Məktubda qeyd olunub ki, “İş üzrə icraat sonuncu dəfə 13 mart 2019-cu il tarixdə dayandırılsa da, Şirvan Şəhər Prokuroru 01 dekabr 2021-ci il tarixdə həmin qərarı ləğv etmiş və cinayət işi istintaqının davam etdirilməsi üçün, toplanmış iş materiallarını Şirvan Şəhər Polis Şöbəsinin istintaq bölməsinə qaytarmışdır”

Hörmətli gundemxeber.az xəbər portalının çoxsaylı oxucuları! Yəqin ki, bir neçə gün bundan öncə xəbər portalımızda yayımladığımız “Şirvan Şəhər Polis Şöbəsində 16 min manatlıq oğurluq faktı niyə araşdırılmır?- SƏBƏB” və “Cənab Nazir ŞPŞ-nin rəhbərliyinə şiddətli töhmət versə də, problemlər hələ də aşıb-daşır – GİLEY” başlıqlı yazılarla tanış olub, yaşanan olayın mahiyyəti haqda az-çox xəbərdar olmusunuz. Yəni, yayımladığımız yazılarımızda qeyd etmişdik ki, İmişli rayonu, Hacırüstəmli kənd sakini Mehtiyev Dərgah Əhliman oğlunun idarə etdiyi avtomobildən, 27 avqust 2018-ci il tarixdə Şirvan Müalicə Diaqnostika Mərkəzinin qarşısında 16 min manat pul oğurlanır. Həmin gün saat 16:00– da kriminalist tərəfindən avtomobilə baxış keçirilir və 03 sentyabr 2018-ci il tarixdə isə, Şirvan ŞPŞ-nin müstəntiqi Əhməd Baloğlanov, Azərbaycan Respublikası CM-nin 177.2.4 (oğurluq) maddəsi ilə 1802618 №li cinayət işi açır. Bir müddətdən sonra isə bəlli olur ki, aparılan ibtidai istintaq araşdırmaları zamanı müstəntiq Əhməd Baloğlanov, araşdırma işlərini qeyri-peşəkarcasına həyata keçirmişdir. Yəni, o, cinayət işinin mühüm hallarını istintaqdan yayındırmış, üzərinə düşən vəzifə səlahiyyətlərindən istifadə edib, baş verən oğurluq faktı ilə bağlı obyektiv araşdırma aparmamış, hadisə yerinə yaxın ərazidəki müşahidə kamerasına baxış keçirməmiş və digər lazımi addımlarını atmamışdır. Daha sonra da, bu cinayət işi üzrə əsassız qərarlar qəbul olunmuşdur. Elə ki, Şirvan ŞPŞ-də cinayət işinin dayandırılması haqda qərar qəbul olunur, o halda zərərçəkən Dərgah Mehtiyev, 28 noyabr 2018-ci il tarixdə Şirvan Şəhər Prokurorluğuna yazılı ərizə ilə müraciət edir. Şirvan Şəhər Prokurorluğunda “cinayət işinin dayandırılması haqqında” qərarla tanış olduqda, bir çox məqamlar prokurorluq əməkdaşlarına bəlli olur. Hətta, 27 iyun 2019-cu il tarixdə Şirvan Şəhər Prokurorluğundan zərərçəkən Dərgah Mehtiyevə verilmiş № 95M-19 saylı cavab məktubunda qeyd olunur ki, “İstintaq zamanı bir sıra xüsusatlar araşdırılmamış və cinayət işi üzrə icraatın dayandırılması haqqında əsassız qərarın qəbul olunması müəyyən olunmuşdur. Yəni, Dərgah Mehtiyevin avtomobilinə əyləşdirdiyi və ona bələdçilik edən şəxsin şəxsiyyəti müəyyən olunmamış, cinayət əməlini törətmiş şəxsin Şirvan Müalicə Diaqnostika Mərkəzinin ərazisində yerləşdirilmiş təhlükəsizlik kamerasına düşə biləcəyi xüsusatı yoxlanılmamış və həmin gün Diaqnostika Mərkəzində gözətçi olmuş şəxsin şəxsiyyəti müəyyən edilməklə ətraflı ifadəsinin alınması təmin edilməmişdir”. Şirvan Şəhər Prokurorluğu bütün bunları və digər halların varlığını nəzərə alaraq, 29 noyabr 2018-ci il tarixdə “cinayət işinin icraatının dayandırılması haqqında” əsassız qərarı ləğv  etmiş və toplanmış iş materiallarını Şirvan Şəhər Polis Şöbəsinə qaytarmışdır. Qeyd edək ki, Dərgah Mehtiyevin Azərbaycan Respublikasının Baş Prokurorluğuna yazmış olduğu şikayət ərizəsinə isə, 20 dekabr 2021-ci il tarixdə DİO-nin istintaq, təhqiqat və əməliyyat-axtarış fəaliyyətində qanunların icraasına nəzarət idarəsinin rəis müavini, ədliyyə müşaviri cənab Pərviz Əliyev 05/152-18 saylı məktubla cavab vermişdir. Cavab məktubunda qeyd olunub ki, “İş üzrə icraat sonuncu dəfə 13 mart 2019-cu il tarixdə dayandırılsa da, Şirvan Şəhər Prokuroru 01 dekabr 2021-ci il tarixdə həmin qərarı ləğv etmiş və cinayət işi istintaqının davam etdirilməsi üçün, toplanmış iş materiallarını Şirvan Şəhər Polis Şöbəsinin istintaq bölməsinə qaytarmışdır”.

