İyunun 20-də Dövlət Təhlükəsizlik Xidmətinin (DTX) Qax rayonunda keçirdiyi genişmiqyaslı əməliyyat ölkədə ciddi rezonans doğrurub. Əməliyyat zamanı rayon icra hakimiyyətinin başçısı Musa Şəkiliyev, onun müavinləri və digər vəzifəli şəxslərin saxlanıldığı bildirilib.

İcra başçısı və onunla birlikdə saxlanılanlar rüşvət alma, mənimsəmə, vəzifə səlahiyyətlərindən sui-istifadə və aşmada ittiham olunurlar.
Xatırladaq ki, son illər icra başçılarının ətrafında bu cür genişmiqyaslı əməliyyatlar keçirilmirdi. 2020-ci ildən sonra bu prosesə ara verilmişdi. Buna yenidən start verilməsi növbəti həbslərin olacağını deməyə əsas verir. Necə ki, əvvəlki həbslər də zəncirvari olmuşdu. Ard-arda icra başçıları saxlanılaraq, hakim və prokuror qarşısına çıxarıldı.

İndi düşüncələrə hakim kəsilən sual belədir: Musa Şəkiliyevdən sonra növbədə kim var? Hansı başçının başı dərdə girəcək?

Bu sualların cavabı dəqiq bilinməsə də, gözlər önünə bir neçə icra başçısı gəlir.

İlk sırada isə Qazaxın icra başçısı Rəcəb Babaşovdur. Onu bu cür “şərəf löhvəsində” ilk sıraya çıxaran nə rəqibləridir, nə də bir başqası. Özü və oğludur. Necə?

Ata-oğul Babaşovlar haqda mediada dəfələrlə yazılıb. Deyilənə görə, bu ailə son 9 ildə (Rəcəb Babaşov 2016-cil ildə Qazaxa icra başçısı təyin edilib-red.) həddən artıq varlanıb. Bunu başçının oğlunun sürdüyü maşınlardan, yaşadığı həyatdan görmək mümkündür.

Ötən ilin noyabr ayında Rəcəb Babaşov oğlu Elşən Babaşzadə ilə medianın diqqətinə gəlmişdi. Həmin vaxt yayılan vizual və yazılı məlumatda Elşən Babaşzadənin bahalı maşınlarından, o maşınlara aldığı “göz deşən” nömrələrdən bəhs edilirdi. Elşən Babaşzadə 275 min dollar (450 min manat) dəyərində olan avtomobilinə dövlət nömrə nişanı almaqla gündəm olub. Vergi Xidmətində kiçik məmur olan bir şəxsin belə bahalı əmlakı necə əldə etdiyi suallar yaradır. Yəqin aidiyyatı dövlət qurumlarında şübhələr yaradır…

Bildirilirdi ki, E.Babaşzadə “Mersedes Benz G-63 AMG” markalı maşına 10 LL 077 nömrə nişanını 77 LL 077 ilə əvəzləyib. 77 LL 077 Elşən Babaşzadənin öz adına qeydiyyata alınıb. Təkcə bu fakt Rəcəb Babaşovla bağlı araşdırma aparmaq üçün kifayət edir. İcra başçısı olaraq o, nə edir, hansı qaranlıq işlərə yol verir ki, oğlu 450 min manatlıq maşın sürür? Üstəlik ona qiyməti bir neçə 10 min manatla ölçülən nömrə alır?

Ötən yazıda da qeyd etmişdik, əslində Qazaxın icra başçısı barədə dərhal hüquqi addımlar atılmalıdır. Onun fəaliyyəti ciddi yoxlanmalıdır.

Bütün bunlar indiki vəziyyətdə R.Babaşovu hüquq mühafizə orqanlarının, DTX-nın hədəfinə gətirə bilər. Sadə bir araşdırma ilə Rəcəb Babaşovun fəaliyyətində yol verdiyi qanunsuzluqlar üzə çıxar. Qaxdan sonra növbə Qazaxa çata bilər…

R.Babaşov haqda başqa məlumatlar da var. Deyilənə görə, rayonda xeyli torpaq sahələrini ələ keçirib. Ən yararlı sahələrdə böyük təsərrüfat qurub. Üstəlik keçirilən tenderlərdə özünə yaxın şəxslərin hər dəfə “qalib” gəldiyi deyilir.

Bir başqa məlumat isə budur ki, R.Babaşov tabeliyindəki işçilərlə həddən artıq kobud davranır. Hətta bildirilir ki, onları küçə söyüşləri ilə təhqir edir. Sadə insanlarla, vətəndaşlarla da davranışının yolverilməz olduğu deyilən başçının rəftarının rayonda ciddi narazılıq yaratdığı haqda xəbərlər dolaşır./globalinfo.az)/