“Gündəm Xəbər TV” tərəfindən Azərbaycanda fəaliyyət göstərən iş adamlarının cəmiyyətdə nə qədər tanınması, onların reytinqinin hansı səviyyədə olması ilə bağlı respondentlər arasında sorğu keçirilib. “İlin ən nüfuzlu iş adamı” nominasiyasında sorğuda iştirak edənlərin böyük əksəriyyətinin səs çoxluğu ilə Altes Qrupun prezidenti, tanınmış iş adamı Fərid Əliyev qalib gəlmişdir. Ölkəmizdə uzun illər uğurla fəaliyyət göstərən, bir çox yeniliklərə imza atan, eyni zamanda xeyriyyə əməlləri ilə tanınan iş adamı cəmiyyətdə kifayət qədər nüfuz sahibidir.
Sorğunun nəticələrinə əsasən “İlin ən nüfuzlu iş adamı” seçilən Fərid Əliyev “Gündəm Xəbər TV”-nin xüsusi diplomu ilə təltif olunub. Təltifetmə mərasimi Altes Plazada mətbuat və kütləvi informasiya nümayəndələrinin iştirakı ilə baş tutub. Mərasimi giriş sözü ilə açan “Gündəm Xəbər ”in təsisçisi Şirin Cəfəri bildirdi ki, “ Gündəm Xəbər TV”-nin keçirdiyi sorğunun nəticələri bu günkü reallığı tamamilə əks etdirir. Bir çox iş adamları fəaliyyətlərini cəmiyyətə, mediyaya qapalı tutmaqla diqqətdən kənarda qalmağa üstünlük verirlər. Onların fəaliyyətində yol verdikləri nöqsanlar, qaranlıq məqamlar bir çox hallarda iş adamlarına qarşı ictimiyyət arasında mənfi rəy formalaşmasına səbəb olur. Daha çox şəxsi biznes maraqlarını üstün tutan həmin qrup insanlar hətta qanunsuzluqlardan belə çəkinmirlirlər. Bu isə narazılığa və inamsızlığa şərait yaradır. Lakin, Fərid Əliyevin bütün iş həyatı mediyaya və cəmiyyətə həmişə tam açıq olub. Fərid Əliyevin rəhbərliyi altında həyata keçirilən bir çox iri layihələr ölkəmizin beynəlxalq aləmdə tanınmasında böyük rol oynayıb. Onun sahibkarlığın inkişafında oynadığı əhəmiyyətli rol xüsusilə vurğulanmalıdır. Keçirdiyimiz sorğunun nəticələri bir daha sübut etdi ki, layiqli insanlar həmişə cəmiyyətdə öz qiymətini alır.
Daha sonra “Gündəm Xəbər TV”-nin müxbiri Sərdar Musa çıxış edərək Fərid Əliyevin Azərbaycanın iş həyatındakı mövqeyindən danışdı. Vaxtilə Heydər Əliyevin məsləhəti ilə Azərbaycana gələrək iş həyatına başlayan Fərid Əliyev ölkəmizdə bir çox ilklərə imza ataraq mühüm uğurlar qazanmışdır. Altes Qrup tərəfindən Bakıda inşa olunmuş çoxsaylı binalar artıq paytaxtımızı bütün dünyada tanıdan memarlıq nümunələri sırasına daxil olub. Ötən ilin iyun ayının 14-də açılışı olmuş Altes Plaza və bir sıra başqa binalar bunun bariz nümunəsidir. Gözəllik, unikallıq, komfort, keyfiyyət, prestij Altes Qrupun fəaliyyətinin əsas istiqamətidir. Şirkət bütün fəaliyyəti dövründə tam şəffaf fəaliyyət göstərmiş, həyata keçirdiyi layihələrlə Azərbaycanda özəl sektorun inkişafında mühüm rol oynamışdır. Fərid Əliyev Moskva Dövlət Beynəlxalq Əlaqələr İnstitutunun ilk azərbaycanlı məzunudur və böyük elm ocağının məzunları arasında xüsusi nüfuza malikdir. Hələ tələbəlik illərində müəllimləri F.Əliyevə “biznes sənin canındadır” deyirdilər. Tanınmış iş adamı sonrakı bütün fəaliyyəti ilə müəllimlərinin bu etimadını doğrultmağı bacarıb. Ölkəmiz üçün çətin dönəmlərdə vətənə qayıdan Fərid Əliyev zəngin həyat təcrübəsi, bilik və bacarığı, təşkilatçılıq qabiliyyəti ilə böyük bir şirkətlər qrupunun yaradılmasına nail oldu. Altes Qrup Azərbaycanın biznes mühitinə xüsusi bir nəfəs, yenilikçilik ruhu gətirməyi bacardı. Şirkətin yaranması ilə minlərlə həmvətənlərimiz daimi iş yerləri ilə təmin olunub. Eyni zamanda Altes Qrup Azərbaycanın ən böyük vergi ödəyicilərindən biridir.
