Baş bankir haqda yeni səs-küylü məlumatlarMərkəzi Bank rəhbərinin İpoteka Fonduna bina almaq adı ilə külli miqdarda büdcə vəsaitini mənimsədiyi bildirilir; bu korrupsiya əməliyyatında "Odlar yurdu" universitetinin rəhbəri Əhməd Vəliyevin və onun kürəkəni, “Muğanbank”ın rəhbəri Elmir Mehdiyevin də adları hallanır
Azərbaycan məmurlarının adlarının tez-tez korrupsiya qalmaqallarında hallanması az qala adi hala çevrilib. Xüsusilə də iqtisadi sahələrə rəhbərlik edən yüksək vəzifəli məmur təbəqəsi dövlətin, xalqın pulunu misli görünməmiş bir acgözlüklə talayır. Bizim məmurların korrupsiya əməlləri ölkəmizin sərhədlərini çoxdan aşıb. Artıq Azərbaycan hakimiyyətində təmsil olunan ayrı-ayrı nazirlərin, sahə rəhbərlərinin talançılığı, korrupsiya əməlləri dünya mediasının gündəminə daşınıb.
İndiyədək ABŞ, Böyük Britaniya, Almaniya, İtaliya, Fransa, Türkiyə, Rusiya və s. ölkələrin nüfuzlu qəzet, jurnal və telekanallarında bu haqda araşdırma məqalələr çap olunub, verilişlər gedib.
Düzdür, Azərbaycan tərəfi hər dəfə bu məlumatları təkzib edir, bunları “ölkəmizin inkişafını gözləri götürməyən xarici qüvvələrin böhtanı” adlandırır. Lakin fakt faktlığında qalır, artıq bizim məmurların talançılığı bütün dünyaya yayılıb, bir sözlə məşhuri-cahan olmuşuq.
Yeri gəlmişkən, nazirlərimizin korrupsioner əməlləri haqqında son illər ən detallı bilgiləri məşhur “WikiLeaks” saytı yaydı. ABŞ diplomatlarının gizli yazışmalarını ələ keçirən sayt həmçinin Azərbaycan iqtidarındakı bir sıra qüdrətli nazirlərin mal varlıqlarını, siyasi iddialarını, həyat tərzlərini detallı şəkildə ictimaiyyətə bəlli etdi. Bizlər indiyədək az informasiyalar vasitəsilə əldə etdiyimiz bilgiləri “WikiLeaks”ın sayəsində xeyli genişləndirə bildik... Anladıq ki, bir sıra nazirlər, komitə sədrləri təsəvvür etdiyimizdən də artıq dərəcə korrupsioner imişlər və xalqın, dövlətin malını, pulunu daha geniş planda talayırmışlar...

***

Adı tez-tez korrupsiya qalmaqallarında hallanan məmurlardan biri də Mərkəzi Bankın prezidenti Elman Rüstəmovdur. Uzun illərdir ölkəmizin bank sektoruna rəhbərlik edən E.Rüstəmov heç vaxt barəsində səslənən bu ittihamları təkzib və ya təsdiq etməyib. Onun bu sükutunu “Susmaq razılıq əlamətidir” atalar sözü ilə yozmaq olar. Amma kim öz ayranına turş deyər, hansı məmur xalqdan oğurladıqlarını boynuna alar? Ən əsası, bu cür etiraf həm də cinayət məsuliyyəti yaradır axı. Təbii ki, E.Rüstəmov bu mövzuda danışsa özünü “aydan arı, sudan duru” elan edər. Fəqət ortada olan faktlar, informasiyalar, bu günə qədər Mərkəzi Bank rəhbəri haqda yazılan silsilə məqalələr tamam başqa mətləblərdən xəbər verir.

