Şair Ağa Laçınlının ailəsi Dövlət Torpaq və Xəritəçəkmə Komitəsindən Zakir Qaralova şikayət edib

Şikayətdə bildirilir ki, Qərib Məmmədov mərhum şairin ailəsinin zəbt olunmuş torpaq sahəsi ilə bağlı müraciətlərinə cavab vermir. Ağa Laçınlının ailəsinə məxsus olan, Səbail rayonunun Badamdar qəsəbəsində yerləşən torpaq sahəsi Səbail Rayon İcra Hakimiyyətinin keçmiş başçısı Rüstəm Məmmədovun icra başçısı işlədiyi zaman, 1995-ci ildə anası Biliy Məmmədovanın adına verdiyi sərəncam əsasında zəbt olunub. 2011-ci ildə sabiq icra başçısı və qardaşı Zülfüqar Məmmədov zəbt etdikləri əraziyə daş hasar çəkdiriblər.
2012-ci il sentyabrın 11-də Ağa Laçınlının ailə üzvləri Dövlət Torpaq və Xəritəçəkmə Komitəsinin sədri Qərib Məmmədova müraciət ediblər. Sentyabrın 25-də həmin müraciətə uyğun olaraq Ağa Laçınlının ailəsinə məxsus torpaq sahəsinin döngə nöqtələrinin koordinatlarını peyk vasitəsilə yerində müəyyən edib dəqiq göstərmək üçün Dövlət Torpaq və Xəritəçəkmə Komitəsinin mütəxəssisi Badamdar qəsəbəsinə gəlib. Koordinatların peyk vasitəsilə yerində müəyyən edilməsi prosesində jurnalistlər də iştirak ediblər.
Yerində təftişi zamanı aydınlaşıb ki, sabiq icra başçısının və onun qardaşının çəkdirdiyi daş hasarın 8 metr 50 santimetr hissəsi Ağa Laçınlının ailəsinə məxsus torpaq sahəsinə keçir. Məlum olub ki, 2012-ci ilin sentyabr ayının əvvəllərində, məsələ mediada işıqlandırılandan sonra bu hasarın 2 metrə yaxın hissəsi sökülüb. Hasarın 6 metr yarımdan çox hissəsi isə hələ də Ağa Laçınlının ailəsinə məxsus torpaq sahəsini zəbt etməkdədir. Sentyabrın 25-də jurnalistlərin, hal şahidinin və hüquqşünas Vüqar Tahirzadənin iştirakı ilə yerində akt tərtib olunub. İştirakçılar imzaladıqları aktla mərhum şairin ailəsinə məxsus torpaq sahəsinin zəbtinin davam etdiyini, sabiq icra başçısının çəkdirdiyi daş hasarın hazırda 6,5 metr hissəsinin şairin ailəsinə məxsus torpaq sahəsinə keçdiyini təsdiqləyiblər.
Oktyabrın 5-də Dövlət Torpaq və Xəritəçəkmə Komitəsinin Dövlət Torpaq Kadastrı və Monitorinqi Elm-İstehsalat Mərkəzinin direktoru Nazim İsmayılov və Bakı Regional Kadastr Mərkəzinin rəhbəri Elçin Məhərrəmli sentyabrın 25-də aparılan təftişlə əlaqədar Ağa Laçınlının ailəsinə cavab məktubu göndəriblər. Lakin onlar cavab məktubunda sentyabrın 25-də şairin ailəsinə məxsus torpaq sahəsinin döngə nöqtələrinin koordinatlarının yerində göstərilməsi və aşkar olunmuş qanunsuz zəbt faktını gizlədiblər.
Buna görə də oktyabrın 9-da Ağa Laçınlının ailəsi yenidən Dövlət Torpaq və Xəritəçəkmə Komitəsinin sədri Qərib Məmmədova müraciət edib. Müraciətdə ailənin 11 sentyabr müraciətinə mahiyyəti üzrə cavab verilmədiyi bildirilib, qeyd olunub ki, həmin cavabda komitə mütəxəssisinin sentyabrın 25-də Badamdarda ailəyə məxsus sahənin peyk koordinatlarını göstərdiyi gizlədilib. Bunun qanunvericiliyə zidd olduğu, ailənin müraciətinin hələ də baxılmamış qaldığı Qərib Məmmədovun diqqətinə çatdırılıb və komitə sədrindən müraciətə qanuna müvafiq qaydada cavab verilməsini təmin etmək xahiş olunub. Ancaq bu müraciətə ümumiyyətlə cavab gəlməyib.
Dekabrın 3-də baş prokuror Zakir Qaralova ünvanlanan şikayətdə “Vətəndaşların müraciətlərinə baxılması qaydası haqqında” qanunun icrasının təmin edilməsi xahiş olunub. Şikayətdə vurğulanıb ki, ailənin müraciətinə qanuna müvafiq qaydada cavab verilməsi üçün Dövlət Torpaq və Xəritəçəkmə Komitəsinin sədri Qərib Məmmədova oktyabrın 9-da ərizə göndərilib, amma üstündən 54 sutka keçsə də, ərizəyə cavab verilməyib. Baş prokurora şikayətdə qeyd olunub ki, bu, “Vətəndaşların müraciətlərinə baxılması qaydası haqqında” qanununun kobud surətdə pozulmasıdır.
Ağa Laçınlının ailəsi Zakir Qaralova göndərdiyi şikayətdə ailənin Dövlət Torpaq və Xəritəçəkmə Komitəsinə oktyabrın 9-da etdiyi müraciətə “Vətəndaşların müraciətlərinə baxılması qaydası haqqında” qanunun tələblərinə uyğun cavab verilməsini təmin etmək xahiş olunub.

“Media forum”