Hüquq-mühafizə orqanları baş verənlərə niyə seyriçi mövqe tutur?

Ölkəmizdə bələdiyyə institutu 1999-cu ildən fəaliyyət göstərməsinə baxmayaraq, hələ də tam formalaşmayan, öz funksiyalarını doğru düzgün yerinə yetirməyən bir struktura çevrilib. Azərbaycanda 5 mindən çox bələdiyyə, 80-nə yaxın icra hakimiyyəti var. Lakin, yarandığı gündən bələdiyyələr icra strukturlarından asılı vəziyyətdə fəaliyyət göstərərək, daha çox torpaq alveri ilə məşğul olmaq funksiyasını yerinə yetirib. 1999-cu ildən 2009-cu ilə qədər torpaqlar bilavasitə bələdiyyələrin əli ilə satılırdı. Bu proses isə bələdiyyələrin öz işiylə məşğul olmasından çox makler rolunu oynamasına səbəb olurdu.
Ümumiyyətlə, qeyd etmək lazımdır ki, yaranmasından 15 ildən çox vaxt keçməsinə baxmayaraq, bələdiyyə strukturunun formalaşdırılmasında, hüquqi normativ sənədlərdə kifayət qədər boşluqlar var. İndiyə qədər yerli idarəetmə qurumlarının nə dəqiq torpaq fondu məlumdur, nə də torpaqların sərhəddini müəyyənləşdirən xəritələr mövcuddur. Bu isə bir çox “fərasətli” bələdiyyə sədrlərinə əməlli-başlı bazar açmaq üçün şərait yaradıb. Azərbaycanda bir torpaq sahəsini bir neçə müştəriyə satmaq ənənəsi də elə bələdiyyələrin uğurlu tapıntılarından biridir. Və yaxud təzə satılmış torpaqları əvvəlki illərdə satılmış kimi sənədləşdirib xeyli vəsaiti mənimsəmək də bələdiyyələrin yazılmamış qanunlarındandır. Seçkili orqan olan, yerli idarəetmə funksiyası daşıyan bələdiyyə təşkilatını öz qanunları ilə idarə edən, bu sahədə bir çox “tarixi ilklərə” imza atan sədrlərdən biri də Badamdar bələdiyyəsinin rəhbəri Həbib Əsədovdur. O, idarəetmə sahəsində xüsusi metodlardan istifadə edərək Badamdar ərazisini özü üçün gəlirli bir “toçkaya” çevirib. Bu gün Badamdara qədəm basan hər kəs o dəqiqə hiss edir ki, buranın çox “zəhmətkeş” bir bələdiyyə sədri var. Sürücülər Badamdar yollarındakı çala-çökəkləri saya-saya ətrafa üfunət iyi yayan zibilliklərin əhatəsindən keçdikcə bu ərazinin bələdiyyə təşkilatını “böyük məhəbbətlə” yad edirlər. Vətənin azadlığı uğrunda canından keçən şəhidlərimizin adını daşıyan küçələr baxımsızlıqdan cəngəlliyi xatırladır. Adi sanitariya qaydaları belə təmin olunmur. Kanalizasiya xətlərinin köhnəlməsi, yararsız vəziyyətdə olması səbəbindən küçələr gölməçələrlə doludur. Amma, bütün bunlar Həbib Əsədovu əsla narahat etmir. Çünki, onun alınmaz qalaya çevirdiyi idarə binasına kimsənin gəlməyə və bu problemlər haqqında danışmağa imkanı yoxdur. Ətrafına yaxınlarını ,doğmalarını toplamaqla etibarlı “mühafizə “ sistemi formalaşdıran bələdiyyə sədri üçün Badamdar ərazisi ancaq gəlir gətirən obyektlərdən ibarətdir. Yerdə qalan ərazilər, əhalinin problemləri isə o qədər də əhəmiyyət daşımır. Həbib Əsədovun rəhbərlik etdiyi bələdiyyədə onun ürəyincə olmayan, etibar etmədiyi heç bir kadr işləyə bilməz. Çünki, burada aparılan və az qala dövlət sirri səviyyəsində qorunan qaranlıq əməllərdən, əməliyyatlardan kənar şəxsin xəbərdar olması arzuolunan deyil. Hətta, onun rəhbərlik etdiyi bələdiyyə orqanına müdaxilə etməyə özündən yuxarı səlahiyyət sahiblərinin belə imkanı çatmır.