***

Təxminən iki ay öncə “Yeni Müsavat” qəzetində “Mərkəzi Bank rəhbəri necə sındırıldı” başlıqlı manşet yazısı dərc olunmuşdu. Həmin yazıda E.Rüstəmov haqda bank sektorundakı mənbələrə istinadən son dərəcə maraqlı və sensasion sayıla biləcək məlumatlar vardı. Yazıda E.Rüstəmovla Azərbaycan Beynəlxalq Bankının rəhbəri Cahangir Hacıyevin son dövrlərdəki münasibətlərindən bəhs edilirdi. Bildirilirdi ki, son vaxtlar E.Rüstəmov C.Hacıyevdən qorxmağa başlayıb, onu özünə patron sayır. Bu məlumatlar kifayət qədər mötəbər mənbələr tərəfindən redaksiyamıza ötürülmüşdü.
Həmin məqalədən bəzi sitatlar:
“Hazırda Azərbaycanın bank sektorunu Cahangir Hacıyev fırladır. Bank sistemində indi belə bir yarızarafat-yarıciddi deyim yaranıb ki, Elman Rüstəmov Cahangir Hacıyevin patronajlığı altında Mərkəzi Bankın sədri vəzifəsində işləyir. Həqiqətən də E.Rüstəmov deyilən vəziyyətdədir. O, Cahangir Hacıyevi özünün rəhbəri, böyüyü kimi qəbul edir. Onun bir sözünü iki eləmir, edə bilmir. Hətta bir çox məsələlərdə Hacıyevdən məsləhət alır, onun tapşırıqlarını qeyd-şərtsiz icra edir”.
Məlumat qaynağı Rüstəmov-Hacıyev münasibətləri haqda olduqca sensasion bir məlumat da verdi. Mənbənin iddiasına görə, mərhum prezident Heydər Əliyevin 90 illik yubiley tədbirində Fəxri Xiyabanda ziyarət zamanı son dərəcə müdhiş olay yaşanıb. Deyilənə görə, bank sektorunun nümayəndələri Xiyabanda sabiq prezidentin məzarını ziyarət etmək üçün toplaşıblar. Xeyli keçməsinə baxmayaraq bankçılardan ibarət kalon hərəkət etməyib. Bir müddət sonra məlum olub ki, Cahangir Hacıyev gəlib çıxmadığı üçün Elman Rüstəmov yerindən tərpənmirmiş. C.Hacıyev yarım saatdan sonra gəlib və bundan sonra ziyarət baş tutub. Hadisənin şahidi olan bankirlərdən birinin verdiyi məlumata görə, E.Rüstəmov H.Əliyevin məzarı önündə də “protokolu” gözləyib: ilk olaraq C.Hacıyev baş əyib, sonra E.Rüstəmov..."

***

Elə həmin məqalədə mötəbər mənbəyə istinadən başqa bir məlumata da ötəri toxunmuşduq. İndi isə bilgimizi tam olaraq oxucularla paylaşırıq. Həmin məlumat belə idi ki, Elman Rüstəmovun bir neçə il öncə İpoteka Fonduna (İF) ofis tikmək adı ilə dövlət büdcəsindən 10 milyon manat ayrılmasına nail olub. Mənbə iddia edir ki, İF üçün torpaq almaq və bina tikdirmək adıyla cidi maxinasiyaya əl atılıb. Bu maxinasiyada Odlar Yurdu universitetinin rektoru, YAP-çı deputat Əhməd Vəliyevin və onun kürəkəni, “Muğanbank”ın rəhbəri Elmir Mehdiyevin də adları hallanır. Mənbəmiz bildirir ki, Ə.Vəliyevə məxsus “Jalə” Biznes Mərkəzinin yanındakı bina rəsmi sənədləşmədə İpoteka Fonduna guya 10 milyon manata satıldığı göstərilib. Amma deyilənə görə, İF üçün bina müftə-müsəlləh E.Rüstəmova bağışlanıb. Mənbə bildirir ki, həmin bina “Muğanbank”ın rəhbəri Elmir Mehdiyevin (bu adam Əhməd Vəliyevin kürəkənidir. “Muğanbank”ın əslində Ə.Vəliyevə məxsus olduğu deyilir-red.) əmlakıdır. Yəni qayınatası Əhməd Vəliyev bu binanı kürəkəninə bağışlayıb.
Mənbə daha sonra bildirir: “Bu əməliyyat zamanı dövlət büdcəsindən ayrılan 10 milyon manat sonradan başqa bir özəl bank (həmin bankın adı bizə məlumdur red.) vasitəsilə "yuyulub". Yəni E.Rüstəmov bu məbləği korrupsiya yolu ilə mənimsəyib". Mənbə bildirir ki, dövlətin aidiyyatı qurumları bu faktı araşdırsalar asanlıqla sözügedən korrupsiya faktını aşkarlayıb üzə çıxararlar.
E.Rüstəmovun “Muğanbank” və onun rəhbərləri ilə yaxın münasibətlərinin olduğu haqda indiyədək mətbuatda çox yazılıb. Bu yaxınlığın əsasında çirkli pulların “yuyulması” və transferinin dayandığı deyilir.
Yaxın zamanlarda bu mövzuda silsilə məqalələr dərc etməyi planlaşdırırıq. Hazırda bank sektorundakı mənbələrdən bizə çatan informasiyaları dəqiqləşdirməklə məşğuluq.
Sonda onu da bildirək ki, yuxarıda bəhs etdiyimiz bir sıra məsələlərlə bağlı Mərkəzi Bankın rəhbəri Elman Rüstəmova təxminən 1 ay öncə rəsmi sorğu ilə müraciət etmişdik. Sorğumuza bu günə kimə heç bir cavab verilməyib.