Beynəlxalq axtarış sistemi Azərbaycan məmurlarını necə ifşa edir?

Vallah,adamın bu vətəni sevməkdən başqa çarəsi yoxdur.Düzdür adını müxalifətçi,müstəqil qoyan bəzi para qəzetlər var ki,ölkəmizin bu günkü dinamik inkişafını,sürətli tərəqqisini gözləri götürməyərək ağızlarına gələn bəzi para sözləri yazaraq düşmən dəyirmanına su tökürlər.Eyni zamanda bizim dünyada analoqu,ataloqu,nə bilim xalaloqu olmayan bu inkişafımıza qəsdən,düşməncəsinə maneçilik törədən daxili və xarici qüvvələr də mövcuddur ki,onlar gecə-gündüz yatmayaraq paxıllıqdan çatlayaraq,partlayaraq bütün vasitələrlə milli dövlətçiliyimizi gözdən salmaq istəyirlər.
Adam oturub bir saat AzTv-yə,Liderə baxanda istəyir ki, sevindiyindən durub özünü yandırsın,körpüdən atsın,lap elə gedib prezident aparatının qabağında minnətdarlıq əlaməti olaraq dizçökmə aksiyası keçirsin.Amma,neyləyəsən ki,lənətullah xarici qüvvələr bu xoşbəxtçiliyi axıra qədər yaşamağa imkan vermirlər.Dünyanın dağılhadağılda olduğu indiki dövrdə xain avropalılar öz texniki imkanlarını işə salaraq bütün ömrünü xalqın inkişafına,tərəqqisinə sərf edən,özü günlərlə ac-susuz qalıb son tikəsini həmvətənləri ilə bölüşən,çox vaxt işə imkansızlıqdan velosipedlə,samakatla işə gedən çox hörmətli məmurlarımız haqqında ağızlarına gələn məlumatları yayımlamaqla öz mənfur niyyətlərini ortaya qoyurlar.Əvvəldən demokratiya aşiqi olan atalarımız öz folklorunda hələ illər öncə belə xain qüvvələr haqqında adamın dədəsinə od vuran zərb-məsəllər yaradaraq deyiblərki,mərdimazar olmasa bağ çəpəri neyləyər.Müasir dillə desəək,mərdimazar olmasa məmur Avropa Şurasını,ABŞ Dövlət Departamentinin illik hesabatlarını,canım sənə desin sosial şəbəkələri,Googlu neyləyər.
Sözümü qəribliyə salmadan qeyd edim ki.bu həzin,vətənpərvərlik ruhunda olan sətirləri yazmağa məni məcbur edən çox mühüm səbəblər vardır.Buna necə dözəsən ki,oturub AzTv-nin xoşbəxtlik,səadət soraqlı verilişlərinə baxandan sonra peşiman olub ya sosial şəbəkələrə,ya da üzdəniraq Googla daxil olasan və bir az əvvəl az qala milli qəhrəman səviyyəsində təsəvvür elədiyin məmurlarımız haqqında qərəzli fikirlərə rast gələsən.İşdən yorğun-arğın gəlib hökumətimizin qətiyyən xəbəri olmadan tam müstəqil,qərəzsiz,vicdanlı olaraq çalışan Tv-lərimizin xəbərlərinə baxıb özünü dünyanın ən bəxtəvər vətəndaşı hesab etdiyin bir vaxtda bu şoğəriblər adamın əməlli başlı çortunu pozurlar.Məsələn,ağız ləzzəti ilə Əmək və Əhalinin Sosial Müdafiəsi Naziri Səlim Müslümovun xalqımız qarşısında göstərdiyi əzmkar fəaliyyət haqqında məlumat alandan sonra istəyirsən ki,bu fədakar xalq oğlunu daha yaxından tanıyıb onu oğul-uşağa misal göstərəsən.Girirsən Googla və sənin şirin xəyalların bir anda zəhərə çevrilir.Başlıqlara baxın:”Səlim Müslümovun Naxçıvanlı genosidi” ,”Səlim Müslümovun müdafiə etdiyi qumarbaz məmur kimdir?”,”Səlim Müslümovun adamlarından yeni maxinasiyalar” və sair.O dəqiqə başa düşürsən ki,qərb kütləvi informasiya vasitələri yenə öz xain əməllərini davam etdirirlər.Yaxud gənc yaşlarından öz ömrünü millətin səadətinə həsr edən Kərəm müəllim Həsənovu yaxından tanımaq istəsən yenə də əlin boşa çıxacaqdır.”Kərəm Həsənov həbs təhlükəsi ilə üz-üzə”,”Kərəm Həsənov Ramiz Mehdiyevin qəzəbinə gəlib”,”Kərəm Həsənov gözümə görünməsin,rədd olsun”,”Kərəm Həsənov qruplaşmasının balıqçılıq sektorundakı maxinasiyaları”.Belə bədbin əhval ruhiyyədən sonra heç olmasa bir ürəkaçan xəbər oxumaq ümidiylə uca millətimizin yollarında az əməyi olmayan Ziya Məmmədov haqqında oxumaq istəsən yenə də əlin boşa çıxar.Görün bu insafsızlar,siyasi səbatsızlar nələr yazırlar:”Ziya Məmmədov Göyçayı özəlləşdirib”,”Ziya Məmmədov Almaniya kəşfiyyatının hədəfində”,”Ziya Məmmədov büdcədən 1,3 milyard qopardı” və sair.Adam bu xəbərləri oxuyandan sonra sabahısı gün hər zaman getdiyi çala-çökək,dağılmış yollardan bir daha keçməyə utanır.İstəyir ki,bu sətirləri yazanları tutub ayı kimi parçalasın.Amma,”ya səbir” deyib bu böhtan xarakyerli yazılar yazanların dövlətçiliyimiz üçün zərərli toxumlar səpdiyini düşünərək Vergilər Nazirimiz Fazil Məmmədovun həyat və yaradıcılığını dərindən araşdırmaq qərarına gəlirsən.Heyif,yenə də düşmən qüvvələrin fitnəsi ilə üzləşmək zorunda qalırsan.”Fazil Məmmədov sahibkarlara qarşı hücuma keçdi”,”Fazil Məmmədovun Şəmkir imperiyası”,”Fazil Məmmədovun qanunsuz əməlləri” kimi başlıqlara rast gələndə bir daha Allaha dönə-dönə şükür edirsən ki,nə yaxşı belə yazıları uşaq-muşaq oxumur.Yoxsa onların vətənpərvərlik ruhunda çırpınan ürəkləri belə təxribatçı şaiələrə dözməzdi.Odur ki,çalışıb belə düşmən dəyirmanına su tökən məlumatları yayanlardan uzaq olmaq lazımdır ki,gələcək nəsillərimiz tam məmurpərvərlik,tfu,çaşdım vətənpərvərlik ruhunda böyüsünlər.Həm də nə qədər belə böyüklərimizə oxşasalar o qədər yaxşıdır.Bəlkə,biz də bir görərik dayna...
NİCAT MAHMUDOV