Hesabat dövründə səhm bazarının bütövlükdə nisbi azalması baş verib

Səhmlərin ilkin yerləşdirilməsi bazarında dövlət sektorunun fəallığının, həmçinin Azərbaycan İpoteka Fondunun istiqrazlarının dövriyyəsinin azalması 2012-ci ildə korporativ qiymətli kağızlar bazarına mənfi təsir göstərib. Bazarın həcmi 38%, bağlanmış əqdlərin sayı 1,6% azalıb. Ötən il səhmlərin kütləvi və qapalı yerləşdirilməsinin həcmi 506,7 mln. manat təşkil edib. Bu 2011-ci ildə olduğundan 48% azdır.
Xatırladaq ki, 2011-ci ilin sonuncu ayında iri dövlət müəssisəsi tərəfindən səhm bazarında 824,6 milyon manat həcmində (səhm bazarının 80 faizi) yerləşdirmənin həyata keçirilməsi ötən illə müqayisədə hesabat dövründə səhm bazarının bütövlükdə nisbi azalmasına səbəb olub.
Qiymətli Kağızlar üzrə Dövlət Komitəsinin məlumatına görə, 2012-ci ildə özəl sektor kapital bazarından 186, 4 mln. manat cəlb edib ki, bu da əvvəlki ildə olduğundan 24,4% çoxdur. Təkrar səhm bazarının həcmi il ərzində iki dəfə artaraq 92,5 mln. manat təşkil edib. Ümumilikdə, səhm bazarı (599,3 mln. manat) 42% azalıb.
Qeyd etmək lazımdır ki, qiymətli kağızlarla əqdlərin 95%-dən çoxu səhmlərin, o cümlədən təkrar səhm bazarının (84%) payına düşür. Borc qiymətli kağızlar bazarının həcmi (729,4 mln. manat) 2011-ci illə müqayisədə üçdə bir hissədən çox azalıb. Yerləşdirilmiş korporativ istiqrazların həcmi (71 mln. manat) % azalıb.