“Gülər Əhmədova anama deyirdi ki, Ramiz Mehdiyevlə, kompozitorla danışmışam. Kompozitor deyəndə o, Kəmaləddin Heydərovu nəzərdə tuturdu”[i][/i]

Ayxan Məmmədov: “Mən bu işi belə qoymayacam. Nə Gülərdən qorxuram, nə də Ramiz Mehdiyevdən”

Fəaliyyəti dayandırılmış ABU-nun hazırda Fransada mühacirətdə yaşayan rektoru Elşad Abdullayevin yaydığı məlum videolarda iştirakçılardan biri, dekabrın 26-da İstanbulda müəmmalı şəkildə dünyasını dəyişən Sevinc Babayevanın oğlu Ayxan Məmmədov növbəti dəfə açıqlamalar verib. Bu dəfə o, “xeberle.com” portalına danışıb.
- Ayxan bəy, müsahibələrinizdə demisiniz ki, bu işin axırına çıxacaqsınız. Nəyi nəzərdə tuturusunuz?
- Onu nəzərdə tutmuşam ki, onsuz da Gülər Əhmədovaya heç nəyi sübut etmək olmur. Elşad Abdullayevin əlində olan faktlara, videolara rəğmən Gülər Əhmədovaya heç nəyi sübut etmək olmur. Anamın son səs yazısı, mənim əlimdə olan faktlar da var. Amma ona sübut etmək olmur. Gülər Əhmədova niyə indiyədək həbs olunmur? Niyə ona yalnız ev dustağı kimi müvəqqəti cəza kəsirlər? Bu qədər fakt olan yerdə onu sadəcə istintaqa verirlər. Əslində isə Gülər Əhmədova heç kimdir. Onun arxasında duranlar var. Niyə axı Gülər Əhmədova anamı ora göndərməyinə baxmayaraq bir dəfə də olsun, onunla maraqlanmayıb. Gülər Əhmədova bildirir ki, mən 100 000 verərək ev dustaqlığını aldım. Deyir ki, mənim heç bir pulum yoxdur. Mən hər yerə pul verirəm. Anamı ora göndərməyinə baxmayaraq, heç bir köməklik etməyib. Anam ölməmişdən qabaq onun əri Fikrət Əhmədov ora gedərək anama 650 manat pul verib. İndiyədək o həbs olunmayıb. Mən cavabların dəyişdiriləcəyini də gözləyirəm. Bunlardan hər şey gözləmək olar. Mən bu işin axırına gedəcəm. Bu işi belə qoymayacam.
- Siz bu açıqlamalarınızdan sonra həyatınıza hansısa təhlükə hiss edirsinizmi?
- Həyatıma təhlükə deyəndə ki..., mənim anamdan başqa heç kimim yox idi. Bir quru canımdır, istəyirlər, onu da alsınlar.
- Bəziləri deyir ki, sizi danışdıran hansısa bir qurum var. Məsələn, deyirlər, Milli Təhlükəsizlik Nazirliyi sizdən Ramiz Mehdiyevə qarşı istifadə edir. Bu məsələyə münasibətiniz necədir?
- Nə MTN?! Əsla! Sizə səmimi deyirəm ki, mənim heç bir qurumla əlaqəm yoxdur. Elşad Abdullayevlə də əlaqəm yoxdur. İndi oxuyuram ki, Gülər Əhmədova deyir, guya məni Elşad Abdullayev qorxudub onun əleyhinə müsahibələr verməyə təhrik edir. Amma bu belə deyil. Elşad Abdullayev mənə pul verib?! O, müsahibələrində deyib ki, Sevinc Babayevanın günahı yoxdur. O, pulu alıb aparıb verib Gülər Əhmədovaya ki, çatdırsın Ramiz Mehdiyevə. Pulu onlar yeyiblər. Mənim anam nə edib ki?! Mənim anam neçə ildir, Gülərlə düşmən olub ki, kişinin pulunu niyə yeyirsiniz. İşi alındıra bilmirsinizsə, kişinin pulunu qaytarın getsin.
