«Aqrolizinq» ASC-nin sədri yeni təyinat almış nazirdən niyə ehtiyat edir?

Kənd Təsərrüfatı Nazirliyinin demək olar ki, ən gəlirli strukturlarından olan «Aqrolizinq» ASC-də özünə "sığınacaq” tapmış Əli Bayramov deyəsən, İdarə Heyətinin sədrliyindən getmək qərarına gəlib. Bu barədə nazirlikdaxili kuluarlarda müxtəlif fikirlər səslənir. Bəzi mülahizələrə görə, Əli Bayramov sabiq nazir İsmət Abasovun vəzifədən getməsindən sonra ciddi təlaş keçirməyə başlayıb. Belə ki, uzun illər ölkədə müxtəlif məsul vəzifələr tutmuş təcrübəli maliyyəçi Heydər Əsədovun hələ Hesablama Palatasına rəhbərlik edərkən "Aqrolizinq"in fəaliyyəti ilə bağlı ciddi nöqsanların üzə çıxarılmasında müəyyən rolu olub.
Səhmdar Cəmiyyətin bir sıra rayon şöbələrində yer almış korrupsiya hallarına dair sənədlərin prokurorluq orqanlarında araşdırma aparmağa ciddi əsas verdiyini nəzərə alsaq, Əli Bayramovun vəziyyətinin hansı amillərdən asılı olduğunu yalnız ehtimal edə bilərik. Baxmayaraq ki, Əli Bayramov üçün sabiq nazir İsmət Abasovun baş nazirin müavini vəzifəsinə gətirilməsi göydəndüşmə oldu, lakin "Aqrolizinq"in sədri qəti əmin deyil ki, Heydər Əsədov onun fəaliyyətinin yoxlanması fikrindən vaz keçəcək. Qeyd edək ki, 2005-2012-ci illər ərzində "Aqrolizinq" ASC-nin hesabına dövlət büdcəsindən və digər mənbələrdən 370,63 milyon manat maliyyə vəsaiti daxil olub. Ayrılmış vəsait hesabına həmin illər ərzində müxtəlif markalı 1033 ədəd taxıl biçən kombayn, 4252 ədəd traktor, 164 ədəd ekskavator. 8960 ədəd traktora qoşulan kənd təsərrüfatı texnikaları (kotanlar, kultivatorlar, ot biçən texnika, ot və küləş presləyən, malalar, taxıl səpən, gübrə səpən, çiləyicilər, traktor qoşquları və s.), yüz tonlarla gübrə, müxtəlif dəzgah və avadanlıqlar, həmçinin damazlıq heyvanlar alınaraq fermerlərə güzəştli şərtlərlə satıldığı bildirilir. Səhmdar Cəmiyyət sədrinin maliyyə "raportlarında" həmin vəsaitlə alınmış zəruri texnika və avadanlıqların, həmçinin gübrə və damazlıq heyvanların zəngin statistikası cəlbedicidir.
Balans, necə deyərlər qəpiyə-qəpik düz gəlsə də, Əli Bayramov hansı formada cəmiyyətdə yeyinti və korrupsiyaya yol verildiyi barədə Heydər Əsədovun kifayət qədər məlumatlı olduğunu yaxşı bilir. Bu baxımdan onun cəmiyyət sədrliyindən gedəcəyi artıq heç kəsdə, hətta yaxın himayədarı İsmət Abasovda belə şübhə doğurmur.
Lakin məsələ ondadır ki, Əli Bayramovun aradan sakit gedişlə çıxmaq barədə planlar qurduğu bir vaxtda Səhmdar Cəmiyyətin daxilində onu məyus edə biləcək proseslər baş verir. Belə ki, sədrin ciddi maliyyə pozuntularına rəvac verməsi ilə bağlı yuxarı instansiyalara müraciətlərin sayının son zamanlar xeyli artması müşahidə olunmaqdadır. Nazir qarşısında iddialı və açıq çəkişmələrdən ehtiyat edən "Aqrolizinq" rəhbərinin bir müddət öncə oliqarx qruplaşmalarından birinin vasitəçiliyindən yararlanmaq cəhdlərinin boşa çıxması da onun əndişələrini xeyli artırıb. Odur ki, sədrin keçmişdə buraxdığı "izlər” onun məmur karyerasına çox ciddi xələl gətirə bilər. Məlumata görə, Əli Bayramovun qarşısına işlədiyi dövrlərdə yol verdiyi kobud qanun pozuntuları və maliyyə fırıldaqlarının uzun bir siyahısı qoyulub. Söhbət milyonlarla dollar vəsaitin mənimsənilməsindən və bir neçə kriminal olaydan gedir. Həmin "iş”lərin üstünün açılması Əli Bayramov üçün arzuolunmaz nəticələrə gətirib çıxara bilər. Bunu göz önünə gətirən Səhmdar Cəmiyyət sədri geri çəkilmək məcburiyyəti qarşısında qalıb. Məsələ ilə bağlı onun hazırda öz himayədarları və yaxın tərəfdaşları ilə məsləhətləşmələr apardığı bildirilir. Lakin məsləhətləşmələrin heç də asan olmayacağı gözlənilir.


Fuad