Onu da qeyd edək ki, zərərçəkən Dərgah Mehtiyev redaksiyamıza ünvanladığı müraciətində qeyd edir ki, “Baş verən oğurluq faktı ilə bağlı ötən 44 ay ərzində Şirvan Şəhər Polis Şöbəsində lazımi istintaq araşdırmaları aparılmayıb, oğurluq əməlini törətmiş şəxsin və ya şəxslərin kimiliyi müəyyən olunmayıb. Bugünə kimi əksər dövlət qurumlarına çoxsaylı ərizələr, teleqrammalar göndərsəm də, ayrı-ayrı şəxslərin qəbullarında olsam da, hələ də nəyəsə nail ola bilməmişəm. Bütün bunlara müstəntiq Əhməd Baloğlanov tərəfindən ilkin isintaqın düzgün aparılmaması və digər amillərin varlığı başlıca səbəb olub. Çünki, oğurluq faktı baş verən vaxt istintaq araşdırmaları düzgün aparılsaydı, bəklə də indiyə kimi nəyəsə nail olmaq mümkün olardı. Bu gün hansı dövlət qurumuna müraciət edirəm, o halda qarşı tərəf mənə eyni məzmunlu “Hazırda istintaq araşdırmaları davam etdirilir və cinayətin törədilməsində təqsirləndirilən hər bir şəxs, onun təqsiri Azərbaycan Respublikası CPM-də nəzərdə tutulmuş qaydada sübuta yetirildiyi halda, barəsində qanunla müəyyən olunmuş qaydada tədbirlər görüləcəkdir” deyə  şablom xarakterli məktublarla cavab verirlər və bununla da onlar, sanki öz işlərini bitmiş hesab edirlər. Mən heç cür başa düşə bilmirəm ki, mənə qarşı bəslənilən bu cür ögey münasibətin kökündə hansı amillər durur? Axı, Şirvan Şəhər Prokurorluğu qeyd etdiklərimin çoxunu mənə verdiyi cavab məktubunda açıq-aydın şəkildə qeyd edib. Yəni, istintaq araşdırmaları zamanı Şirvan ŞPŞ-nin müstəntiqi Əhməd Baloğlanovun fəaliyyətsizliyini Şirvan Şəhər Prokurorluğu da təsdiq edir”. Yazıda adı çəkilən hər kəsin mövqeyini dinləyə bilərik.

Mövzuya qayıdacağıq.

GundemXeber.az