- Ayxan bəy, ananızla sonuncu dəfə nə barədə danışmışdınız?
- Anam deyirdi ki, Gülərə tez-tez zəng vur, de ki, bura - Türkiyəyə məni necə göndərib, elə də geri qaytarsın. Dəfələrlə onunla danışmışdım. Hətta bir dəfə Gülər Əhmədovanın oğlu telefonu götürərək məni nalayiq söyüşlərlə təhqir etdi. Mən də dedim ki, sən qarışma bu işə.
- Gülər Əhmədova nə deyirdi bu işə?
- Onu bildirirdi ki, Ayxan bir az təmkinli olsa, hər şey yaxşı olacaq. Anama da həmin sözləri deyirdi: hər şey yaxşı olacaq, düzələcək. Sonuncu dəfə Türkiyədə olarkən, xalam da buna şahiddir, bu gün də istintaqda bu barədə ifadə vermişəm, Gülər Əhmədova deyirdi ki, 10-15 günə orda olarsan. Ramiz Mehdiyevlə danışmışam, kompozitorla danışmışam, hər şey yaxşı olacaq. Anamla “Skayp”la danışırdı: Sənə təzə iş verəcəklər. Kompozitor deyəndə Gülər Əhmədova nazir Kəmaləddin Heydərovu nəzərdə tuturdu. Deyirdi ki, Gömrükdə sənə təzə iş verəcəklər. Boş-boş vədlər verirdi. Mən isə anama deyirdim ki, inanma bunlara.
- Ananız rəhmətə gedəndən sonra Gülər Əhmədova sizinlə əlaqə saxlayıbmı?
- Anam rəhmətə gedəndən sonra mən onu yığmamışam.
- Sizinlə özü əlaqə saxlayıbmı?
- O, mənimlə heç bir əlaqə saxlamayıb. O sevinir. O bilirdi ki, mənim anam yeganə şahiddir. Onu da aradan götürdülər. Anam hər şeyi mənə danışırdı.
- Dövlət adamlarından sizinlə əlaqə saxlayan olubmu?
- Mənə Prokurorluq və Türkiyədəki konsulluq tərəfindən anamın cənazəsinin Azərbaycana gətirilməsində köməklik olundu. Hətta anamın ölüsünü belə incitdilər. Anamı morqda çox saxladılar. Neçə nəfər gəldi baxdı. Nəyə lazımdır bu qədər ekspertiza? Onsuz da mən bilirəm ki, ekspertizanın cavabları dəyişdiriləcək. Onsuz mən bunları gözəl bilirəm.
- Ekspertiza Azərbaycanda aparılıb?
- Türkiyədə də aparılıb, Azərbaycanda da. Mən prokurora belə bir sual verdim ki, yaxşı, sizin apardığınız ekspertiza ilə Türkiyədə aparılan ekspertiza üst-üstə düşməsə, necə olacaq? Prokuror tutuldu qaldı, mənim sualıma cavab verə bilmədi. Mən heç kimdən qorxmuram. Nə Gülərdən qorxuram, nə də Ramiz Mehdiyevdən! Mənim anamdan başqa heç kimim yox idi. Mən dekabrın 26-da aeroporta getdim. Aeroporta məni buraxmadılar. Dedilər ki, çıx get evə...
- Ananızın başqa şəxslərlə problemi olmamışdı ki?
- Bildiyimə görə, olmayıb. Onu sizə deyim ki, Gülər Əhmədova fırıldağın biridir. Əlavə edim ki, Türkiyə polisində də bununla bağlı araşdırma aparılır. Anamla Gülər Əhmədova arasında olan söhbəti mən eşitmişəm. “Skayp”da Gülər Əhmədova anamı arxayın edirdi ki, sənə iş verəcəklər gömrükdə.