Ramiz Mehdiyev və Əli Həsənov prezident fərmanından sui-istifadə edib

gundemxeber.az Bir neçə gün öncə Prezident Administrasiyası ictimai-siyasi şöbəsinin müdiri Əli Həsənov İlham Əliyevin ən azı 2020-ci ilə qədər Azərbaycan prezidenti kimi qalacağı haqda bəyanatla çıxış etmişdi. 2013-cü il prezident seçkiləri ilə bağlı suallara cavabında Ə.Həsənov İ.Əliyevin qələbəsi barədə inamla danışıb. Bu inam isə “2003-cü ildən bu yana prezidentin etimadı, gözləntiləri, xalqın arzu və istəklərini doğrultması” ilə əsaslandırıb.
“İctimai rəyin öyrənilməsini həyata keçirən müstəqil sorğu mərkəzlərinin araşdırmaları göstərir ki, bu günə kimi Azərbaycanın inkişafı ilə bağlı həyata keçirilən siyasət və sistemli tədbirlər qarşıdan gələn dövrdə də davam etdirilməli, 10 illik perspektivə hesablanmış “Azərbaycan 2020: gələcəyə baxış” İnkişaf Konsepsiyasının reallaşdırılması təmin olunmalıdır. Bu reallıqları nəzərə alaraq birmənalı şəkildə demək olar ki, qarşıdan gələn illərdə də Azərbaycan xalqı Prezident İlham Əliyevin rəhbərliyi ilə yeni zəfərlərə doğru addımlamaqda davam edəcəkdir”-deyə Ə.Həsənov qənaətini ifadə edir.
Xatırladaq ki, İlham Əliyevin 2020-ci ilə qədər prezident olacağını bir qədər əvvəl Ramiz Mehdiyev də demişdi. Amma məsələ ondadır ki, 2020-ci ildə Azərbaycanda növbəti prezident seçkiləri olmayacaq. Bəlkə, Ramiz Mehdiyev və onun müavini ola bilməyən Əli Həsənov 2020-də növbədənkənar seçkilərin olacağından danışırlar. Maraqlıdır, Azərbaycanı növbədənkənar seçkilərə vadar edəcək səbəblər hansılar olacaq? Ramiz Mehdiyevlə Əli Həsənovda bu haqda daha nə kimi məlumatlar var?
Sualların cavabı ölkə rəhbərinin dünən imzaladığı "Azərbaycan 2020: gələcəyə baxış" İnkişaf Konsepsiyasının təsdiq edilməsi haqqında Fərmanındadır. Prezident Fərmanda Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, 2020-ci ilədək dövr üçün ölkənin perspektiv inkişaf hədəf və istiqamətlərini müəyyənləşdirmək və onların gerçəkləşdirilməsini təmin etmək məqsədi ilə qərara alıb ki, "Azərbaycan 2020: gələcəyə baxış" İnkişaf Konsepsiyası təsdiq edilməlidir. Bu Fərmanın 1-ci hissəsində nəzərdə tutulmuş İnkişaf Konsepsiyasının həyata keçirilməsinə ümumi rəhbərlik və nəzarət səlahiyyətləri Azərbaycan Respublikası Prezidentinin Administrasiyasına həvalə edilməlidir.
Hadisələrin təhlilindən belə nəticəyə gəlmək olar ki, PA rəhbəri və onun komandasının sadiq üzvü prezidentin son sərancamından xəbərdar olublar və bəyanatlar məhz bu məqama hesablanıb. Güman ki, bundan sonra PA rəhbərinə yaxın media dövlət başmısının Ramiz Mehdiyevə inamı, gəzən söz-söhbətlərin yanlış olması istiqamətində təbliğata başlayacaq. Amma hər şey akademikin artıq əvvəlki gücdə və imkanda olmadığını təsdiqləyir...

Natiq Hüseynov