər adamın taleyinə Elçi Bəy kimi böyük bir şəxsiyyətin köməkçisi olmaq qisməti düşmür! Elçi Bəy 1991-ci ildə Oqtay Yusif oğlu Qasımovu öyrənib, tanıyıb, inanıb özünə köməkçi götürdü və yanılmadı: Oqtay bəy nəinki 22 avqust 2000-ci ilə – Bəyin Haqqın rəhmətinə qovuşduğu günədək, o gündən sonrakı iyirmi il boyunca da dediyi hər sözdə, atdığı hər addımda Elçi Bəyin ona olan inamını şərəflə doğrultdu. İllər uzunu Elçi Bəydən təmizlik, təmənnasızlıq, xalqa vicdanla xidmət, milli mənafeyin şəxsi mənafedən üstün tutulması dərsini almış Oqtay bəy özünün yüksək savadı, sağlam düşüncəsi, əxlaqı, nəcib davranışı, təmənnasızlığı ilə Elçi Bəy məktəbinin ləyaqətli yetirməsi olduğunu ortaya qoydu.



Oqtay Qasımov öz halal zəhməti ilə yaşayan və xalq içərisindən çıxmış sadə bir insandır. Bununla yanaşı, Oqtay bəy həm də tutduğu yola heç vaxt xəyanət etməyən, yüksək siyasi və təşkilatçılıq bacarığı ilə seçilən, haqsızlığa qarşı mübarizəni özünə borc bilən bir şəxsiyyətdir – böyük diplomatiya yolu keçib sınaqdan çıxmış təcrübəli bir dövlət kadrıdır. İstər düşüncələrində, istər çıxışlarında yazılarında, istərsə də davranışlarında Oqtay bəyin başlıca hədəfi həmişə Millətinə, Vətəninə, Dövlətinə və dövlətçiliyinə təmənnasız xidmət etmişdir.
Hazırda Oqtay Qasımov heç bir partiyanın üzvü deyil və Milli Məclisə növbədənkənar seçkilərdə öz namizədliyini müstəqil olaraq irəli sürmüşdür. Xalqın indiki durumunda Oqtay Qasımov kimi öz şəxsiyyətini qoruyan, özəlliklə də haqsızlığa qarşı mübarizəni amala çevirən təcrübəli və təmənnasız bir kadrın millət vəkili seçilməsinə Azərbaycanın böyük ehtiyacı vardır.

18 saylı Nərianov-Nizami seçki dairəsinin dəyərli seçiciləri! Biz Oqtay Qasımovu yaxından tanıyan dostları, tanışları, onun şəxsiyyətinə, qabiliyyətinə inanan və onu dəstəkləyən insanlar inanırıq ki, son sözü sizlər deyəcək və 9 fevral 2020-ci il seçkilərində aktiv iştirak edərək Oqtay Qasımova səs verəcəksiniz!

GundemXeber.Az