Yəqin ki, bir neçə gün bundan öncə Gundemxeber.az saytında yayımladığımız “İmişlidə RİH-nin başçısı susur, Yavər Şıxəliyev isə “at oynadır” başlıqlı yazıda qeyd olunanlarla bağlı çoxsaylı oxucularımız müəyyən məlumatlar əldə edə bilmişdilər. 

Məqalənin yayımlanmasından sonra tərəfimizdən belə bir məlumat əldə edə bildik ki, bəzi çevrələrdə bu və digər məsələlərlə bağlı müəyyən müzakirələr aparılır, sadalananların baş verib-vermədiyi ciddi şəkildə araşdırılır.

 Bu da onu söyləməyə əsas verir ki, ayrı-ayrı media qurumlarında yayımlan hər bir məqalə, açıqlama və s. aidiyyatı dövlət qurumları tərəfindən diqqətdə saxlanılır. Onu da qeyd edək ki, yayımladığımız  məqalədə əsas nüanslar yerli sakinlərin vaksinasiya olunmaları zamanı verilən dərmanların (Sinovac və Pfizer) heç bir normativ qaydalara əməl olunmadan Hacırüstəmli kənd icra nümayəndəsi Yavər Şıxəliyevə verilməsi, bu şəxsin həmin dərmanları uzaq məsafədən götürüb kənddəki tibb məntəqəsinə çatdırması, sakinlərin ad və soyadlarının portala salınması işlərini icra nümayəndəsinin mühasibi İkram Şıxəliyevin həyata keçirməsi, bu ilin 8 noyabrında hüquq-mühafizə orqanı əməkdaşlarının kənd icra nümayəndəsi Yavər Şıxəliyevi bir sutka, baş mühasib İkram Şıxəliyevi üç sutka, diş texniki işləri ilə məşğul olan şəxsi isə, dörd sutka ərzində saxlamaları, az sonra sərbəst buraxılmaları, sakinlərin vaksinasiya olunmalarını həyata keçirmək üçün MRX-dan Hacırüstəmli kənd tibb məntəqəsinə bir nəfər Göyçək adlı (ad şərtidir) tibb bacısının göndərilməsi, ötən günlərin birində iş saatlarından sonra kənd icra nümayəndəsinin müavini Niyaməddin Cəfərovun tibb bacısına “sancaq saçması” səbəbindən adı çəkilən xanımın  tibb məntəqəsini birdəfəlik tərk etməsi və bir daha iş başına qayıtmaması, bu yöndə baş verən söz-söhbətlərdən Yavər Şıxəliyevin məlumatlı olması, onun müavini Niyaməddin Cəfərova “Səhərdən işə gəlmə” deməsi və s. haqda çatdırılan məlumatlar idi. Düzdür, belə bir məlumatlar redaksiyamıza çatdırıldıqdan sonra, qeyd olunanlarla bağlı məqalə yayımlayıb, yazıda adı çəkilən hər kəsin mövqeyini dinləməyə hazır olduğumuzu da bildirdik. 

Elə ki, əməkdaşımız Hacırüstəmli kənd icra nümayəndəsi Yavər Şıxəliyevlə əlaqə saxlayıb, sadalananlara münasibət bildirməsini xahiş edir, o halda o, “Bilirsiniz, bəzən elə hallar olur ki, kimlərsə  bizim fəaliyyətimizə kölgə salmaq niyyətinə düşürlər. Qeyd edim ki, sakinlərin vaksinasiya olunmaları zamanı verilən dərmanları lazımi normativ qaydalara əməl etmək şərtilə kənddəki məntəqəyə çatdırırıq. Yəni, sizə təqdim etdiyim şüşə qabların foto-şəkillərindən də görünür ki, dərmanlar təlimata uyğun məntəqələrə çatdırılır. Həmin vaxt dərmanlar siyahı ilə qəbul olunur, boş şüşə qablar siyahı ilə təhvil verilir. Sakinlərin vaksinasiya olunmalarını tibb işçiləri həyata keçirirlər. Kəndimiz rayon mərkəzindən uzaq olduğundan vaksinasiya zamanı tibb işçilərinin çatışmazlığı yaranır,  o halda rəhbərliyin verdiyi tapşırıq əsasında diş texniki işləri ilə məşğul olan şəxs iynə vurmaqda deyil, digər məsələlərdə bəzən onlara köməklik göstərir. Mənimlə birlikdə rəhbərlik etdiyim qurumda çalışanlar da, sakinlərin vaksinasiya olunmaları üçün lazımi təbliğat işlərini həyata keçirirlər. İkram Şıxəliyev Hacırüstəmli kənd icra nümayəndəliyində mühasib işləyir. O, yalnız öz işi ilə məşğul olur və heç bir halda sakinlərin ad və soyadlarının portala salınması işlərini yerinə yetirmir. Hacırüstəmli kəndi İmişli rayonunun ucqar kəndlərindən biridir və bizim kəndddə dədə-babadan qalma adət-ənənəyə olduqca önəm verilir. Yəni, kənddə hər kəs bir-birini tanıyır, yerli sakinlərin hər biri kimin hansı əməl və amal sahibi olması haqda məlumatlı olurlar. Əgər kimsə əxlaqımıza, mənəviyyatımıza, adət-ənənəmizə zidd addımını atarsa, o halda hər kəs həmin şəxsi qınayır. Odur ki, biz kəndin rəhbər şəxsləri olaraq təlim-tərbiyə məsələlərinə olduqca diqqət yetiririk, gənclərin sağlam ruhda böyümlərinə, formalaşmalarına çalışırıq. Şəxsən mən bir icra nümayəndəsi olaraq RİH-nin başçısı cənab Elçin Rzayevin, tabe olduğumuz şöbənin səlahiyyətli şəxslərinin verdikləri tapşırıqları lazımi səviyyədə yerinə yetirməyə, kənd sakinlərinə məxsus problemləri aradan qaldırmağa çalışıram. Çünki, bu mənim üzərimə düşən vəzifə borcumdur” deyir.

Düşündürücü hal o olur ki, Hacırüstəmli kənd icra nümayəndəsi Yavər Şıxəliyev əməkdaşımızın ünvanladığı belə bir suala, yəni müavini Niyaməddin Cəfərovun tibb bacısına “sancaq saçması” məsələsinə heç cür aydınlıq gətirmək istəmir. Bu cür yanaşma ortaya çoxsaylı sualların çıxmasına səbəb olsa da, adı çəkilən vəzifə sahibinin susması, əslində bu gün də bizi təəccüb içində qoymaqdadır. Yavər Şıxəliyev belə bir olayla bağlı ünvanlanan sualı cavablandırmaq istəməsə də, biz KİV nümayəndəsi olaraq bu yöndə araşdırmamızı həyata keçirib, məhz bəzi gizlinləri üzə çıxarmağa çalışacağıq. Yəqin ki, o halda hər kəs baş verənlərdən ətraflı məlumatlı olacaq və RİH-nin başçısı cənab Elçin Rzayev, əxlaq və mənəviyyat məsələlərinə sol gözü ilə baxan, həmçinin 2017-ci ildən Hacırüstəmli kənd icra nümayəndəliyində müavin vəzifəsini daşıması Niyaməddin Cəfərovla bağlı lazımi qərarını verəcək. Qarşı tərəfin də mövqeyini dinləyə bilərik.

Mövzuya qayıdacağıq.

 P. S. Hörmətli oxucular! Növbəti saylarımızda müavin müəmması ilə bağlı hər kəsi məlumatlandırmağa çalışacağıq. Bizi izləyin.

GundemXeber.Az