Sırf ixtisasım Bələdiyyə sahəsinə aid olduğu üçün əmək fəaliyyətimə ərazisində yaşadığım Badamdar bələdiyyəsində başlamaq istədim. Qafqaz Universitetinin Dövlət və Bələdiyyə İdarəetməsi fakultəsinin ilk məzunlarından biriyəm. Bələdiyyə strukturu, bu sahənin hüquqi-normativ sənədləri ilə yaxından tanışam. Odur ki, qazandığım biliklərlə yaşadığım əraziyə daha çox fayda verməyi düşünürdüm. Amma, elə bələdiyyə sədrinə ilk müraciətimdəcə hiss etdim ki, deyəsən Badamdar bələdiyyəsində Azərbaycan qanunları işləmir. Çünki, Həbib Əsədov hər dəfə məni işə götürməmək üçün elə arqumentlərə əl atırdı ki, bunların heç biri reallığa uyğun gəlmirdi. Xeyli get-gələ məruz qalandan sonra Həbib Əsədov maneəsini aşmağın mümkünsüzlüyünü görüb daha yuxarı instansiyalara müraciət etmək qərarına gəldim. Ədliyyə Nazirliyi Bələdiyyələrlə İş Mərkəzinin rəhbəri Mehdi Səlimzadə bələdiyyə strukturlarında ixtisaslı kadrlara daha çox ehtiyac olduğunu bildirərək mənim Badamdar bələdiyyəsində işləməyimin ümumi işin xeyrinə olacağını bildirdi. Onun tövsiyyəsindən sonra Həbib Əsədov könülsüz də olsa, məni bələdiyyədə işlə təmin etməyə məcbur oldu. Amma, elə ilk iş günündən hiss etdim ki, mən Həbib Əsədov üçün bələdiyyədə heç də arzuolunan kadr deyiləm. Çünki, onun formalaşdırdığı idarəetmə üsuluna, komandaya uyğun gəlmirdim. Badamdar bələdiyyəsinin hüquqşünası olmağıma baxmayaraq, mən əsas işlərə yaxın buraxılmırdım. Hüququ pozulan və bu səbəbdən məhkəmə orqanlarına üz tutan vətəndaşların proseslərinə isə məni yaxın buraxmamaq üçün H.Əsədov bütün vasitələrdən istifadə edirdi. Hüquq təhsili olmayan, amma, bələdiyyə sədrinin əməllərini pərdələmək sahəsində “əvəzolunmaz “ kadrlar olan şəxslər şübhəli məhkəmə proseslərində H.Əsədovun “hüquqlarını” qoruyurdular. İştirakçısı olduğum bir neçə prosesdə isə Badamdar bələdiyyəsində hökm sürən ab-havanın necə olması haqqında az-çox məlumat toplaya bildim. Həbib Əsədovun torpaq sahibi olmaq istəyən hər kəsə şərait yaratmasının isə çox maraqlı bir üsulu olduğunun şahidi oldum. Heç kimə “yox” demək istəməyən bələdiyyə sədri xalqın “mənafelərini” nəzərə alaraq eyni ərazini bir neçə şəxsə satmaqdan belə çəkinmədiyi üçün çoxlu şikayətlərlə üzləşirdi. Lakin, öz işinin mahir “ustası” olan H.Əsədov məhkəmələrdə “işləri yoluna qoymağı” çox məharətlə bacarır. Təbii ki, bu işlərdə ona ixtisaslı hüquqşünas lazım olmadığı üçün tezliklə mənimlə vidalaşmağa qərar verildi. 2013-cü ilin fevralından məni Badamdar bələdiyyəsində görmək əzabına qatlaşan Həbib Əsədovun hövsələsi ancaq 8 ay dözdü. 