Fərid Əliyevin biznes fəaliyyəti onun xeyriyyəçiliyi ilə paralellik təşkil edir. Altes Qrup bir çox uğurlu layihələrin həyata keçirilməsindən sonra uşaq evlərinə, himayəsizlərə yardımlar olunur. Fərid Əliyevin rəhbərliyi altında Altes Qrup ölkəmizdən kənarda, Rusiyada, Qazaxıstanda, Avropanın bir sıra ölkələrində uğurla fəaliyyət göstərən etibarlı biznes tərəfdaşdır. Bütün bu uğur və nailiyyətlər Fərid Əliyevi Azərbaycanda həmişə diqqət mərkəzində saxlayıb. Elə “Gündəm Xəbər TV”-nin keçirdiyi sorğuda respondentlərin böyük əksəriyyətinin Fərid Əliyevin adını çəkməsi də təsadüfi sayılmamalıdır. Bu onu göstərir ki, vətənin inkişafı naminə bilik və bacarığını, istedadını bütün ömrü boyu sərf edən Fərid müəllim cəmiyyətdə öz layiqli qiymətini almağı bacarıb.
Tədbirdə Altes Qrupun prezidenti Fərid Əliyev çıxış edərək göstərilən diqqətə görə mediya nümayəndələrinə, “Gündəm Xəbər” kollektivinə təşəkkür etdi. F.Əliyev bildirdi ki, müstəqil mətbuat həmişə cəmiyyətin aynasıdır və baş verən proseslərin obyektiv işıqlandırılmasında xüsusi rol oynayır. “Gündəm Xəbər TV”-nin keçirdiyi sorğu da vətəndaşlarımızın iş adamlarına verdiyi qiymətin işıqlandırılması baxımından çox əhəmiyyətlidir. Sevinirəm ki, gördüyümüz işlər həmvətənlərimiz tərəfindən layiqincə qiymətləndirilib. Bütün fəaliyyətim dövründə çalışmışam ki, hər şeydən öncə gördüyümüz işlərin ölkəmizə verdiyi fayda daha çox olsun. Bu məqsədlə də ən vacib sahələrdə fəaliyyət göstərərək istəmişəm ki, Azərbaycanın inkişafına öz töhvələrimi verim. Əsas məqsədimiz hansı sahədə olursa olsun, insanların rahatlığını, komfortlu həyat tərzini təmin etməkdir. Həyata keçirdiyimiz bütün layihələrdə əsas hədəfimiz bu olub. Sizin kollektivinizə də iş adamlarına göstərdiyi bu diqqətə görə bir daha minnətdarlığımı bildirirəm.
Mərasimin sonunda Fərid Əliyev “ Gündəm Xəbər TV”-nin təsis etdiyi “İlin ən nüfuzlu iş adamı” fəxri diplomu ilə mükafatlandırılmışdır.
NİCAT MAHMUDOV