Təhsil ocaqlarında tələbələri soyan rüşvətxorların həbsdən yaxasını
necə qurtarmasının şok pərdəarxası

Astara, Şirvan və Ağcabədidəki anti-korrupsiya əməliyyatları və
Misir Mərdanovun kadrlarının təmizlənməsi barədə “Gündəm-xəbər” yazır

Bu il fevralın 14-də təhsil naziri Mikayıl Cabbarov bir neçə kollec direktorlarını işdən azad edib. Astara və Şirvanda işdən qovulan kollec direktorlarının əməlləri, yola verdiyi müdhiş yeyintilər, aldıqları rüşvət və işdən çıxarılandan sonrakı aqibətləri haqda sensasion məlumatlar əldə etmişik.
M.Cabbarovun qovduğu üç kollec direktorunun məhz tələbələrin canını boğaza yığması, rüşvəti qəpiyinə qədər alması, heç bir kəsə güzəştə getməməsi nəticədə buna gətirib çıxarıb.
Tədris və imtahan proseslərinin normal gedişini təmin edə bilmədikləri üçün Astara Pedaqoji və Şirvan Dövlət İqtisadiyyat və Humanitar kolleclərinin direktorlarına sonuncu xəbərdarlıqla şiddətli töhmət elan olunub. Ancaq işin qeyri-rəsmi tərəfləri var.
Belə ki, direktorlar tələbələrin Təhsil Nazirliyinin qaynar xəttinə etdiyi davamsız şikayətlərin nəticəsində qovulublar. Onlar hər semestrdə tələbədən pul yığır, onları süründürür, kasıb, yoxsul tanımır, fərq qoymadan hamıdan rüşvət alırdılar. Eyni zamanda diplom almaq üçün də azı 300-400 manatdan xərac toplayırdılar.
Hətta bundan sonra süni kompaniya təşkil olunub. Facebook-da onu müdafiə edən səhifə açılıb, tələbələr adından işə qaytarılması üçün xahişlər olunub, guya tələbələr hətta dəstək aksiyasına cəhd edib. Amma qaynağımız bunun arxasında başqa məqsədlər dayandığını iddia edir. Onun sözlərinə görə, Lənkəranla yanaşı Şirvan və Astaradakı kolleclərin direktorları da həbsdən külli-miqdarda pul verməklə canlarını qurtarıblar.
Təhsil nazirinin müşaviri İlham Pirməmmədovun rəhbərliyi altında hər üç rayona gəlmiş nümayəndə heyəti kolleclərin maliyyə məsələləri və digər işlərini yoxlamaqla məşğul olublar. Mənbə bildirir ki, təhsil ocaqlarında imtahanlar üçün onlardan 200-270 manat pul yığılması öyrənilib.
Hətta kolleclərin direktorlarının müavinlərinin seyflərindən fantastik məbləğdə pul da çıxıb. Həmin pulun haradan və necə yığıldığı araşdırılıb və məlum olub ki, hamısı tələbələrdən alınıb.
Həmçinin, məlumatlara görə, aparılan yoxlamalar zamanı xeyli sayda neqativ hallar və ciddi maliyyə yeyintiləri aşkarlanıb.
Baş Prokurorluq isə Ağcabədi Pedaqoji Kollecinin direktor əvəzi Sahib Hüseynov barəsində Cinayət Məcəlləsinin 308.2 (vəzifə səlahiyyətlərindən sui-istifadə) və 311.1-ci (rüşvət alma) maddələri ilə təqsirləndirilən şəxs qismində cəlb edilərək məhkəmənin qərarı ilə barəsində həbs qətimkan tədbiri seçilib. Amma sadalanan digər kollec rəhbərləri həbs edilməyiblər.
Mənbənin sözlərinə görə, Təhsil Nazirliyinə daxil olan şikayətlər ciddi şəkildə araşdırılır və daxil olan faktlar təsdiqlənirsə, həmin təhsil ocağının rəhbərliyinə qarşı hüquqi müstəvidə təbdirlər görülür. Hər halda son aylar ərzində saxta diplomlarla bağlı məlum qalmaqal və Ağcabədi Pedaqoji Kollecinin direktorunun həbsini qeyd etmək vacibdir.
Mənbə bundan sonra da analoji təftişlərin davam edəcəyinə əminliyini ifadə edir. Bu tədbirlər Təhsil Nazirliyinin xüsusi planı əsasında həyata keçirilir və prosesin bundan sonra da davam edəcəyi şübhəsizdir.
Burada məqsədlərdən biri də keçmiş təhsil naziri Misir Mərdanova yaxın şəxslərin aşkarlanaraq sıradan çıxarılmasıdır. Odur ki, proses yekunlaşana qədər bu qəbildən olan kifayət qədər çox faktlara rast gələcəyik. Çünki nazirlikdə və təhsil ocaqlarında Mərdanovun kadrları təmizlənir.
Təhsil mütəxəssisləri hesab edirlər ki, pedaqoji kolleclər tam orta ümumtəhsil məktəblərin aşağı pillələri üçün kadr hazırlayır. Yəni bu kadrlar ibtidai sinif, rəsm, nəğmə, əmək müəllimləri səviyyəsində I-IV siniflərdə dərs deməlidir. Aparılan araşdırmaların nəticəsi də sübut edir ki, bu kadrların hazırlanma səviyyəsi çox aşağıdır.
Qeyd edək ki, Bakı Dövlət Sosial İqtisadi Kollecində keçirilən antikorrupsiya əməliyyatı zamanı kollecin direktoru Mübariz Mahmudov, onun bacısı oğlu, kollecin qiyabi təhsil şöbəsinin müdiri İlqar Əzizov, həmin şöbənin metodisti Şahin Mirzəhmədov və direktorun sürücüsünə qarşı ittiham irəli sürülüb, barələrində 3 aylıq həbs-qətimkan tədbiri seçilib. Deməli, həbslər və istefalar dalğası böyüyəcək. Nazir isə hər bir şikayətə həssas yanaşmağı tələb edir.
Təhsil sahəsi üzrə ekspertlər qeyd edirlər ki, təhsil naziri bu sektordakı çətinlikləri hesablamadığı üçün vəziyyəti düzəldəcəyini düşünür. Ekspertlərə görə, keçən bir il müddətində yeni nazir orta və ali təhsil sahəsində köklü dəyişiklik edə bilməyib. Həmin korrupsion sistem dəyişmədən qalır. Ali və orta təhsil sistemində korrupsiyanı ləğv etməyin sadə bir yolu var. İlk növbədə təhsil sisteminin özəl əllərə verilməsi gərəkdir.
Özəl sistemdə korrupsiya olmur. Bizdə təhsil sistemində qətiyyən özəl sektor yoxdur. Əsas problemlər bundan qaynaqlanır. Ali məktəblərin özünü maliyyələşdirmək imkanı yaradılmalı, onları azad bir məkana çevirmək lazımdır. Misir Mərdanovun komandası isə tamamilə silinməsə, düzəlməyəcək. İllərdir təhsil sistemini çürüdüb, bataqlığa çevirən keçmiş nazirin yaratdığı bəlalar sağalmır.
Rafiq Qara