Azad Rəhimov və Olumpiya Komitəsi hərəkətə keçib

gundemxeber.az Dekabrın 8-də Avropa Olimpiya Komitəsi 2015-ci ildə birinci Avropa Olimpiya Oyunlarının Bakıda keçirilməsi ilə bağlı qərar qəbul edib. Bakıda Avropa Olimpiya oyunları ilə bağlı Olimpiya şəhərciyi salınacaq. 2015-ci iləcən Bakıda yeni idman qurğuları da quraşdırılacaq. Bunu İdman və Gənclər naziri Azad Rəhimov dekabrın 12-də keçirdiyi mətbuat konfransında deyib: «Olimpiya şəhərciyi məsələsi də öz həllini tapacaq. Bu məqsədlə Heydər Əliyev prospektində Koroğlu metrostansiyasının yaxınlığında yerləşən binaların Olimpiya Oyunları üçün təmir olunaraq, idmançıların ixtiyarına verilməsini nəzərdə tuturuq. Orada müxtəlif lazımi qurğular, yeməkxanalar, istirahət mərkəzləri və s. də quraşdırılacaq. Bu qurğuların bəziləri, məsələn, çimərlik voleybolu üçün qurğular müvəqqəti olaraq tikiləcək və Olimpiya Oyunlarından sonra həmin qurğular ya söküləcək, ya da icarəyə veriləcək».
Azad Rəhimov həmçinin bildirib ki, Azərbaycan Olimpiya oyunlarına ev sahibliyi etməkdən təxminən 120-130 milyon avro qazanacaq: «Avropa Oyunlarının bütün yayım hüquqları Azərbaycana məxsusdur. Avropa Olimpiya Komitəsinin təklifi ilə bu hüquqları Avropa Yayım Şurasına satacağıq». Nazir Avropa Oyunlarının keçirilməsi üçün müvafiq infrastrukturun mövcud olduğuna diqqət çəkərək, oyunların təşkili üçün çəkiləcək xərclərin çox da yüksək olmayacağına inandığını vurğulayıb.
Milli Olimpiya Komitəsinin (MOK) vitse-prezidenti Çingiz Hüseynzadə isə bildirib ki, Avropa Oyunları Azərbaycana bir çox cəhətdən faydalı olacaq: “Bunun üçün lazımi infrastruktur yaradılmalıdır. Oyunları keçirmək üçün qanunvericilik ümumdünya standartlarına uyğunlaşdırılmalı, Bakının nəqliyyat sistemi yenidən qurulmalıdır. Biz təşkilatçı ölkə kimi bütün növlərdə iştirak etmək hüququna malikik. Olimpiya Oyunları keçirilən şəhərdə həmişə fərq hiss olunur. Digər tərəfdən, 2017-ci il İslam Həmrəylik Oyunları da Azərbaycanda keçirilə bilər. Düzdür, bu barədə hələlik rəsmi təsdiq almamışıq. Bu qərarın yayda verilməsi gözlənilir. Ümid edirəm ki, İslam Oyunları da Bakıda keçiriləcək. Avropa Oyunlarının təşkili İslam Oyunlarının keçirilməsini asanlaşdıracaq. Çünki mahiyyət etibarilə bunlar eyni tədbirlər olacaqlar. Bir çox məsələlərdə hər iki tədbir üçün hazırlıq işləri görəcəyik. Məsələn, könüllülər, idman qurğuları, akkreditasiya hər iki tədbir üçün keçərli olacaq. Əminəm ki, Avropa Oyunlarından sonra Bakı yeni həyata qədəm qoyacaq”.
Çingiz Hüseynzadə Avropa Olimpiya Komitəsinin İtaliyanın paytaxtı Romada keçirilmiş konqresindəki səsvermədən öncə Ermənistan tərəfinin yenə adəti üzrə davrandığını bildirib: “Ermənistan Olimpiya Komitəsi səsvermədə iştirakdan imtina etdi. Nəticədə səsvermədə 49 olimpiya komitəsindən 48-i iştirak etdi. Amma bu, Avropa Oyunlarında Ermənistanın iştirak etməyəcəyi anlamına gəlmir. Buna özləri qərar verəcəklər, biz də bütün iştirakçıların təhlükəsizliyinə təminat verəcəyik”.
Avropa Oyunlarının əhəmiyyətinə toxunan MOK rəsmisi bildirib ki, bu tədbirin Azərbaycana həvalə olunması gələcəkdə Yay Olimpiya Oyunlarının da Bakıda təşkili üçün gözəl zəmin yaradıb: “Bizə əvvəllər tutulan yeganə irad ölkəmizdə kompleks yarış təcrübəsinin olmamasına dair idi. İndi isə belə bir irad səsləndirmək mümkün olmayacaq. Digər tərəfdən, Patrik Hikkinin fikri var ki, Avropa Oyunlarından Yay Olimpiya Oyunlarına lisenziya verilsin”.
Qeyd edək ki, Avropa Oyunlarının konkret tarixi hələ müəyyənləşməyib. Amma artıq indidən tədbirin 2015-ci il iyunun ikinci yarısında olacağı dəqiqdir. 2015-ci ildə gənclər arasında Avropa Olimpiya Festivalı da keçirilməlidir. Tarixlərin toqquşmaması üçün Avropa Oyunlarının iyunda keçirilməsi qərara alınıb. Bakıdakı hava şəraiti də iyun üçün daha əlverişlidir.
Vasif