Göygöl rayon Üçtəpə kənd sakini Şahin Məmmədov GundemXeber.Az-a icra başçısı Arif Seyidovun özbaşınalığından Prezident Ilham Əliyevə etdiyi açıq müraciəti göndərib və dərc olunmasını xahiş edib. Biz də həmin müraciəti olduğu kimi oxucuların diqqətinə təqdim edirik:

''Hörmətli cənab Prezident!
Mən Məmmədov Şahin Şakir oğluyam, 2016-cı il aprel döyüşlərinin iştirakçısıyam. Və​ həmin döyüşlərdə iştirakına görə Fəxri Fərmanla təltif edilmişəm. Göygöl rayonunun Üçtəpə kəndində yaşayıram. Ali təhsilliyəm. Müəllim işləyirəm. 2003-cü ildən YAP üzvüyəm. Ehtiyyatda olan zabitəm.​
Göygöl rayonunda olan acınacaqlı duruma dözə bilmirəm. İnanın ki, Göygöl rayonundakı vəziyyət, İmişli rayonundan fərqli deyil. Arif Seyidov Vilyam Hacıyevin təkcə yerlisi yox, həm də yaxın dostudur.​
​ ​ ​ Göygölün başçısı özünün mal-qara fermasını qardaşı Maarif vasitəsilə saxlayır. Təbii olaraq bu işi​ kasıb insanların​ otlaq sahələrini və torpağını zəbt edərək otartdırır.
​ ​ Göygöl xəstəxanasının qarşısında olan aptek Arif Seyidovundur. Göygöl xəstəxanasının öz aptekində "yoxa çıxan" dərmanlar həmin aptekdə tapılır.
​ ​ Göygöl xəstəxanasının qarşısında olan "Məkan" çay evi və "Elit" çay evi Arif Seyidovundur. Ümumiyyətlə Göygöl rayonunda Arif Seyidovun olmayan heç bir obyekt yoxdur. Ola da bilməz.​
​ ​ Cənab Prezident 2014-cü ildə Arif Seyidovun qəbuluna getdim ki, bəs mədəniyyət şöbəsində korrupsiya halları var. Məni dinləmək əvəzinə, məni işdən azad etdilər. İllər sonra 2019-cu ildə mən Mədəniyyət şöbəsinin müdirini Seyidov işdən azad etdi.
​ ​ ​ Haqq yerini qismən də olsa tuta bilər, indi Arif Seyidovun cəsarəti çatırsa, işin ucu ona və müavini Kəmalə İbrahimovaya çatmırsa, 2014-cü ildə etdiyim müraciət əsasında, mədəniyyət şöbəsində araşdırılma aparılsın.​
​ ​ ​ Ancaq Arif Seyidov mənə siz haqlı idiniz desin.​ Üzürxaqlıq etsin.​ Təbii ki, vaxt ayıra bilsə. Çünki onun belə "xırda" işlərlə məşğul olacaq vaxtı yoxdur.
​ ​ Arif Seyidovun nəzarətsizliyi ucbatından, rayonun məşğulluğunda, sosial müdafiə, rabitə və nəqliyyat sahələrində vəziyyət acınacaqlıdır.​
Arif Seyidovun başı öz şəxsi biznesini idarə etməyə qarışıb. Göygöl rayonunun idarə edilməsi onun vecinə də deyil.​
​ ​ ​ Bir sözlə Arif Seyidov Göygöl rayonunu idarə edə bilmir. Göygöl rayonu Allah ümidinə yaşayır.​
Cənab Prezident mən aprel döyüşçüsü olaraq, rayonumuzun bir ziyalısı kimi Sizdən xahiş edirəm ki, Arif Seyidova dur deyin. Heç olmasa yerini başqa bir rayona​ dəyişin.''

GundemXeber.Az