Kassaların önündə uzun növbələr yaranıb; kəmfürsət sürücülər isə qaz-vurub qazan doldurmağa çalışırlar...
31 dekabr - Dünya Azərbaycanlılarının Həmrəylik Günü və Yeni il bayramı ilə əlaqədar Bakı Beynəlxalq Avtovağzal Kompleksində sərnişin sıxlığı yaşanır. Bayramı rayonda keçirmək üçün buraya üz tutanlar süni qiymət artımından şikayətlənirlər.
Ümumiyyətlə, sərnişindaşımada hər bayram qabağı biletlərin qiymətlərinin artırılması artıq ənənə halını alıb. Mövcud vəziyyətlə daha yaxından tanış olmaq üçün həmin məkana - avtovağzala yollandıq. Kassaların qarşısında uzun növbələr var idi. Hər kəs qabağa düşüb bilet almağa tələsirdi. Kassaların şüşəsində rayonlara olan biletlərin qiymətləri yazılmışdı. Ancaq kassirlərin dediyi qiymət, yazılan qiymətdən xeyli yuxarı idi.
Məsələn, pəncərəyə yapışdırılan qiymət tablosunda Şəkiyə biletin qiyməti 5 manat 60 qəpik qeyd olunmuşdu. Kassir isə bileti 6 manat 20 qəpikdən satırdı. Bu vəziyyətlə barışıb biletini alıb sakitcə kənara çəkilən sərnişin də vardı, buna etiraz edən də.
Gəncəyə getmək üçün bilet aldığını deyən Vahid Ağayev biletin bahalaşmasından şikayətlənənlər sırasında idi: “Dekabrın 31-ə bir təhər bilet tapdım. Yeni ili Gəncədə ailəmlə birgə keçirmək istəyirəm. Bileti baha satdılar. Amma nə edim, almalıyam. Öyrəşmişik hər bayram qabağı qiyməti ceyran belinə qaldırmalarına”.

Qazaxa getmək istəyən Səkinə xala isə satışda bilet olmadığını deyirdi: “Deyirlər biletlərin hamısını satmışıq. Kassir deyir ki, biletləri 10 gün qabaqdan almağa başlayıblar. Guya bayram qabağı əlavə avtobuslar verəcəklər. Əgər əlavə avtobuslar gedəcəksə, onların biletini niyə satmırlar?”

Bir tələbə qız ilə kassirin mübahisə etdiyinin də şahidi olduq. Tələbə biletin qiymətinin əvvəl 6 manat olduğunu və üstündə də 6 manatdan artıq pul olmadığını bildirdi. Kassir isə kobud tərzdə “ay xanım, biletin qiyməti qalxıb, pulunuz yoxdur getməyin” deyirdi.
Buradan ayrılıb avtobusların yola düşdüyü 3-cü mərtəbəyə qalxırıq. İlk öncə tərpənməkdə olan Şəki avtobusuna yaxınlaşırıq. Avtobusun qarşısı bilet ala bilməyən sərnişinlərlə dolu idi. Onlar sürücüyə artıq pul təklif edərək onlara yer verməsini istəyirdilər. Hətta sərnişinlər arasında artıq pul verməyə də razı olanlar var idi. Sürücü isə israrla yeri olmadığını bildirirdi. O, avtobusun salonunu da sərnişinlərlə doldurmuşdu. Sürücü iki oturacaqların ortasına kiçik stullar düzərək sərnişinlərə həmin yerləri satırdı.
Burada yer tapa bilməyən sərnişinlər kiçik “Ford” avtobuslarının dayandığı tərəfə üz tuturdu. Ancaq Yeni ilin gəlməsinə 3-4 gün qalmasına baxmayaraq burada sərnişinlə dolu idi. Avtobus gəlib saxlayan kimi sərnişinlər bir-birini itələyərək avtobusa minməyə çalışırdılar. Bu avtobusları qarşılayıb yola salan dispetçer isə sərnişinlərə bayramla əlaqədar yenə avtobuslar veriləcəyini deyirdi. Bu avtobuslarda da qiymət 6-7 manat arasında dəyişirdi.

Qəbələ avtobusunda isə sərnişinlər həmişə qiymətlərin bayrama 1 gün qalmış artırdıqlarını dedilər. Onlar 6 manata getdiklərini, ancaq həmişə bayrama iki gün qalmış biletin qiymətinin 6 manatdan 7-8 manata qalxmasından narazılıq edirdilər.
Bayramın gəlişindən istifadə edən taksi sürücüləri də sərnişin çoxluğundan istifadə edib qiymətləri qaldırmışdılar. Belə ki, əvvəl “20 yanvar” metrosu yaxınlığından Lənkərana taksi 10 manata gedirdisə , indi bu qiymət 15-20 manat olub. Şəkiyə isə əvvəl 15 manata gedən taksi indi 20 manata gedir. Sürücülərdən qiymətləri niyə artırdıqlarını soruşduqda onlar “ayda-ildə bir dəfə bayram olur, imkan verin bir az da biz pul qazanaq” şəklində cavab verirdilər. Görünür, bayramın gəlişindən ən çox qazanan elə sürücülər olacaq.
Əlavə edək ki, Yeni il bayramı ilə əlaqədar Bakı Avtovağzalı dekabrın 28-dən yanvarın 6-dək gücləndirilmiş iş rejimində çalışacaq. Əhalinin tələbatını ödəmək üçün yeni marşrutlar buraxılacaq və avtobusların sayı artırılacaq. Adi günlərdə xətdə 300-350 avtobus olduğu halda, bayram günlərində onların sayı 650-700-ə çatdırılacaq.