Azərbaycan Respublikasında çağrı mərkəzinin başlıca işi vətəndaş məmnunluğunun təmin edilməsinə, korrupsiyaya qarşı mübarizənin gücləndirilməsidir. Gerçəkdə isə vətəndaşlar narazı salınır, zənglər qəbul edilmir. Bu günlərdə PA-nın çağrı mərkəzinin fəaliyyətə başlaması ilə 1111 telefon xəttinin zəngləri qəbul etmədiyi üzə çıxdı. Belə çıxır, ali səviyyədə vətəndaşlar aldadılır, telefon nömrəsi ayrılır, amma operator təyin olunmayıb. Ümumiyyətlə, çağrı mərkəzlərinin effekt vermədiyi söz qonusudur. Texnologiyanın yüksək inkişafı dönəmində vətəndaşlarla operativ bağlantı yaratmaq üçün sosial şəbəkə hesablarından yararlanılması daha məqsədəuyğundur. Telefon nömrələri cavab verməsə də, zənglərə süni qadağa qoyulması iş prinsipinə çevrilsə də, şəbəkə hesablarından yararlananda belə süni qadağalar minimuma enir . Onu da vurğulayaq ki, Prezident Administrasiyasının 2 “votsapp” nömrəsi bir ildən çoxdur istifadəyə verilib. Düzdür, bu nömrələr əks - əlaqə yaratmır, amma istənilən halda müraciətlər zor-xoş avtomatik qəbul edilir. Fikrimizcə, çağrı mərkəzindənsə, belə bağlantı metodlarından yararlanmaq daha doğru olardı. 

Baş prokurorluğun 961 çağrı mərkəzinin yarıtmazlığından, zəngləri qəbul etməməsindən, hətta danışıq olmadığı halda “danışıq haqqı” tutulmasından , deyəsən , “sonuc əldə olunub”. İndi 961 “daim məşğul” rejimindədir. Xatırladırıq ki, bu mərkəz prokurorluq əməkdaşlarından şikayətləri qəbul etmək üçün təşkil olunub. Məsələn 161 qaynar xəttinə şikayətlərin qəbul edilməməsindən, yaxud qəbul edilən şikayətlərə baxılmamasından 961 xidməti yolu ilə baş prokurorluğu bilgiləndirmək olar. Di gəl, xidmət “daim məşğul” rejimindədirsə və ya zəngləri qəbul etmirsə, ümumiyyətlə hansı xidmətdən söz açmaq olar? Baxın, korrupsiyaya qarşı mübarizə baş idarəsinin Rəşad Məmmədov adlı əməkdaşı ƏƏSMN tabeliyindəki Sosial Xidmətlər Agentliyinin sosial xidməti rüşvət xidmətinə çevrirməsindən 161-ə şikayət üzrə 1-ci dərəcəli Qarabağ qazisinin izahatını 2 ildən sonra - 9 sentyabr 2021-ci ildə alıb və. ..7 aydır qəbul etdiyi  (edibsə!) qərarını vermir . Heç bir stasionar nömrə cavab vermir, elektron qaydada müraciətlər isə sonuc gətirmir. Belədə hansı mübarizədən, vətəndaş məmnunluğundan danışmaq olar? 

Məğrur Bədəlsoy