Abxaziyada büdcə kəsiri və elektrik enerjisi almaq üçün vəsait axtarışı səbəbindən büdcə təşkilatlarının xərclərinin, o cümlədən əmək haqqının ödənilməsinin maliyyələşdirilməsi dayandırılıb.

Gundemxeber.Az xəbər verir ki, məlumatı maliyyə naziri vəzifəsini icra edən Vladimir Delba Prezident vəzifəsinin icraçısı Badro Gunboy ilə müşavirədə açıqlayıb.

O bildirib ki, büdcədə vəsait çatışmazlığı üzündən hüquq-mühafizə orqanlarında əmək haqqını ödəyə bilmirlər. Eyni zamanda qeyd edib ki, bütün büdcə imkanlarını elektrik enerjisinin dəyərini ödəmək üçün səfərbər etsələr, əmək haqlarını ödəyə bilməyəcəklər.

Dulbanın sözlərinə görə, respublikanın Vergilər və Rüsumlar Nazirliyi borcları gücləndirilmiş qaydada yığır, gömrük rüsumlarının hesablanmasında gecikmə yoxdur, lakin bu daxilolmalar dövlətin sosial öhdəliklərini təmin etmək üçün kifayət etməyə bilər.

Bundan əvvəl Abxaziyanın baş naziri vəzifəsini icra edən Valeri Bqanba Abxaziyadakı enerji vəziyyətini fövqəladə vəziyyət adlandırıb. Bqanbanın sözlərinə görə, 2016-cı illə müqayisədə elektrik enerjisi istehlakı 1 milyard kVt/saat artıb ki, bu da kriptovalyuta mayninqinə qarşı səmərəsiz mübarizə ilə bağlıdır.

Qeyd edək ki, Rusiya Abxaziyada öz maraqlarını tam təmin etmək üçün bölgəyə qarşı maliyyə rıçaqlarını sentyabrdan işə salıb. Sentyabrın 1-dən Abxaziyada həkim və müəllimlərə sosial ödənişlərin verilməsini dayandırıb. Daha sonra məlum olub ki, bu addıma səbəb Suxumi tərəfindən yerinə yetirilməmiş bir sıra öhdəliklərdir. Belə ki, maliyyə yardımının bərpası üçün Abxaziyadan iqtisadi məsələlər üzrə məhkəmə və arbitraj qərarlarının tanınması və icrası haqqında ikitərəfli sazişi ratifikasiya etməsi; rusiyalı hüquqi şəxslərin Abxaziyada investisiya layihələri həyata keçirməsinə icazə verən sazişin qüvvəyə minməsini təmin etməsi və kommersiya daşınmaz əmlak bazarında rusiyalı investorlara qoyulan məhdudiyyətləri aradan qaldırması tələb edilib.

Bundan əlavə, payız-qış aylarında elektrik enerjisinin Abxaziyaya kommersiya şərtləri əsasında satılması qərara alınıb, Dövlət Dumasının və Federasiya Şurasının üzvləri abxaz deputatlarla təmasları minimuma endiriblər.

Moskva həmçinin  “Rusiya Federasiyasının maraqlarına və Rusiya-Abxaz münasibətlərinin inkişafına xələl gətirən” Rusiya vətəndaşlığı olan Abxaziya parlamentinin üzvləri və müxalifət liderləri haqqında məlumatların verilməsini tələb edirdi.

Noyabr ayında rusiyalı hüquqi şəxslərin Abxaziyada investisiya layihələri həyata keçirməsinə icazə verən saziş ratifikasiya üçün yerli parlamentə çıxarılanda Abxaziya müxalifətinin təşkilatçılığı ilə xalq etirazları başlandı, Rusiyayönümlü prezident, hökumət hakimiyyətdən kənarlaşdırıldı. Ondan bəri Rusiya payız-qış aylarında bölgəyə verdiyi elektrik enerjisinin dəyərini kommersiya əsasında ödənməsini tələb edir. Daim Rusiyadan dotasiya alan Abxaziyanın büdcə gəlirləri bu ödənişləri təmin etməyə imkan vermir.

Gundemxeber.Az