Tanınmış telejurnalist, aparıcı Günel Gözəlovaya edilən haqsızlıq, həyat yoldaşının həkim səhlənkarlığı nəticəsində ölümlə üzləşməsi və ancaq möcüzə nəticəsində həyatda qalması ictimaiyyətə məlumdur.

Xatırladaq ki, jurnalistin həyat yoldaşı Anar Gözəlov böyrək daşı əməliyyatına girib, 6 saata yaxın davam edən əməliyyatdan sonra cərrahiyyə otağından beyinin ikitərəfli insultu ilə çıxarılıb. Anar Gözəlovun nümayəndəsi qismində çıxış edən Günel Gözəlovanın qaldırdığı iddia əsasında 6 aydan çox davam edən məhkəmə işi ilkin instansiyada tamamlanıb. Nərimanov Rayon Məhkəməsinin hakimi Vüqar Quliyev iddiaçı tərəfin cavabdeh qismində göstərdiyi həkim-uroloq Araz Bayramovu günahsız sayıb.

“Vəkilim Elçin Sadıqov 13 oktyabr 2021-ci il tarixində saat 17.00-da Lənkəran Ağır Cinayətlər Məhkəməsində 1(099)-490/2021 saylı cinayət işi üzrə əvvəlcədən təyin edilmiş məhkəmə iclasında olduğuna görə bizim iddiamız üzrə aparılan məhkəmə iclasında üzrlü səbəbdən iştirak edə bilməyəcəyi ilə bağlı ərizə göndərmiş və iclasın təxirə salınmasını xahiş etmişdi. Nərimanov Rayon Məhkəməsinin hakimi Vüqar Quliyev isə ərizəni qeydiyyata almışdı. Buna baxmayaraq, hakim özü qanunu pozub, məhkəmə iclası keçirib və iddianı rədd edib. Məhkəmə iclasında ekspertiza rəyi ilə razı olmadığımız bildirərək, qanuni hüququmuzdan istifadə edib öz ekspertimizi daxil edərək növbəti ekspertiza barədə vəsatət qaldıracaqdıq. Eyni zamanda bir çox faktları ortaya çıxara biləcək xəstəlik tarixçəsini tələb edəcəkdik. Lakin Vüqar Quliyev məhkəmə iclasında bizim iştirakımız təmin edilmədən qətnamə çıxarıb. Qətnamədə isə bizim iştirakımız barədə heç nə yazılmayıb, izah verilməyib” – deyə, Günel Gözəlova bildirib.

Gundemxeber.az dia.az-a istinadla bildirir ki, uzun illər dövlətə inam və sədaqətlə xidmət edən jurnalist Günel Gözəlova bu qərarı qərəzli hesab edir və Apellyasiya Məhkəməsinə müraciət ünvanlayıb.

Zəruri qeyd: Yaranmış vəziyyətlə bağlı müraciət etdiyimiz tanınmış hüquqşünas Səməd Vəkilov qeyd edib ki, iddiaçı tərəfin üzrlü səbəbdən məhkəmə prosesində iştirak edə bilməməsi ilə bağlı müraciətinə baxılmaması və iddiaçı tərəf olmadan məhkəmənin keçirilməsi məhkəmə işində çəkişməli proses prinsipinin pozulmasıdır. Onun sözlərinə görə, məhkəmənin sədri ya bu prinsipi nəzərə alaraq iddiaçı tərəfin müraciətini əsaslandırılmış qaydada rədd etməli, ya da məhkəmənin çəkişməli proses prinsipi üzrə keçirilməsini təmin etmək üçün prosesi təxirə salmalı idi.

Qeyd edək ki, çəkişməli proses hüququ dedikdə, həm ittiham, həm də müdafiə tərəfinə qarşı tərəfin təqdim etdiyi sübutlar və fikirlərdən xəbərdar olmaq və onlarla bağlı şərh vermək imkanının verilməsi nəzərdə tutulur.

Günel Gözəlova məhkəmə qərarını qərəzli adlandırmasını bir neçə faktla əsaslandırır. Belə ki, 2021-ci il 13 oktyabr tarixində keçirilən məhkəmədə hər şeydən əvvəl iddiaçı tərəfin iştirakı təmin edilməyib. Bundan başqa, Məhkəmə Tibbi Ekspertiza və Patoloji Anatomiya Birliyinin rəyində bir-birini təkzib edən qeyri-müəyyənliklər var. Nəhayət, hakimin dəqiqləşdirmə aparmaq, ədalət prinsipi çərçivəsində qərar vermək üçün şahidlərə müraciət etmək əvəzinə, tələm-tələsik qərar çıxarması sual doğurur.

