Proseslər belə davam etsə, “Sədərək”də
də “Binə”dəki kimi aksiya olacaq

“Binə” Ticarət Mərkəzində fəaliyyət göstərən sahibkarlar etiraz aksiyası keçirdi. Səbəb isə kassa aparatları idi. Sahibkarlar kassa aparatına görə onlardan alınacaq pula etiraz edirdilər. Daha doğrusu obyekt sahibləri dövlətə vergi verməyə razıdırlar, ancaq bazar rəhbəri Kəbirə Məmmədovanın təyin etdiyi əlavə pulu vermək istəmirlər: “Əvvəllər gəlib bizə deyirdilər ki, kassa aparatı lazım deyil, siz əlavə pul verəcəksiniz biz də vergi məsələsini həll edəcəyik. İndi kassa aparatı qoyurlar, ancaq yığılan pulu da tələb edirlər. Biz də bununla razı deyilik”.
Buna görə də yanvarın 19-da yüzlərlə sahibkar etiraz aksiyası keçirdi. Aksiya zamanı ticarətçilərin üzərinə qoşun yeridildi. Polislər rezin güllələrdən istifadə edərək onlarla satıcıya xəsarət yetirdi.
Bundan başqa aksiya zamanı 100-dən artıq adamın həbs olunaraq Qaradağ rayon polis idarəsinə aparılıblar. Axşam saatlarına kimi onların bir qismi cərimələnərək sərbəst buraxılsa da, 12 nəfər həbs edildilər.
Saxlanılan 12 nəfərin Səbayel Rayon Məhkəməsində keçirilən məhkəmə prosesi zamanı hakim 12 nəfərə hökm oxuyub. Məhkəmənin qərarı ilə Malik Məhərrəmov, Nicat Paşayev, Əbülfəz Əliyev, Samir Zeynalzadə, Səid Ədilov, Məhəmməd Mürsəliyev, Elnur Əliyev, Samid Hüseynov, Qüdrət Kişiyev, Vaqif İbrahimov və iki nəfərə 2 ay həbs cəzası verilib.
Aksiya ilə bağlı Bakı şəhər Prokurorluğu və Baş Polis İdarəsi birgə məlumat yayıblar. Məlumatda qeyd olunub ki, yanvarın 19-da Qaradağ rayonu ərazisindəki «Binə» Ticarət Mərkəzində fəaliyyət göstərən bir qrup sahibkar mərkəzin rəhbərliyi tərəfindən əlavə ödənişlərin tətbiqinə etiraz olaraq Bakı-Astara magistralının ticarət mərkəzinin yaxınlığından keçən hissəsini bağlamağa cəhd göstərib.
İctimai qaydanın pozulmasına yönələn hərəkətlərin dayandırılması barədə xəbərdarlığa məhəl qoymayan aksiya iştirakçıları polis əməkdaşlarına qarşı həyat və sağlamlıq üçün təhlükəli olan zor tətbiq etməklə müqavimət göstəriblər. Nəticədə, 10 əməkdaşa müxtəlif dərəcəli bədən xəsarətləri yetirilib, bir neçə xidməti avtomobilə isə ziyan vurulub.
Faktla bağlı Bakı şəhər Prokurorluğunda Cinayət Məcəlləsinin 221.3 (xuliqanlıq) və 315.2-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə cinayət işi başlanıb, istintaq aparılır.
“Azadlıq”a daxil olan məlumata görə, dünən hüquq-mühafizə orqanlarının əməkdaşları ticarət mərkəzində olub, reyd apararaq bir neçə ticarətçini nümayişkaranə şəkildə saxlayaraq aparıblar.
Məlumatda o da deyilir ki, ticarətçilərin etirazına səbəb olan əlavə ödəniş tələbi qüvvəsində qalır. Ticarət mərkəzinin sahibəsi Kəbirə Məmmədovanın adından ticarətçilərə bildirilib ki, tələb olunana məbləğ yanvarın 25-nə qədər ödənilməlidir.
Qeyd edək ki, “Binə”də olan analoji problem “Sədərək”də də baş verib. Sözügedən ticarət mərkəzinin də sahibi sahibkarlardan kassa aparatı quraşdırılandan sonra bu adla onlardan yığılan əlavə alınmasın. Beş gün Yanvarın 17-də “Sədərək” sahibkarları da etiraz aksiyası keçirmişdilər. Dünən isə sahibkarların oturaq aksiya keçirəcəyi haqda məlumatlar dolaşmışdı. Məlumatda deyilirdi ki, satıcılar “Binə”dəki satıcılar kimi səhər saat 9-da aksiya keçirməyi planlaşdırılar. Deyilən saatın tamamında “Sədərək”də idik. Bəzi dükanların qapısı qıfıllı, bəziləri isə açıq idi. Satıcılar söhbət zamanı dedilər ki, hakimiyyətin “Binə”də etdiyi repressiya aparatı camaat da xof yaradıb: “Əslində, biz bu gün (dünən-red) aksiya keçirməli idik. Ancaq “Binə”də satıcıların başına gətirlənlər, rezin güllələrlə onlara atəş açmaq, həbs etmək, polis idarəsində döymək və bir neçə nəfərə cinayət işi qaldırmaq bəzi adamları geri çəkilməyə məcbur edib. Hər yer nəzarətdədir. Mülki geyimli polislər bazarlarda dolaşır, satıcıların ağızlarını arayırlar. Ona görə də insanlar narahatdırlar. Ancaq proseslər belə davam etsə, “Sədərək”də də “Binə”dəki kimi aksiya olacaq”.
Qeyd edək ki, “Sədərək”də kassa aparatları ilə bağlı mübahisələr bir neçə aydır davam edir. Bazar rəhbərliyi kassa aparatlarından istifadə etməyə mağaza sahiblərini 400 manat cərimə edir. Onların sözlərinə görə, bazar rəhbərliyi sahibkarlardan müxtəlif adlarla pul yığır.
“Binə”dəki olayla bağlı siyasi partiyalar – AXCP, Müsavat, AMİP, QHT-lərdən – “Demokratiyanın İnkişafına Kömək”,
“İnsan Hüquqları üzrə Maarifləndirmə” İctimai Birlikləri bəyanat yayımlar. Sözügedən qurumlar ticarətçilərə qarşı polis davranışı, siyasi hakimiyyətin qanuni haqlarını tələb edənlərə qarşı repressiya əl atmasını pisləyiblər.
Ramin Deko