Müxtəlif dövlət qurumlarından arayış almaq mexanizmi sadələşdiriləcək. Rabitə və İnformasiya Texnologiyaları Nazirliyindən virtualaz.org saytına verilən məlumatda deyilir ki, bundan sonra arayışları internet vasitəsilə əldə etmək mümkün olacaq.

Xəbərdə deyilir ki, nazirlik “Vətəndaşa aid fərdi məlumatlar üzrə elektron arayış” sistemini hazırlayıb. Mülkiyyətçi və ya operator ödənişsiz olaraq vətəndaşa onun haqqında məlumatları təqdim edəcək. Portalda vətəndaş haqqında müxtəlif xidmət təminatçıları tərəfindən təqdim edilən fərdi məlumatların bir arayış formasında cəmlənərək ona unikal İD verilməsi nəzərdə tutulub.

Sənədə həmçinin ştrix-kod da əlavə edilir. Arayışın formalaşdırılması zamanı vətəndaş arayışda onun barəsində olan fərdi məlumatların konkret quruma ötürülə biləcəyinə razılıq verir. Vətəndaş arayışı tam, yaxud unikal İD və ştrix-kodu çap edərək aidiyyəti quruma təqdim edə bilər. Arayışın həqiqiliyinin yoxlanması üçün arayış təqdim edilən qurum unikal İD-ni portalda arayışların yoxlanılması elektron xidmətinə daxil olmaqla, müvafiq İD-ni daxil edir. Portal İD nömrəsinə əsasən arayışı arxivdən tələb edənə təqdim edir. Tələb edən arayışı təkrar çap edib doğruluğunu təsdiq edə bilər.

İnformasiya sistemləri olan qurumlar üçün arayışın elektron formada import edilməsi də nəzərdə tutulub. Hələlik bank sektorunda istifadəsi nəzərdən keçirilən yeni sistemin reallaşması kreditlə bağlı əməliyyatların daha sadə və qısa zaman ərzində həyata keçirilməsinə imkan yaradacaq.

Məlumdur ki, daha böyük məbləğdə kredit almaq istəyində olan müştəri bunun üçün müraciət etdiyi banka xeyli sayda arayış təqdim etməlidir. Ayrı-ayrı qurumlardan, əsasən də mənzil-istismar sahələrindən (JEK-lər) müvafiq arayışın əldə edilməsinə də xeyli zaman sərf edilir. Eyni zamanda bank təşkilatlarının səmərəliliyi və rəqabətə davamlılığının artırılmasının kredit, bazar və əməliyyat risklərinin azalması ilə bağlılığını nəzərə alsaq, elektron arayış risk faktorunun azalmasına da yardım edir. Belə ki, elektron arayışda vətəndaşla bağlı bütün məlumatlar mərkəzləşmiş qaydada vahid portal üzərindən həyata keçirildiyindən kreditlə bağlı əməliyyatların yerinə yetirilməsi zamanı banklara saxta sənəd təqdimatı riski də minimallaşmış olur. Beləliklə, vətəndaş sözügedən arayışı istədiyi zaman çap və ya transfer də edə biləcək. Arayışın elektron formada digər qurumlara transferi məqsədilə isə xüsusi servisin hazırlanması nəzərdə tutulur.