Son günlər ölkə vətəndaşları bir çox problemlərlə üz-üzə qaldıqlarını bildirir və tez-tez müstəqil media qurumlarına da üz tuturlar. Bu günlərdə Sabirabad rayonu V. Əhmədov küçəsi döngə 1, ev 33 ünvanında qeydiyyatda olan Mustafayev Yaşar Ağavəkil oğlu gundemxeber.az xəbər portalının redaksiyasına yaşadığı problemlərlə bağlı şikayət məktubu ünvanlayıb.

 Belə ki, o, başına gələn böyük bir haqsızlığı mətbuat vasitəsi ilə Azərbaycan Respublikasının prezidenti cənab İlham Əliyevə, vitse-prezident Mehriban xanım Əliyevaya, Baş Prokuror cənab Kamran Əliyevə,  Elm və Təhsil Naziri cənab Emin Əmrullayevə və Azərbaycan Dövlət İqtisad Universitetinin rektoru cənab Ədalət Muradova çatdırılmasını bildirib.

Yaşar Mustafayev yazmış olduğu şikayət məktubunda qeyd edir ki, "2016-cı ilin fevralında Azərbaycan Dövlət İqtisad Universitetinin müəllimi, həm də “Heba Consulting” MMC-nin rəhbəri Vüsal Quliyev ilə aramızda kredit müqaviləsi imzalanmışdı. Sənəddə 211 min manat göstərilsə də, əslində mən cəmi 170 min manat nağd pul almışdım. Müqavilədə faizsiz yazılsa da, o pulu 4% faizlə hesablamışdı. 10 ay ərzində hər ay  6800 (altı min səkkiz yüz) manat ödəməklə  68000 (altmış səkkiz min) manat ödəməyimə baxmayaraq, işimlə bağlı ölkədən kənarda olduğum müddətdə mənim evim əlimdən alındı. Söhbət Bakı şəhəri, Nərimanov rayonu, Akademik Mirəli Qaşqay küçəsində yerləşən, ailəmin yaşadığı 5 otaqlı, böyük sahəsi olan mənzildən gedir. Vüsal Quliyev məhkəmənin yekun qərarını gözləmədən icraçılarla birgə ailəmi evdən çıxarıb. Daha sonra isə həmin mənzil guya 400 min manat dəyərində qiymətləndirilib, amma hərracda süni şəkildə ucuzlaşdırılıb və 255 min manata elə onun özünə satılıb. Halbuki bu mənzilin bazar dəyəri azı 800 min manatdır.

Mən dəfələrlə demişəm ki, götürdüyüm borcu tam şəkildə ödəməyə hazıram. Amma o, evimi qaytarmaq istəmir. Mənim ailəm isə illərdir kirayələrdə sürünür. Vüsal Quliyev isə açıq-aşkar deyir: “Mənim pulum, şirkətim, arxamda adamlarım var”.

Bir müəllim üçün belə sözlər, belə hərəkətlər ayıbdır. Müəllim cəmiyyətə nümunə olmalıdır, kiminsə haqqını tapdalamamalıdır. Heydər Əliyev demişdi: “Mən dünyada müəllimdən yüksək ad tanımıram”. Mənim evimi əlimdən alan adam isə müəllim adını ləkələyir.

Mən, sadə bir vətəndaş olaraq, cənab Prezidentə və aidiyyəti dövlət orqanlarına müraciət edirəm:

Mənim borcumu tam ödəməklə, mənzilim özümə geri qaytarılsın və milyonların sahibi olan “Heba Consulting” MMC-nin rəhbəri Vüsal Quliyevin bu qanunsuz əməlləri ciddi araşdırılsın."

GundemXeber.Az olaraq, Yazıda adıçəkilən “Heba Consulting” MMC-nin rəhbəri Vüsal Quliyevin də mövqeyini dinləməyə hazır olduğumuzu bildiririk. 

GundemXeber.Az