GundemXeber.Az saytının 16-01-2023  tarixində “Lənkərandan sanki tanklar keçib...Yerli rəhbərlik və AAYDA yolları Suriyaya döndərib” başlığı altında yazı dərc olunmuşdur. Yazı böyük rezonans doğurduğundan, Lənkəran Rayon İcra Hakimiyyəti mövqe açıqlamalı oldu. Biz də jurnalistika kodeksini əsas tutaraq, peşə borsumuzu yerinə yetirib qarşı tərəfin mövqeyini əl vurmadan olduğu kimi təqdim edirik:

“Lənkəran Şəhər İcra Hakimiyyətini hədəf alan arqumentsiz və köhnə yazıların məqsədli şəkildə yenidən gündəmə gətirilməsi təəssüf hissi doğurur. Heç bir fakta əsaslanmayan fikirləri ictimaiyyətə sırımaq cəhdi hər zamanki kimi fiaskoya uğramağa məhkumdur. 

Dövlət başçısı cənab İlham Əliyevin xüsusi diqqət və qayğısı nəticəsində son illərdə Lənkəranda yol infrastrukturunun inkişafı, yeni yolların salınması və asfalt örtüyünün yenilənməsi, yeni idarə və müəssisələrin tikintisi və əsaslı təmiri həyata keçirilib. Özəl sektorun inkişafı üçün rəqabətli iqtisadi mühit formalaşdırılıb. 

Şəhərin abadlıq və quruculuğu istiqamətində mühüm addımlar atılıb. Belə ki, son 10 ildə ümumi uzunluğu 200 km-ə yaxın 9 yol layihəsi icra edilərək istifadəyə verilib, daha 75,2 km-lik yolun salınması investisiya proqramına daxil edilib. Heydər Əliyev Mərkəzi inşa edilib, vətəndaşların istirahəti üçün 3 istrahət parkı yenidən qurulub. Gənclər mərkəzi,  Bayraq Meydanı və Olimpiya İdman Kompleksi inşa olunub. 350 çarpayılıq Rayon Mərkəzi Xəstəxanasının, Şəhər Mədəniyyət Mərkəzinin, Tarix-Diyarşünaslıq Muzeyinin binaları əsaslı təmir olunub. Rayon prokurorluğu üçün yeni inzibati bina istifadəyə verilib, 28 məktəb binası tikilib, 3 məktəb binası əsaslı təmir olunub, əlil və şəhid ailələri üçün 90 mənzilli 3, evləri qəzalı vəziyyətdə olan sakinlər üçün 100 mənzilli 4 yaşayış binası tikilib. Lənkəran Dövlət Universiteti üçün əlavə 3 tədris korpusu və yataqxana  istifadəyə verilib. 

Bundan başqa, qəzalı vəziyyətdə olan 19 çoxmərtəbəli yaşayış binasında təmir-bərpa, gücləndirmə işləri aparılıb, fasadları rənglənib, 300-dən çox yaşayış binasının dam örtüyü dəyişdirilib. Səkilərə yeni tametlər döşənib, hasar və divarlar ağ layla üzlənib, şəhərin mərkəzi küçələrindən olan Qala Xiyabanı küçəsi yenidən qurulub, sıradan  çıxmış travertin lövhələr sökülərək əraziyə mərmər üzlüklü tamet tavalar döşənib. Lənkəran rayonu üzrə qazlaşma səviyyəsi 95 %-ə yüksəlib, ümumilikdə 47 274 ev təsərrüfatı qazlaşdırılıb. Şəhid ailələri üçün yaşayış binaları istifadəyə verilib. Bundan başqa, evləri qəzalı vəziyyətdə olan sakinlər üçün 3 yaşayış binası tikilib. Yaşayış məntəqələrinin təqribən 70%-ni əhatə edən 9 avtomobil yolu yenidən qurulub. Bununla belə, ümumi uzunluğu 47,5 km və 108 küçəni əhatə edən ərazidə quraşdırılan 2365 işıq dirəyi vasitəsilə şəhərimiz axşam saatlarından etibarən avtomatik şəkildə işıqlandırılır, daha 46 küçədə yeni işıqlandırma sisteminin quraşdırılmasına başlanılıb. Bununla da, şəhərin işıqlandırılmayan küçəsi qalmayacaq. 

Eyni zamanda, 110/35/10 kv-luq Lənkəran-2 elektrik yarımstansiyası istismara verilib, 25 yaşayış məntəqəsinin elektrik təsərrüfatı tamamilə yenidən qurulub. “Azərbaycan Respublikası regionların 2019-2023-cü illərdə sosial iqtisadi inkişafı Dövlət Proqramı” çərçivəsində rayonumuzda özəl sektorun inkişafı da diqqət mərkəzində olub. Belə ki, 2022-ci ildə rayona 21,3 milyon manat özəl investisiya qoyulub. Sahibkarlıq fəaliyyətinin genişləndirilməsi və işsizliyin aradan qaldırılması ilə bağlı 10-a yaxın otel və istirahət mərkəzi, çay və  konserv fabrikləri, 3 düyü emalı və xalçaçılıq müəssisəsi yaradılıb, istehsal gücü ildə 18 min ton olan yeni qənnadı məhsulları fabriki fəaliyyətə başlayıb. 

Rayonumuzda sahibkarlığın inkişaf dinamikası ötən müddət ərzində yüksələn xəttlə artıb. Belə ki, Lənkəran rayonunda  2022-ci ildə  məhsul istehsalı 547 milyon manat olub, bu da 2018-ci illə müqayisədə 22,1 % çoxdur.  Bundan başqa, emal sənayesi eyni dövrlə müqayisədə 3,7 dəfə artaraq 135.6 milyon manat, turizm 5,2 dəfə artaraq 9.2 milyon manat, kənd təsərrüfatı məhsulları isə 16,8 faiz artaraq 137,1 milyon olub. Bütün bunlarla yanaşı, hazırda rayonumuzda iri həcmli layihələrin istirahət və ticarət, o cümlədən uşaq əyləncə mərkəzlərinin, çoxmənzilli yaşayış binalarının tikintisi, habelə kənd təsərrüfatını məhsullarının əkini davam etdirilir. Növbəti ildə  sözügedən obyektlərin istifadəyə verilməsi və yeni kənd təsərrüfatı müəssisələrinin yaradılması nəzərdə tutulub ki, bu da nəticədə çox sayda vətəndaşlarımızın işlə təmin olunmasına şərait yaradacaqdır.

Yuxarıda sadalananlar cənab Prezidentin xüsusi diqqəti sayəsində rayonumuzda görülən işlərin sadəcə kiçik bir hissəsidir. Bəzi media nümayəndələrinin görülmüş işlərə kölgə salmaq istəyi təəssüf doğurur. Lənkəran Şəhər İcra Hakimiyyəti hər zaman bütün media orqanlarına açıqdır, ünvanlanan istənilən məsələnin cavabalandırılmasında maraqlıdır. Bir daha xatırladırıq ki, dəqiqləşdirilməmiş məlumatlar paylaşmaq, cəmiyyətdə çaşqınlıq yaratmaq və dövlət qurumunun nüfuzuna zərər verən əsassız iddiaların məqsədli şəkildə dövriyyəyə buraxılması hüquqi məsuliyyət yaradır.”

https://gundemxeber.az/gundemxeber/77361-lenkerandan-sanki-tanklar-kecibyerli-rehberlik-ve-aayda-yollari-suriyaya-donderib.html

Gundemxeber.Az