Bəllidir ki, bir müddət bundan öncə Azərbaycan Respublikası Medianın İnkişafı Agentliyi (MEDİA) tərəfindən çap mediası subyektlərinin, həmçinin onlayn media subyektlərinin (veb-saytların) inkişafı, iqtisadi müstəqilliyinin gücləndirilməsi, fəaliyyətlərinin təkmilləşdirilməsi, habelə dövlət və cəmiyyət üçün əhəmiyyət kəsb edən layihələrin həyata keçirilməsi məqsədilə təşkil olunan müsabiqənin nəticələri açıqlandı və hər kəs qəbul olunan son qərar haqda lazımi məlumata malik oldu. Müsabiqənin nəticəsi olaraq Agentlik tərəfindən maliyyələşdirilən onlayn media subyektlərinin (veb-saytların) hər birinə aylıq 3000 (üç min) manat məbləğində, çap mediasına maliyyə yardımının göstərilməsi qaydalarına görə isə, həftədə bir nömrəsi maliyyələşdirilən qəzetlərin hər birinə ayda 5000 (beş min) manat, həftədə beş nömrəsi maliyyələşdirilən qəzetlərin hər birinə isə, ayda 15000 (on beş) min manat məbləğində maliyyə yardımının göstərilməsi nəzərdə tutulur. Qeyd edək ki, keçirilmiş müsabiqə və qəbul olunan son qərar, heç də hər kəsin ürəyincə olmadı. Çünki, Medianın İnkişafı Agentliyi tərəfindən təşkil olunan belə bir müsabiqə, sanki keçirilən tender oyunlarında dalbadal “qalib olan” şirkətlərin əldə etdikləri nəticə ilə eyniyyət təşkil edir. O halda sual oluna bilər ki, nədən 3000 (üç min) manat məbləğində maliyyə yardımı göstəriləcək onlayn media subyektlərindən çoxları, ötən illərdə Əli Həsənovun maliyyə dəstəyi hesabına maliyyələşən saytlardır ki, onların da adları bu siyahıda yer alıb. Həqiqət naminə qeyd edək ki, tərtib olunmuş siyahıda yer alan onlayn media subyektlərindən bir çoxunun adları, bəlkə də indiyə kimi əksəriyyət tərəfindən tanınmırdı. Bu da onu söyləməyə əsas verir ki, Azərbaycan mətbuatına söyüş kompaniyası gətirən, mətbuatın azadlıq ruhunu daim boğmağa çalışan, lazım gəldiyi təqdirdə kənardan işarə verməklə qarşısına qoyduğu planlarını həyata keçirməyə çalışan Əli Həsənovun təyin etdiyi kadrların, hələ də vəzifə sahibi olmaları tam əksəriyyəti şoka salmaqda davam edəcək. Sözsüz ki, belə ranqlı kadrlardan biri də Azərbaycan Respublikası Prezidenti Administrasiyasının İctimai-siyasi məsələlər şöbəsinin mətbuat və informasiya orqanları ilə iş sektorunun müdiri Vüqar Saydam oğlu Əliyevdir.
Unutmaq olmaz ki, ötən illər ərzində hakimiyyətdə təmsil olunan bəzi məmurlar tərəfindən qeyri-rəsmi maliyyələşdirilən bir çox onlayn media subyektlərinin əldə etdikləri maliyyə vəsaitləri, məhz verilmiş qərarla rəsmən qanuniləşdirildi. Yəni, müsabiqənin qalibləri elan olunanların siyahısına diqqət yetirdikdə bir daha məlum olur ki, maliyyə vəsaiti əldə edəcək onlayn media subyektlərinin əksəriyyəti vaxtilə Əli Həsənova xidmət edənlərdirlər. Bu da onu sübut edir ki, qeyd olunan layihənin həyata keçirilməsində obyektivlik təmin olunmayıb, Medianın İnkişafı Agentliyinin fəaliyyəti heç də şəffaflığa söykənməyib. Yəni, baş verənləri təhlil edib belə bir qənaətə gəlmək olar ki, hələ də Əli Həsənovun “işarəverən barmağı” söz sahibidir. Buna sübut olaraq keçirilən müsabiqənin və əldə olunan son nəticənin biabırçılıq və utanc hissi gətirməsidir. Sonda belə bir qənaətə də gəlmək olar ki, nə qədər ki, Vüqar Əliyev bügünkü vəzifəsindədir və o, dolayısı yolla olsa belə, Əli Həsənovun "işarəverən barmağı"nın əmr və tapşırıqlarını yerinə yetirir, deməli indiki reallıqla barışmaq lazım deyil. Yəni, belə bir reallığı dəyişmək lazımdır. Yoxsa, Vüqaqr Əliyev Bakı şəhəri, Günəşli qəsəbəsindəki qonşusu Əli Həsənovla işdən sonra görüşüb aldığı təlimatlarla medianı idarə edəcək. Bu da əvvəlki illərlə fərqlənməyən media siyasəti olaraq, hökumətə üzqarası olacaq.

GundemXeber.Az