Ötən il ƏƏSMN-in tikinti işlərinə ayrılan 85 milyon
manatın xərclənməsində ciddi nöqsanlar aşkarlanıb

Əmək və Əhalinin Sosial Müdafiəsi Nazirliyi (ƏƏSMN) ətrafında son günlər o qədər də xoşagəlməyən söhbətlər dolaşmaqdadır. Məlumİsmayıllı hadisələrindən sonra nazir Füzuli Ələkbərova düşmən olan qüvvələr bu kartdan necə lazımdısa istifadə etməyə başlayıblar. Qeyd edək ki, İsmayıllıda nazir oğlunun və qohumlarının törətdiyi özbaşına əməllər nəticəsində insident yaşanmışdı. Baş verən olaylardan sonra rayonun icra başçısı, nazirin qardaşı Nizami Ələkbərovun vəzifədən azad edilməsi məsələsi də gündəmə gəldi. Hadisələrin bir qədər sakitləşməsi, etirazların yatışması icra başçısının vəzifəsinə olan təhlükəni sovuşdurdu.

Büdcədən talanan milyonlar

Amma nazirin gələcək karyerası haqqında bunları demək olmaz. Ona görə ki, İsmayıllı hadisələrini əlində “kozır” edən bəzi maraqlı qüvvələr naziri seçkiyə qədər vəzifədən uzaqlaşdırmaq istəyirlər. Əslində, ƏƏSMN rəhbərinin işdən çıxarılması müsbət addım olardı. Belə ki, F.Ələkbərov nazir işlədiyi illər ərzində rəhbəri olduğu sistemi irəliyə apara bilməyib.
Yadınızdadırsa, ötən il Hesablama Palatası nazirliyi yoxlayarkən ciddi nöqsanlar üzə çıxarmışdı. Bu nöqsanlar əlil və şəhid ailələri üçün tikilmiş mənzillərin bölüşdürülməsi ilə bağlı idi. Hesablama Palatasının apardığı yoxlamaları nəzərdən keçirən nazirə müxalif qüvvələr ƏƏSMN-in apardığı tikinti işlərini əməlli-başlı araşdırmağa başlayıb. Məlumunuz olsun ki, ƏƏSMN xəttilə hər il Qarabağ müharibəsi əlillərinə və şəhid ailələrinə yaşayış binaları inşa olunur. Bu evlərin paylanması zamanıədalətsizlik edilməsi çoxlarına bəllidir. Faktlar belə deməyə əsas verir ki, nazirliyin apardığı tikinti işlərində mənimsəmə nisbəti yarıdan da artıqdır. Əldə etdiyimiz məlumata görə, 2012-ci ildə qurumun tikinti büdcəsi 85 milyon manat təşkil edib. Adi riyazi hesablamalar göstərir ki, bu rəqəmin ən azı yarısı korrupsiyanın yeminə çevrilib. Məlumata görə, nazirliyin tikdiyi 96 mənzilli binalar 7 milyon, 36 mənzilli binalar isə 3,5 milyon manata sənədləşdirilib. Şəhid ailələri və əlillər üçün tikilən fərdi evlər isə 75 min manata başa gəlib. 96 mənzilli binanın 7 milyon manata sənədləşdirilməsi o deməkdir ki, hər mənzil 72 min 900 manata başa gəlib. Orta hesabla hər mənzilin 80 kvadratmetr olduğunu götürsək, deməli, bir kvadratmetr 1000 manata sənədləşdirilib. Halbuki, keyfiyyətli təmirlə birlikdə nazirliyin tikdiyi binalarda kvadratmetrin 300-350 manatdan baha başa gəlməsi mümkün deyil. Bu onu göstərir ki, 85 milyonluq tikinti büdcəsinin böyük hissəsi nazir və ona yaxın olan adamlar tərəfindən harasa sərf olunub. Ehtimal olunan varianta görə, nazir tikintiyə ayrılan pulların bir hissəsini Çexiyada tikdirdiyi villasına yönləndirib.

