Milli Məclis hakim ailəyə aid biznesi vergidən azad etdi

gundemxeber.az Azərbaycanda yaradılan sənaye və texnologiyalar parklarında fəaliyyət göstərən şirkətlərə vergi tətilləri veriləcək. Vergi Məcəlləsinə edilən əlavəyə əsasən, ölkədə yaradılan sənaye və texnologiya parklarının idarəedici təşkilatı və ya operatorunun mənfəətinin parkın infrastrukturunun tikintisinə və saxlanılmasına yönəldilmiş hissəsi vergidən azad ediləcək. Bundan başqa, parkın rezidenti olan, yəni burada fəaliyyət göstərən hüquqi şəxslərin parkdakı fəaliyyətindən əldə edilən gəlirlər 7 il müddətinə vergiyə cəlb edilməyəcək.
Vergi Məcəlləsinə edilən bu əlavə və dəyişikliklər əslində Ilham Əliyevin şəxsi biznesinə edilən güzəşt kimi dəyərləndirilməlidir. Hər halda Azərbaycanda 17 zavodu özündə birləşdirən Sumqayıt Texnologiyalar Parkı Ilham Əliyevin ailəsinə məxsusdur. Bu fakt tanınmış jurnalist Şahvələd Çobanoğlunun bir müddət əvvəl apardığı araşdırma ilə təsdiqini tapıb. Həmin araşdırmadan bir hissəni təqdim edirik: “Vergilər Nazirliyinin 6 aprel 2012-ci il qeydiyyat məlumatında ”Sumqayıt Texnologiyalar Parkı”nın sahibinin adı da göstərilib: “AZENCO GROUP” Məhdud Məsuliyyətli Cəmiyyəti. AZENCO-nun rəsmi məlumatlarında isə göstərilir ki, onun payının 97,5 faizinin sahibi “Interenerji” şirkətidir. “Interenerci”nin əsas – 70 faizlik payının sahibi isə “Ador” MMC-dir.
“Ador” MMC Bakıda Səməd Vurğun küçəsi 7 ünvanında qeydiyyatdan keçib. Contact.az saytının və “Turan” agentliyinin əməkdaşı iki il öncə həmin ünvanda bir neçə bankın qeydiyyatının izinə düşmüş və müəyyən etmişdi ki, bu ünvanda 3 seçici qeydə alınıb – Mehriban Arif qızı Əliyeva, Leyla Ilham qızı Əliyeva, Arzu Ilham qızı Əliyeva.
Araşdırmaçı jurnalist Xədicə Ismayılova “BAKU CRYSTAL HALL”un sirləri” adlı araşdırmasında “Interenerji” şirkətinin və onun sahibi “ADOR” MMC-nin izini də həmin ünvanda tapır və qeyd edir ki, “Azadlıq” radiosunun 2010-cu ildə apardığı araşdırma zamanı ölkə başçısının sözçüsü Azər Qasımov Silkwaybank-ın səhmlərinin sahibi və S.Vurğun küçəsi 7 ünvanın sakinlərindən birinin – Arzu Əliyevanın Ilham Əliyevin övladı olduğunu təsdiqləmişdi. “ADOR” MMC həm də “Express” bankın təsisçisidir. Bankın illik hesabatlarında da bu şirkətin ünvanı Səməd Vurğun küçəsi 7 olaraq göstərilir.
Bütün bunlardan bəlli olur ki, prezident ailəsinin qeydiyyatda olduğu S.Vurğun küçəsi 7 ünvanında hüquqi qeydiyyatdan keçmiş “ADOR” MMC şirkəti “Interenerji”nin sahibi olduğu üçün, o həm də “Interenerji”nin 70 faiz paya sahib olduğu “AZENCO GROUP” MMC-nin əsas sahibidir. “AZENCO GROUP” MMC isə, Vergilər Nazirliyinin 6 aprel 2012-ci il məlumatına görə, 17 zavodu birləşdirən “Sumqayıt Texnologiyalar Parkı” MMC-nin sahibidir. Deməli, prezident ailəsinin qeydiyyatda olduğu S.Vurğun küçəsi 7 ünvanında qeydiyyatdan keçmiş “ADOR” MMC “Sumqayıt Texnologiyalar Parkı” MMC-nin əsas sahibidir”.
Görünür, biznes sahələrinin əhəmiyyətli hissəsini ələ keçirən, ölkənin sərvətini talayan hakim ailə bununla kifayətlənmək istəmir. Öz bizneslərini də vergidən azad etməklə sərvətlərini daha da artırmağa çalışır.

“İqtisadiyyat şöbəsi”