Lütvəli Babayev Heydər Əsədova meydan oxuyur:
“Hesablama Palatasının yoxlaması barədə heç nə
deyə bilmərəm. Gedin, Palatadan soruşun”

Hesablama Palatasının yoxlamaları zamanı bir çox rayonlarda korrupsiya halları aşkarlanıb. Qurumun hesabatında Zərdab rayonunda kütləvi maliyyə pozuntusunun olduğu qeyd edilib.
Hesabatda bildirilir ki, dövlət büdcəsinin Zardab rayonu üzrə yerli xərclərindən Rayton Təhsil Şöbəsinə və Mərkəzi Rayon Xəstəxanasına ayrılan vəsaitlərin xərclənməsində ciddi nöqsanlar aşkarlanıb: “Təhsil və səhiyyə xərclərinin proqnoz layihələri əmək haqqı və əmək haqqına üstəlik xərc maddələri üzrə müvafiq iqtisadi əsaslandırma aparılmayıb, həmçinin, xərc smetaları üzrə nəzərdə tutulmuş vəsaitlərdən istifadə edilməyib, bir sıra xərc maddələri üzrə icra faizi aşağı olub, təyinatdan kənar vəsait xərc edilib”.
Hesabatda qeyd olunur ki, Rayon Təhsil Şöbəsi üzrə malların satın alınması zamanı satınalma metodu tərtib edilmədən vəsait sərf olunub, satınalmada nəzərdə tutulmayan malların alışına vəsait ayrılıb, tender aparılmadan vəsait xərclənib. Audit dövründə Təhsil şöbəsi üzrə normativdən artıq ştat vahidlərinin və şəbəkədə nəzərdə tutulmayan qrupların saxlanılması, 2011/2012ci il tədris ilində tədris kabineti olmadığı halda kabinə müdirliyinə, əmək haqqı cədvəllərində hesablamalar düzgün aparılmayıb”.
Palata həmçinin, Zərdabın Mərkəzi Xəstəxanasında da ciddi maliyyə pozuntuları aşkarlayıb. Bununla bağlı isə hesabatda qeyd olunur ki, “Ştatda olan işçilərin əmək haqqı” paraqrafında nəzərdə tutulmadığı halda mükafatlar üçün vəsait xərclənib. Bununla yanaşı hər il qış mövsümündə bir neçə nəfər odun doğramaq üçün işə qəbul edilib. Onlara “Ştatda olan işçilərin əmək haqqı” paraqrafından əmək haqqı ödənilib. Həmçinin, tibbi avadanlıqların təmiri aparılarkən qüsur aktı tərtib olunmayaraq, vəsait xərclənib”.
Hesabatda o da vurğulanır ki, səhiyyə müəssisələrində cari və əsaslə təmir işləri ilə bağlı da maliyyə pozuntuları aşkarlanıb. Zərdab Rayon İcra Hakimiyyətinin başçısı Lütfəli Babayev isə bu barədə sualları cavablandırmaqdan imtina edib: “Mən hazırda istirahətdəyəm. Hesablama Palatasının yoxlaması barədə heç nə deyə bilmərəm. Gedin, Palatadan soruşun”. “İcra başçısı kimi rayonun təhsil, səhiyyə sistemindəki korrupsiyanın məsuliyyətini daşıyırsınızmı” sualına L.Babayev telefonun dəstəyini asaraq, cavab verməkdən imtina edib.

Rasim