“Məhkəmə Tibbi Ekspertiza və Patoloji Anatomiya Birliyinin ekspertlərinin rəyində yazılanlar sonda 6 nəfərdən ibarət ekspert qrupunun gəldiyi nəticə ilə bir-birini təkzib edir. Qeyd olunur: “0734579 saylı xəstəlik tarixindən görünür...” Halbuki, iddia tərəfi olaraq bizə belə bir xəstəlik tarixçəsi təqdim olunmayıb, bu sənədi görməmişik. Ümumiyyətlə, dünyada həkimlərlə bağlı heç bir məhkəmə prosesində xəstəlik tarixçəsinin orijinalı məhkəməyə və qarşı tərəfə təqdim edilmədən məhkəmə keçirilmir. Hakim Vüqar Quliyev nədənsə bu nüansı gözardı edib. Nədənsə, hakim əhalinin sağlamlığının qorunması barədə Azərbaycan Respublikası qanununun IV fəsil, maddə 25-də göstərilən “Sağlamlığın vəziyyəti barədə vətəndaşların məlumat almaq hüququ”nu, eyni zamanda xəstəlik tarixçəsinin ən önəmli fakt olduğunu nədənsə unudur. Məhz bu hüquq o xəstəlik tarixçəsinin təqdimatını təmin edir, orda qeyd olunanlarla reallığın nə dərəcə uyğunlaşdığını müəyyən etməyə kömək edir. Bu ziddiyyətli vəziyyəti araşdırmaq üçün müraciət edilən məhkəmə nədənsə şahidlərin varlığını da “unudur”!? Hər yerdə xəstədə 12 saat sonra dissosiativ pozuntunun aşkarlandığı göstərilir. Halbuki xəstəxana personalı və şəxsən mən özüm Anarın əməliyyatdan ayılan kimi anormal vəziyyətini müşahidə etdik. Amma onun bu halını göstərmək üçün Araz Bayramovu heç cür tapa bilmədim. Məhkəmə Tibbi Ekspertizanın ekspert qrupu isə həkim olmaqla yanaşı, yəqin ki ya müstəntiq, ya da falabaxandırlar. Onların rəyini oxuyanda adama elə gəlir ki, həmin dövrdə görünməz bacarıqları ilə baş verənləri müşahidə ediblər. Eyni zamanda gördüklərini də nədənsə yalan yazırlar. Araz Bayramov 12 saat sonra Anarı göstərmək üçün tamamilə başqa klinikadan nevropatoloq tapıb gətirib. Həmin nevropatoloqun təkidlə dediyi və dünyada vacib müayinə olan MRT müayinəsi isə həmin an deyil, 10 gün sonra edilib. Beyinin subarxanoidal qanaxması ən təhlükəli insult növüdür və adətən insanların 50 faizi anında müdaxilə olunmazsa bu səbəbdən həyatını itirir. Eyni zamanda, beyinin digər, ən təhlükəli yarımkürəsində işemik insult olması vəziyyəti daha da qorxulu edir. Dünya səhiyyəsi ən xırda insult problemində belə, xəstəni 40 gün nəzarətdə saxlayır və 1-5 saat ərzində MRT müayinəsi ilə beyinin durumunu müəyyən edir, vacib müdaxilə olunur. Anarda müşahidə edilən problemi isə 12 saat sonra sadəcə nevropatoloq rəyi ilə aydınlaşdırılıb. Müayinə isə ancaq mənim təkidimdən sonra olub. Təəssüf ki, başqa heç nə edə bilmədim. Çünki yeni əməliyyatdan çıxan, durumu ağır olan adamı özbaşına bir klinikadan digərinə köçürə bilməzdim” – deyə, Günel Gözəlova söyləyib.

Ekspertizanın rəyini diqqətlə oxuduqda, dəfələrlə “sənəd çatışmazlığı var” qeydinə rast gəlinir. Sanki Bakıda və Buta Klinikasında yanğın baş verib və sənədlər yoxa çıxıb. Belə olan halda ancaq sənədlərə əsasən qərar qəbul edən bu qurumun hansı haqla həkimi günahsız elan etməsi ciddi sual doğurur. O da qeyd olunur ki, xəstəyə anesteziyaya dair vərəq imzaladılıb. Halbuki, belə bir vərəq yoxdur və yəqin ki, olmayıb. Əks halda bu sənəd məhkəmədə təqdim edilərdi. Günel Gözəlova da belə bir sənəd görmədiyini söyləyir. O, əməliyyat öncəsi imzalanan sənədi təqdim edib. Bu sənəddə isə insult təhlükəsi və anesteziya ilə bağlı bir söz də yoxdur. 

GUNDEMXEBER.AZ