Büdcədən talan

Nazirlər Kabineti ötən ilin yekunları ilə bağlı açıqladığı illik hesabatında dövlət büdcəsindən mənimsəmə halları ilə bağlı çox maraqlı sayılacaq rəqəm açıqlayıb.Nazirlər Kabinetinin hesabatında göstərilir ki,prokurorluq orqanlarının məktubları və məhkəmə qərarlarına əsasən dövlət büdcəsindən maliyyələşdirilən təşkilatlarda aparılan yoxlamalar nəticəsində 5 milyon 425,9 min manat mənimsəmə halları aşkar olunub və yoxlama materialları aidiyyatı üzrə Azərbaycan Respublikasının Baş Prokurorluğuna göndərilib.
Buradan belə aydın olur ki,ötən il ərzində büdcədən maliyyələşən təşkilatlarımız dövlət pulundan cəmi cümlətani 5 milyon manat çırpışdırıblar.Adamın sevindiyindən atılıb düşməyi,oynamağı gəlir.Sən demə ölkəmizdə korrupsiya halları rus demişkən “poşti-şto” yox imiş.Sadəcə olaraq, düşmən dəyirmanına su tökən qüvvələr,inkişafımızı gözləri götürməyən ünsürlər aranı qarışdırmaq üçün “rüşvət,korrupsiya baş alıb gedir “ deyərək, aranı qarışdırırlarmış.Təkcə hərbi büdcəsi düşmən Ermənistanın dövlət büdcəsindən çox olan bir ölkə üçün 5 milyon manat nədir ki?Buna el arasında “qənfet pulu” deyirlər ki,gərək hörmətli Nazirlər Kabineti bu cüzi məbləği açıqlayıb düşmən dəyirmanına su tökənlərin əlinə düdük verməyəydi.Bu qədər inkişafın,tərəqqinin kölgəsində 5 milyonun lafımı olur,arkadaş? Mənimsəmə halları yüz milyonlarla ölçülmədisə, o nə korrupsiyadır? Yoxsa, indi hansısa məmurlar şeytana uyaraq nəfsini saxlamayıb beşcə milyonu çırpışdırıbsa,bundan ötrü onun təmiz adını ləkələməyə dəyərmi?Hesabatda o da vurğulanıb ki,dövlət büdcəsindən maliyyələşdirilən təşkilatlarda aparılan nəzarət tədbirləri nəticəsində aşkar olunan nöqsanların aradan qaldırılması,artıq ödənilmiş vəsaitlərin təqsirkar tərəfindən bərpa edilməsi və vəzifəli şəxslərin cəzalandırılması məqsədi ilə müvafiq rayon(şəhər) İcra hakimiyyətlərinin başçılarına məktublar göndərilib.Vallah,adam deməyə də utanır,ki,işi-gücü qurub yaratmaq olan zəhmətkeş İcra başçılarımıza belə bir məktub göndərməklə onların əlini işdən soyutmağa dəyərdimi?İndi onlar düşünməzmi ki,necə olur ki,biz çox vaxt abadlıq işlərinə pul çatmayanda maaşımızdan,pensiya kartımızdan qoyub işləri axsatmadığımız halda belə rüşvətxorlar dövlətin ana südü kimi halal 5 milyonunu oğurlayıblar.Amma,sağ olsun prokurorluq orqanlarında çalışan operativ əməkdaşlarımız.Dərhal aşkar olunan 3080,5 min manat artıq ödənişlərin 2666,1 min manatını anındaca büdcəyə qaytarmağa nail olublar.
Amma,işin başqa bir təhlükəli tərəfi də odur ki,bu 5 milyonu büdcəmizdən heç də beş-altı adam çırpışdırmayıb.Hesabatda bildirilir ki,dövlətimizin dünyadakı şəffaf imicinə ləkə vuran bu əməldən ötrü büdcə təşkilatlarında nöqsanlara yol vermiş nə az-nə çox,düz 602 nəfər vəzifəli şəxs Azərbaycan Respublikası İnzibati Xətalar Məcəlləsinə uyğun olaraq 291,6 min manat məbləğində cərimələnib və dövlət büdcəsinə ödənilməsi təmin edilib.Bu onu göstərir ki,vaxtında və ciddi şəkildə işə müdaxilə olunmasaydı inkişaf sürətinə görə çoxdan NASA-nın kosmik gəmilərini geridə qoyan ölkəmizin bu 602 nəfər vətəndaşı tamamilə rüşvətxor və korrupsioner ola bilərdi.Amma,çox-çox sevindirici bir haldır ki,bu 602 nəfərin arasında bir nəfər də olsun iri məmur yoxdur.Hamısı beşinci,onuncu dərəcəli xırda məmurlardır ki,onlar da dövlətçiliyimiz üçün elə də potensial təhlükə mənbəyi deyillər.Şükürlər olsun ki,bizim nazirlərdən,onların müavinlərindən bir nəfər də olsun nəfsinə aldanaraq dövlətin bir qara qəpiyinə belə əl uzatmayıblar.Yoxsa qiymətlərin əl yandırdığı indiki zəmanədə cüzi maaşlarından cərimə verməklə necə dolanardılar?Həm də sağ olsun Prokurorluq və hüquq mühafizə orqanlarımız ki,bu yolunu azmış haramzadalara qarşı böyük humanizm nümayiş etdirərək, onları cərimələməklə kifayətlənib.Yoxsa beş-üç milyon manatdan ötrü kiminsə isti yuvasına su calamaq kimə gərəkdir?
Nazirlər Kabinetinin hesabatından sonra bir daha aydın oldu ki,gərək adam hər deyilən sözə inanmasın.Yoxsa bəzi para qəzetlər ağızlarını Allah yoluna qoyub bizim hörmətli nazirlərimiz,digər iri məmurlarımız haqqında məbləği yüz milyonlarla manat həcmində ölçülən korrupsiya əməllərindən danışırlar.Adamın az qala heyrətdən gözləri bərəlsin.Amma,bu hesabatdan sonra çox bulanıq sular aydınlandı.Məlum oldu ki,602 nəfər xırda məmuru çıxmaqşərtiylə ölkəmizdə bir nəfər də olsun haramxor məmur yoxmuş.Bu sevindirici,ürəkaçan xəbər münasibətilə uca millətimizə bir daha göz aydınlığı verir,canı dildən təbrik edirəm.Daha hamımız rahat nəfəs alaraq arxayın ola bilərik ki,milli sərvətlərimiz olan neftin,qazın satışından ölkəmizə gələn pullar tamamilə etibarlı əllərdədir.Bu sevindirici xəbərdən sonra adam istəyir ki.hər ay aldığı maaşın bir hissəsini elə aparıb məmurlarımıza versin ki,halal əllərdə olduğundan tam əmin olsun.Nə deyirsiniz, “prob” eləyəkmi?
NİCAT MAHMUDOV