Ötən həftə Bakı Ağır Cinayətlər Məhkəməsinin hökmü ilə 11 il azadlıqdan məhrum edilən Mədəni İrsin Qorunması, İnkişafı və Bərpası üzrə Dövlət Xidmətinin keçmiş rəisi Zakir Sultanovun əməlləri ilə bağlı detallar bəlli olub.

Məlumata görə, Zakir Sultanov istintaqa ifadəsində deyib ki, aldığı rüşvətin böyük əksəriyyətini sabiq nazir Əbülfəs Qarayevə verib.

Zakir Sultanov mədəniyyət abidələri və binalarının təmir-tikintisi üçün tenderdə qalib olmaq istəyən şirkətlərdən pul alıb.

Onun sözlərinə görə, aldığı pulları keçmiş nazirin xidməti otağında ona şəxsən təqdim edib. Zakir Sultanovun ifadələrinə əsasən, Ə.Qarayevə verdiyi pulların ümumi məbləği 2,5 milyon manatdan çox olub.

Xatırladaq ki, məhkəmə istintaqı dövründə Zakir Sultanov Əbülfəs Qarayevin məhkəməyə çağırılıb dindirilməsini tələb etsə də, vəsatət təmin olunmamışdı.

Zakir Sultanov törətdiyi əməllər üzrə dövlətə vurduğu 5,3 milyon manat zərərin hamısını ödəyib.

Bəs Zakir Sultanov dövlətə vurduğu zərəri tam ödədiyi halda həbs müddəti azaldılacaqmı və sabiq nazirə rüşvət verməsi sübut olunduğu təqdirdə Əbülfəz Qarayev həbs oluna bilərmi? GUNDEMXEBER.AZ-ın məlumatına görə, hüquqşunas Əsabəli Mustafayev Cebhe.info-ya bildirdi ki, həmin şəxsin dəymiş zərəri qaytarmasının onun cəza müddətinə təsirinə gəldikdə, bu məbləğin nə vaxt qaytarıldığı da əhəmiyyət kəsb edir:

“Belə ki, əgər istintaqdan əvvəl qaytarıbsa, artıq yüngülləşdirici hal kimi tətbiq olunub. Əksinə, əgər sonradan ödənibsə, təzədən o işə baxılmasına inanmıram. Yəqin ki, onun vurduğu böyük zərər var və o zərərin qismən ödənilməsi üçün onsuzda onun korrupsiya yolu ilə əldə etdiyi əmlak, mülkiyyət, pul vəsaiti müsadirə olunacaq. Onsuz da o pul əlindən alınacaq, ona görə təklif edib. Ola bilsin ki, hüquq-mühafizə orqanı ilə həmin şəxs arasında saziş bağlanılıb. Yəni həmin pulu ödə, yenidən baxılacaq, müəyyən miqdarda azaldılacaq.

Hərçənd ki, Azərbaycan qanunvericiliyində istintaq razılaşması, sazişi yoxdur. Bu digər ölkələrdə çox geniş yayılıb. Ancaq praktikada görürsən ki, nəzərə alınır. Məsələn, cinayəti etiraf edir, ittiham tərəfi də az cəza istəyir. Yaxud maddəni yüngülləşdirir. Ola bilsin ki, burada da belə bir razılaşma var ki, sən könüllü qaytar, nəzərə alına bilər.

Qeyd edim ki, bəzən təqsirləndirilən şəxslər maraqlı olurlar ki, dəymiş zərəri ödəsinlər. Çünki zərər ödənilməyənə qədər insan həbsə salına bilməz. Onun işinə müddətin yarısını yatır, təzədən baxırlar, cəzanı dəyişirlər, aşağı salırlar və s. Zərər ödənilməyibsə, bunların heç biri ona tətbiq olunmur. İstənilən halda o məbləğin ödənilməsi onun işini yüngülləşdirən hal olacaq”.

Hüquqşünasın sözlərinə görə, Zakir Sultanov Əbülfəz Qarayevə 2 milyon verdiyini deyirsə, o məsələ ilə bağlı araşdırma aparılmalıdır:

“Çünki ola bilsin ki, həqiqəti deyir. Yaxud həmin məbləği özü mənimsəyib, o pulu qaytarmamaq və ya cəzasını ağırlaşdırmamaq üçün iddia edir ki, 2 milyon manatı keçmiş nazirə verib. Araşdırma aparılıb və sübut olunsa ki, həqiqətən də o pulu ona verib, təbii ki, Əbülfəz Qarayev korrupsiya ilə bağlı məsuliyyət daşımalıdır. Ancaq hər deyiləni də həqiqət kimi qəbul etmək olmaz. Çünki insanın özünün də marağı ola bilər.

Eks-nazirlə bağlı onun qeyd etdiyi məbləğ böyükdür. Ağır cinayətdir, qrup halında olan cinayətdir. Aydın məsələdir ki, rəhbər şəxsin göstərişi olmadan heç kim gedib özbaşına pul yığmaz. Ancaq bunun hüquqi rəsmiləşdirməsi var. Ola bilsin ki, video, yaxud şahidlə sübut olunsun. Əgər iki nəfər arasında olubsa, Əbülfəs Qarayev deyə bilər ki, yalan deyir, özü götürüb həmin pulu, mənim xəbərim yoxdur. İndi istintaq araşdırması gedəcək, o mütləq sübut olunmalıdır. Çox ağır cinayətdə ittihamdır.

Hüququ dövlət qurmaq istəyiriksə, bir nəfərin sözüylə ki, o pulu onun tapşırığı ilə gedib yığmışam, gətirib ona vermişəm, burada digər sübut yoxdursa, bu çətin qəbulediləndir. Nazirin göstərişi olmadan heç kimi bunu etməz, ancaq sübut olmalıdır. Əks təqdirdə sadəcə səhlənkarlıq, vəzifəsini lazımi qaydada icra etməməsi, dövlətə zərər vurması ittihamı ola bilər. Belə bir ittiham mütləq olmalıdır.

Sənin nazirin kütləvi surətdə korrupsiyaya qurşanıbsa, pul yığırdı, heç sənə verməyib özünə götürürdüsə, sən də bununla maraqlanmamısan, buna yol vermisən, səhlənkarlıq etmisənsə artıq cinayət məsuliyyəti yaradır. Ancaq nazirin göstərişi ilə alıb, sonra bir hissəsini ona verdiyini sübut etməlidir”

Gundemxeber.az