“Çıraq”ın qaranlıqları və döyülən oğul

İsmayıllıda yanvarın 23-də xalq üsyanı nəticəsində Əmək və Əhalinin Sosial Müdafiəsi (ƏƏSMN) naziri, rayonun kuratoru (Oxu qeyri-rəsmi sahibi-müəll) Füzuli Ələkbərova dəyən maddi ziyanı, belə görünür ki, Azərbaycan xalqı ödəyəcək. Hər halda azpolitika.info-ya daxil olan məlumatlardan belə nəticə çıxır.
Bu haqda bir qədər sonra danışacağıq. Hələlik İsmayıllı üsyanının əks-sədasının üzə çıxardığı son dərəcə ilginc bir məlumata diqqət edək. Məlum olduğu kimi, İsmayıllı ixtişaşları zamanı yerli əhalinin əsas qəzəb hədəfi olaraq yandırılan «Çıraq» hotelinin nazir Füzuli Ələkbərovun oğlu Vüqar Ələkbərova məxsus olduğu rəsmi sənəd və açıqlamalarla öz təsdiqini tapıb. Baxmayaraq ki, ilk günlərdə İsmayıllının icra başçısı, Füzuli Ələkbərovun qardaşı Nizami Ələkbərov, yumşaq desək, 9 milyonluq xalqın qarşısında yalan danışmış, bildirmişdi ki, otelin onun yaxınları ilə heç bir əlaqəsi yoxdur və ümumiyyətlə, obyektin kimə məxsus olduğunu bilmir.
Lakin bir neçə gün sonra aydınlaşdı ki, «Çıraq» hoteli rəsmi sənədlərdə «VAFİ Region» MMC-nin subyekti kimi qeydiyyatdan keçib. «VAFİ Region» MMC isə bir başqasının yox, elə Füzuli Ələkbərovun oğlu, Cüdo Federasiyası İcraiyyə Komitəsinin üzvü Vüqar Ələkbərovundur. Federasiyanın vitse-prezidenti Elnur Kələntərli APA-ya açıqlamasında bildirdi ki, “Çıraq” hoteli V.Ələkbərovun şəxsi mülkiyyəti olub, ancaq 2011-ci ildən başqasına icarəyə verilib. Onun sözlərinə görə, hotelin necə işlədilməsi, qiymətlərin qoyulması məsələsinin Vüqar Ələkbərova heç bir aidiyyəti yoxdur. Amma çoxsaylı mənbələr bu açıqlamanın reallıq dərəcəsini şübhə altına alırlar və təsdiqləyirlər ki, İsmayıllı üsyanının əsas səbəbkarı elə Vüqar Ələkbərovdur. Belə ki, sərxoş halda qəza törətdikdən sonra ismayıllıları təhqir edən, beləliklə də xalq üsyanına səbəb olan V.Ələkbərov o qədər möhkəm döyülüb ki, hələ də cəmiyyət arasına çıxa bilmir.
Maraqlıdır ki, İsmayıllı üsyanına qədər, mətbuat və cəmiyyət F.Ələkbərovun oğlunun varlığı və onun biznes fəaliyyəti haqda məlumatsız idi. Amma sən demə, V.Ələkbərov nəinki bizneslə məşğul olur, hətta onun «VAFİ Region»MMC-si dövlət sifarişlərində əməlli-başlı pay sahibidir. Söhbət Əmək və Əhalinin Sosial Müdafiəsi Nazirliyinin keçirdiyi tenderlərdə «VAFİ Region» MMC-nin, yəni nazirin oğlunun şirkətinin iştirakından və milyonluq layihələri «udmasından» gedir.

