Onları işi “şikarı” - sahibkarı, biznesmeni məmurun kabinetinə qovub, tora salmaqdır ..

Ovçuluq əkinçilikdən də qədim peşədir.
Qədim insan öz maddi tələbatını ödəmək üçün ətrafdakı canlıları ovlayıb qarnını doyururdu.
Təsəvvürünüzə gətirin qədim insan ilk dəfə daşı götürüb quşa, hansısa heyvana atır. Və onu ovlayır. Sonralar, ox, tüfəng və s. silahlar icad olunacaq.
Çox sonralar insan oğlu vəhşi heyvanları əhlilləşdirməyi öyrəndi. Və əhlilləşdirdiyi itlərdən ov tulası kimi istifadə etməyə başladı. Hətta ov tulalarına təlim də keçirdilər.
Sözün qısası, ov tulaları ov zamanı ovçuya əməlli-başlı kömək edirdilər.
Belə ki, tulalar ov quşlarını, heyvanları qovub düz ovçunun hədəfinə-tuşuna gətirirdilər.
Yəni əslində ovu tapıb gətirən ovçu tulaları olurdu. Ovun iyisinə düşüb onu yerindən tərpədir, qaçmağa, uçmağa məcbur edirdilər. Ovçu üçün qalırdı bircə tuşlayıb atmaq.
Bu gün də ov tulaları ovçuların karına gəlir, hətta ov tulalarının qiyməti günbəgün artır.
Qədim peşə olan ovçuluğu, ov tulalarını nə üçün yada saldıq.
Heç kimin ağlına gəlməz ki, korrupsiya və rüşvətxorluqla ov tulaları arasında bir oxşarlıq olsun.
Bəli, korrupsiya prosesində də az qala bir sürü tula iştirak edir.
Korrupsioner oturub yayda sərin, qışda isti kabinetində, “ov” gözləyir ki, nişan alıb gözündən vursun.
Bəli, kimsə “ovu” korrupsioner-rüşvətxor ovçunun qabağına, tuşuna gətirməsə, o heç nə edə bilməz.
Korrupsioner məmur gedib küçədə, bayırda yağlı rüşvət verən axtarmır ki...
Bunun üçün müasir tulalar var ki, onların işi imkanlı, varlı adamları aldadıb, tovlayıb korrupsioner məmurun kabuinetinə gətirməkdir. Onların işi bura qədərdir. Sonrasını məmur özü həll edir.
Zarafat bir yana, rüşvət və korrupsiya sadə məsələ deyil. Bu geniş bir sistemdir, bunun vintləri, şaybaları, tulaları var.
Müasir ov tulaları da korrupsiya sistemində önəmli rol oynayırlar.
Məsələn, sabiq mədəniyyət və turuzm naziri Əbülfəz Qarayevin belə bir tulaları olub. Onlar ölkədəki imkanlı sahibkarları izləmək, onlara maraqlı təkliflər vermək, bahalı turuzm obyektlərinin alıcılarını tapmaq, onların maliyyə imkanlarını dəqiq öyrənmək və sonda “şikarı”, yəni ovu, “ovçu”nun - nazir Əbülfəz Qarayevin hədəfinə tuş gətirmək və qalanı nazirlikdir.
Söhbət təkcə turizm obyektindən getmir. Bu gün əməkdar, yaxud xalq artisti olmaq istəyən o qədər onların özlərinin dilləri ilə desək, “quşlar” var ki. Bunları ovlamaq üçün əməlli-başlı tor qurmalısan, onları tora salmalısan.
Dediyimiz o tulalar kimləri tora salmayıblar. Kimlərin milyonlarının dalına keçməyiblər.
Bu məsələ təkcə sabiq nazir Əbülfəz Qarayevlə bağlı deyil. Digərləri də tulaların xidmətindən yaxşıca istifadə edir.
Belə məmurlardan biri də Bakının keçmiş meri Hacıbala Abutalıbovdur.
Məlumdur ki, Hacıbalanın tulaları bir neçə il əvvəl tikinti adı ilə xeyli sahibkarı merin toruna salıblar. Və sahibkarların təxminən 100 milyon manat pullarını alıblar ki, sizə paytaxtda böyük ərazi veriləcək ki, tikinti ilə məşğul olun.
Həmin tullalar sonra qaçıb aradan çıxıblar. İndi zavallı sahibkarlar qalıblar naçar vəziyyətdə.
Nə tulaları tapa bilirlər, nə də Hacıbalanı tapmaq olur.
Digər məmurlar da bu müasir tulalardan çox məharətlə istifadə edirlər.
Elə bilirsiniz almaq-vermək asan məsələdir. Bunun da gərək müasir metodlarını biləsən.
Bu tulalar bu yolla neçə-neçə iş adamının, biznesmenin ocağını söndürüb, biznesini çökdürüb, özünü də quyunun dibinə salıblar.
Bir vicdanlı araşdırmaçı, müstəntiq, ədalətli hakim lazımdır ki, bu tulaları öz məmur sahibləri ilə qarın-qarına bağlayıb ata quyunun dibinə.
P.S Növbəti saylarımızda həmin tulaların adlarını bir-bir yazacağıq. Bizi izləyin.

GUNDEMXEBER.AZ