2013-cü ilin sentyabrında bələdiyyənin mənə əmək haqqı verməyə imkanı olmaması kimi absurd səbəblə işdən azad olundum. Mənim bələdiyyədəki fəaliyyətimdən bir “xeyir” görməyən H.Əsədov bunun heyfini işdən azad olunmağımdan çıxmağı bacarıb. Belə ki, 2013-cü ilin sentyabrında işdən azad olunsam da, əmək kitabçasında mənim 2014-cü ilin fevralında işdən çıxarıldığım qeyd olunub. Yəqin ki, Həbib müəlim aradan keçən aylarda mənim adıma yazılan əmək haqlarını Badamdar qəsəbəsinin sosial iqtisadi inkişafına sərf edib. Amma, bu yaxınlarda Lider kanalında efirə gedən bir süjetdən sonra başqa bir ehtimal ortaya çıxdı. Badamdar qəsəbəsindəki acınacaqlı durumu, dözülməz şəraiti işıqlandıran kanalın əməkdaşlarına “benzin pulu” təklif edən Həbib Əsədovun nə qədər çox xərcə düşdüyünü görəndən sonra anladım ki, mənə əmək haqqı verməyə niyə bələdiyyənin imkanı çatmır. Sən demə problemləri işıqlandıran, Badamdarın mövcud ağır durumundan söz açanlar üçün Həbib müəllim zapravka açıbmış, mənim də xəbərim yoxmuş. Öz qanunsuz fəaliyyətini rüşvətlə, “benzin pulu” ilə ört-basdır etməyə çalışan bələdiyyə sədrinin daha bir əməli də beləcə faş olundu. Bütün ölkə çapında prezidentin bilavasitə göstərişi və nəzarəti altında antikorrupsiya əməliyyatları aparıldığı, rüşvətxorluğa qarşı mübarizənin kəskinləşdiyi bir vaxtda Həbib Əsədov kameralar önündə rüşvət təklif etməyə belə cəsarət edir. Görəsən, ona bu arxayınlığı, toxunulmazlığı kim verib? Həbib Əsədovun dövlət siyasətinə, prezidentin göstərişlərinə münasibəti budurmu? Sivil cəmiyyətlərdə belə vəziyyətə düşən vəzifə sahibləri ən yaxşı halda istefa verərək əməllərini etiraf etdiyi halda H.Əsədov hələ də heç nə olmayıbmış kimi Badamdar bələdiyyəsinin əvəzolunmaz sədri kimi fəaliyyətini davam etdirir. Bəs görəsən, hüquq mühafizə orqanları, Korrupsiyaya qarşı Mübarizə İdarəsi hara baxır? Ortalıqda bu boyda fakt olmasına baxmayaraq, Həbib Əsədovu hansı əsasla müdafiə edirlər? Yoxsa antikorrupsiya kompaniyasının, rüşvətxorluğa qarşı mübarizənin bələdiyyə sədrlərinə, konkret olaraq Həbib Əsədova aidiyyatı yoxdur? Bu barədə cavabdeh orqanlar tezliklə öz sözünü deməli, Badamdar bələdiyyəsində açılmış qanunsuz yanacaqdoldurma məntəqəsini qapatmalıdırlar. Əks təqdirdə Həbib Əsədovun benzinkolonkasında baş verə biləcək hər hansı partlayışın tüstüsü çox uzaqlara yayılacaqdır. Bu məsələyə Səbael rayon prokurorluğunun da seyriçi mövqe tutması, heç bir tədbir görməməsi də bir çox suallar ortaya çıxarır. Bəlkə, Həbib Əsədovun belə “zapravkaları” çoxdur, amma biz bilmirik. Mövzunu diqqətimizdə saxlayacağıq.
ELMAN AYDINOĞLU
[color=#FFCCFF][/color]