İmişli Rayon Qulubəyli kənd sakini Nağıyev Qalib Qaraseyid oğlu tərəfindən Azərbaycan Respublikasının Prezidenti cənab İlham Əliyevə ünvanlanan müraciətin bir surəti də GundemXeber.Az xəbər portalının e-mail poçtuna daxil olub. Şikayət müəllifi İmişli rayon Qulubəyli kənd tam orta məktəbin direktoru Mirsahib Tağıyev və Mil-Muğan Regional Təhsil İdarəsinin müdiri Rəşad Musayev haqqında yazaraq qetd edir ki, “Şikayət ərizələrimdə göstərdiyim faktlar əsasında Mil-Muğan Regional Təhsil İdarəsi tərəfindən İmişli rayon Qulubəyli kənd tam orta məktəbində aparılan yoxlama zamanı məktəb direktoru Mirsahib Tağıyevin yeddi illik fəaliyyəti dövründə çoxsaylı cinayət tərkibli kobud qanun pozuntuları aşkar olunsa da onun barəsində qanunamüvafiq tədbir görülməmişdir. Mil-Muğan Regional Təhsil İdarəsinin müdiri Rəşad Musayev direktor M.Tağıyevin cinayət tərkibli əməllərinin üstünü ört-basdır etmək məqsədilə Əmək Məcəlləsinin 186-cı maddəsinin 2-ci hissəsinin “a” bəndinə əsasən direktora töhmət verilmişdir. Əslində, mövcud vəziyyət  nəzərə alınmaqla “a” bəndi deyil, Əmək Məcəlləsinin 186-cı maddəsinin 2-ci hissəsinin “ç” bəndində göstərildiyi kimi əmək müqaviləsi Əmək Məcəlləsinin 70-ci maddəsinin  “ç” bəndi ilə ləğv edilməliydi.

Müraciətimdə göstərdiyim faktlarla əlaqədar Baş Prokurorluğun surəti mənə ünvanlanmaqla Elm və təhsil Nazirliyinin aparatına göndərilmiş məktubda göstərilir ki, “cinayət əməlləri olan faktların aşkar olunacağı təqdirdə müvafiq sənədlərin hüquqi qiymət verilməsi üçün Baş Prokurorluğa göndərilməsi xahiş olunur”. Belə olan təqdirdə direktorun cinayət tərkibli əməllərini təsdiq edən sənədlər niyə hüquqi qiymət verilməsi üçün Baş Prokurorluğa göndərilmir? 2021-ci ilin əvvələrində Mirsahib Tağıyev İmişli 1 saylı tam orta məktəbində boş qalmış direktor vəzifəsinə görə direktorların diaqnostik qiymətləndirilməsində iştirak etsə də heç bir bal toplaya bilməmişdir. Direktor M.Tağıyev ən adi elementar sualları cavablandırmaq iqtidarında deyildir.

 Bu ilin mart ayının sonlarında həftə ərzində, ayrı-ayrı vaxtlarda Qulubəyli kənd tam orta məktəbində dərs vaxtı şagirdlər arasında  mübahisə yaranmış, nəticədə bir nəfər şagirdin qolu sınmış, digər şagird isə baş nahiyəsindən xəsarət almışdır. Direktor M. Tağıyev baş vermiş hadisə ilə əlaqədar hüquq mühafizə orqanlarına məlumat verməmişdir. Bakı şəhərində xəstəxanada əməliyyat olunan şagirdin həkimi hadisə barədə Daxili İşlər Orqanlarına məlumat vermişdir.

Cinayət tərkibli qanun pozuntularının bir qismi aşağıdakılardır:

1.    M.Tağıyev işlədiyi yeddi il müddətində tədris edilməyən dərnək və fərdi məşğələ saatlarına görə müəllimlərə dövlət büdcəsindən əmək haqqının ödənilməsi, dərs saatlarının diaqnostik qiymətləndirmə nəticələrinə uyğun olaraq bölüşdürməməsi kimi hallar mövcud  olmuşdur.   

2.    Məktəbdə olan vakant boş dərs saatları müəllimlərin işə qəbulu üzrə müsabiqəyə  çıxarılmayaraq müəllimlər arasında bölüşdürülərək qanunsuz olaraq onların dərs saatlarına əlavə olunmuşdur.

3.    İllər keçsə də direktor M. Tağıyevin “sayəsində” məktəbdə dərs jurnalları və proqramlarının mövzularının saatları qətiyyən uyğun gəlmir. Hər müəllim dərs proqramını öz bildiyi kimi tərtib edir, hətta bir çox müəllimlər keçmiş illərin proqramlarından da istifadə edirlər.

4.    Məktəbdə summative qiymətləndirmələr düzgün aparılmır. Müəllimlər özləri hazırlayıb şkaflara yığırlar.

5.    Məktəbə qədər müəssisələrdən isə heç danışmağa dəyməz, heç bir iş yoxdur, olmamışdır. Məktəbin müəllimi də şagirdi də məhz direktor Mirsahib Tağıyev özü olmuşdur.

6.    Məktəbdə şagirdlərin bir qismi dərsə gəlmir. Rayon mərkəzinə müəllim yanına dərs öyrənməyə gedən şagirdlər istisna olmaqla qalanlarının bilik səviyyəsi yox dərəcəsindədir.

7.    Daxil olan inventor və materialların uçotu kitabı və əsas vəsaitlərin qeydiyyat kitabı qəsdən korlanmış, məktəb daxilində inventar və materialların paylanmasının uçotu kitabı isə yoxdur. Xahiş edirəm Maliyyə Nazirliyinin Dövlət Maliyyə Nəzarəti Xidməti tərəfindən məktəbdə yoxlama aparılsın. Xahiş edirəm müraciətim barəsində qanunamüvafiq  tədbir  görülsün.”

Yazıda adıçəkilən şəxslərin də mövqeyini dinləməyə hazırıq.

GundemXeber.Az