Nazir oğlunun korrupsiyaları

ƏƏSMN-dəki etibarlı mənbələrdən verilən məlumata görə, nazirliyin tikinti sahəsində elan etdiyi bir sıra iri layihələri məhz «VAFİ Region» MMC alıb. Xüsusən də Qarabağ müharibəsi əlilləri üçün yaşayış binalarının tikilməsi üçün elan olunan tenderlərin qalibi nazir oğlunun şirkəti olub.
Söhbət sözün əsl mənasında böyük maxinasiyalardan, büdcə talanından gedir. Bir misal: bizə verilən məlumata görə, ƏƏSMN 9 mərtəbəli, 96 mənzilli binanın tikintisi üçün «VAFİ Region» MMC-yə 12 milyon manat ödəmə həyata keçirib! Bu o deməkdir ki, bir mənzil orta hesabla 125 min manata başa gəlib. Şişirtmə 4 dəfədən də artıqdır!
Yeri gəlmişkən, «VAFİ Region» MMC-nin ƏƏSMN-in keçirdiyi tenderlərdə iştirakı məsələsinə aydınlıq gətirmək üçün bu gün nazirliyin mətbuat xidməti ilə əlaqə saxladıq. Xidmətin rəhbəri İlham Məmmədov bu haqda heç bir məlumata malik olmadığını deməklə kifayətləndi.
Bu haqda daha ətraflı yaxın günlərdə xüsusi araşdırmada oxuyacaqsınız, hələlik qayıdaq yazının girişində bəhs etdiyimiz məsələyə - İsmayıllı üsyanına görə nazirə dəyən zərərin necə və kim tərəfindən ödəniləcəyinə.

Sosial talanma

Bizə verilən məlumata görə, çox böyük ehtimalla bu ziyanı və daha artığını Azərbaycan xalqının ƏƏSMN-dən asılı olan kontingenti, yəni pensiyaçılar, əlillər, yoxsullar və digərləri ödəyəcək. Məsələ ondadır ki, İsmayıllı üsyanından sonra nazirliyin öz strukturlarına qoyduğu aylıq haqq düz iki dəfə artırılıb!
Mənbə ƏƏSMN-dəki hazırki vəziyyəti - rüşvət tariflərini qısa tezislər formasında aşağıdakı kimi təqdim edir:
- Əlillik arayışı - 1000 manat
- Təkrar əlillik arayışı - 200-1000 manat (Pensiyanın məbləğindən asılı olaraq)
- Ömürlük pensiya - 1500 manat (Təkcə nazirliyə çatan hissə)
Ünvanlı yardım - 300 manat (Hər təyindən nazirliyə çatan hissə)
- İnternat və qocalar evləri - Ayrılan vəsaitin 35 faizi
- VTEK (Tibbi-Sosial Ekspert Komissiyası) rəhbəri - 100-200 min manat və sairə.
Mənbə bildirir ki, ƏƏSMN-in «qara kassası» hazırda da nazirliyin Aparatının rəhbəri Elnur Kələntərlidir. Alış-veriş məsələlərində onun «sağ əli» isə Ramin adlı köməkçisidir.
Beləliklə günün sualı: Füzuli Ələkbərov Quba üsyanında ziyanla, yoxsa xeyirlə çıxdı?...
Nazir kimi özünü heç cür doğrulda bilməyən F.Ələkbərov indi də fond yaratmaq sevdasına düşüb. Digər nazirliklərin tabeliyində fond, xidmət və agentliklərin olduğunu həzm edə bilməyən nazir Sosial Dəstək Fondunun yaradılması üçün yuxarılara təklif verib. Guya aztəminatlı ailələrin tam aktiv dövlət dəstəyi ilə təmin edilməsi üçün nazirlik yanında bu fonda ehtiyac var. Hazırda Sosial Dəstək Fondunun yaradılması ilə bağlı təklif hazırlanıb. Bu ildən fondun fəaliyyətə başlaması üçün müvafiq işlər aparılacaq. Hesab edirik ki, ƏƏSMN özü mövcud olduğu halda, əlavə bir quruma ehtiyac yoxdur. Fondun yaradılmasının yalnız bir məqsədi var. Ki, bu da nazirin yeni gəlir yeri əldə etmək istəyi ilə bağlıdır. Məlumata görə, fond yaradılsa belə, F.Ələkbərov onu görə bilməyəcək. Çünki seçkiyə qədər yuxarı dairələr onu sıradan çıxaracaqlar.