150 ay qabaq məhkəmənin qaziyə verdiyi otaqlar 2 ay qabaq necə satılıb?

Xətai məhkəməsinin 26.05.2009 və 21.06.2011 tarixli 2 qətnaməsi ilə Qarabağ qazisinə verilən Nizami rayonu, Bəhruz Nuriyev -10-dakı əvvəllər 25 saylı Nizami ll Dairə Seçki Komissiyasının yerləşdiyi otaqları borclular Nizami RİH, ƏMDK, Ədliyyə Nazirliyinin Xətai və Nizami icra şöbələrinin mütəşəkkil cinayətkar dəstə şəklində saxta şəhadətnamə ilə ələ keçirib, məhkəmə qərarından 2 il sonra qondarma şəxsin (əvvəl həmin ünvandakı “Kapitalbank”ın Nizami filialının, bank bunu yalanlayanda, 14 yaşlı rayon sakini olmayan uşağın) adına sənədləşdirmələrindən 150 aylıq şikayətlər sonuc vermir ki vermir. Bu gün -02.12.2021-ci ildə Baş prokuror yanında korrupsiyaya qarşı mübarizə baş idarəsinin 161 qaynar xətti şikayəti qeydə alıb, tədbir görüləcəyini bildirib. Bu, son 40 gündə 161 qaynar xəttinin qeydə aldığı 3-cü şikayətdir. Deyəsən, şikayəti yoxlayanda elə korrupsioner məmurla üzləşirlər ki, elə 10 il qabaq olduğu kimi, tədbir görməkdə aciz qalırlar. Əmlakı zəbt edənlər isə otaqlardan çıxmaq fikrində deyillər. Elə düşmənin Qarabağdan çıxmaq istəmədiyi kimi. Nə uluslararası konvensiyalar, nə dövlətin adından çıxarılan məhkəmə qərarları, məmur korrupsionerləri haqqa boyun əydirir. “Dəmir yumruq” görməyincə cənnət Qarabağdan cəhənnəmə yollanmaqdan imtina edən dış düşmən kimi , içimizdəki düşmənin də işğal etdiyi otaqları boşaltmağa “başı gicişir”.

Qarabağ qazilərinin 3 dekabr – Beynəlxalq Əlillər günündə və 10 dekabr - Ümumdünya insan hüquqları günündə piket keçirmək və məhkəmə qərarı ilə otaqlara girmək haqqında 29.11.2021 tarixli xəbərdarlıqları BŞİH-in ictimai -siyasi, humanitar məsələlər və dini qurumlarla iş şöbəsinin müdiri Elmin İmanovun 30.11.2021 tarixli məktubu ilə məqsədəuyğun sayılmayıb. Lap Qarabağ uğrunda savaşa bənzəyir, yenə də mal-mülkümüzü işğal edənlər uluslararası qətnamələri saymadığı kimi , ulusal qətnamələri də heçə sayırlar. Fərq burasındadır ki, BMT 28 ildə 4 qətnamə qəbul etmişdi, Xətai məhkəməsi isə 13 ildə 2 qətnamə. Biz 44 günlük savaşa kimi hər gün, hər ay, hər il yurdumuzu ordumuzun gücü ilə qurtaracağımıza xəbərdarlıq edirdik, indi isə Qarabağ qazilərinin gücü ilə mülkümüzə yiyələnməyi bildiririk. Onda ATƏT “əl – ayağa düşürdü” , məsləhət görmürdü, danışıqlar masasına çağırırdı, indi BŞİH məsləhət görmür, məqsədəuyğun saymır, heç danışıq masasına da çağırmır. Polis , prokurorluq , Ombudsman, dövlət hakimiyyəti orqanları da, elə bil, işğalçılar kimi, bu durumdan razıdırlar, ATƏT -in Minsk qrupu kimi , işğaldan qarınlarını doyuzdurmaq amacı ilə yararlanırlar.

Qarabağ qaziləri BŞİH-ə dekabrın 10-a kimi vaxt veriblər : ya otaqlar könüllü boşaldılmalıdır, ya da on nəfərlik qazi ordusu məhkəmə qərarı ilə işğala son qoyacaq. Ya toxunulmaz mülkiyyət , ya ölüm(süzlük)!

Məğrur Bədəlsoy