Bunu Dövlət Torpaq və Xəritəçəkmə Komitəsinin sədrindən soruşan tapılacaqmı?

gundemxeber.az Azərbaycanda iş o yerə gəlib çatıb ki, vətəndaşların rəsmi müraciətlərinə, o cümlədən digər dövlət və qeyri-hökumət təşkilatlarının sorğularına cavab verməmək bəzi komitə və nazirliklərdə adi hala çevrilib. Belə dövlət idarələrindən biri də Dövlət Torpaq və Xəritəçəkmə Komitəsidir.
Müstəqilliyinin iyirmi bir ilini başa vuran Azərbaycanın demoqrafik xəritəsini hələ də hazırlayıb başa çatdıra bilməyən Komitəyə xeyli vaxtdır ki, Qərib Məmmədov rəhbərlik edir. Komitənin bütün işçiləri onu hərtərəfli öyrənərək at oynatmaqda davam edirlər. Bələdiyyələr yaranandan ötən on üç il müddətində Komitənin işçiləri dövlət torpaqları ilə bələdiyyə mülkiyyətində olan torpaqları elə qarışdırıblar ki, heç Allahın bacısı oğlu da gəlsə ayırd edə bilməz.
Əldə etdiyimiz məlumata görə belə mübahisəli məsələlərdən biri də Masallı rayonunun Qəriblər kəndində baş verib. Komitənin arxivində saxlanılan xəritələrə görə 1998-ci ilin iyulunadək dövlət torpağı kimi göstərilən ərazi bundan sonra əhaliyə verilmiş paybəlli kimi göstərilib. Hələ Komitə tərəfindən vətəndaşlara “Dövlət aktı” da verilib. Əlbəttə ki, Əmlak Məsələləri Dövlət Komitəsinin sədri yerində olsaydı Komitə bu addımı atmağa cürət etməzdi. Amma cənab Kərəm Həsənov sadəcə məktub yazmaqla vəzifəsini bitmiş hesab etdi.
Belə ki, Azərbaycan Respublikası prezidenti cənab İlham Əliyevin 6 iyun 2007-ci il tarixli 586 nömrəli Fərmanından irəli gələn müddəaları yerinə yetirərkən bu və bu kimi digər yerlərdə də torpaq islahatı zamanı baş vermiş qanunsuzluqlar aşkar edildikdən sonra Dövlət Əmlakının İdarə Edilməsi üzrə Dövlət Komitəsinin sədri Kərəm Həsənov 21 noyabr 2007-ci il tarixdə 11/8978 saylı qanunsuzluqların aradan qaldırılması üçün məlumat xarakterli məktubla Baş nazir Artur Rasizadəyə müraciət ünvanlamışdır.
Baş nazir Artur Rəsizadə 5 dekabr 2007-ci il tarixli 14/20-61 saylı qeydiyyatla aidiyyatı şəxslərə (Q.Məmmədov, A.Qaraşov, F.Məmmədov və K.Həsənov) sərəncam göndərmişdir. Həmin sərəncam bu günədək Dövlət Torpaq və Xəritəçəkmə Komitəsi tərəfindən yerinə yetirilməmiş, aidiyyatı üzrə məhz Masallı rayonu Qəriblər kəndində olan dövlət torpağına salınmış 373 kv metr paybəlli kənddən qırağa çıxarılmamışdır.
Komitənin adının hallanmasını istəməyən məsul şəxsi Qərib Məmmədovun həmin sərəncamı yerinə yetirməməsinə belə haqq qazandırır. Onun sözlərinə görə sərəncam düz hazırlanmayıb. Sərəncam Masallı rayon İcra Hakimiyyətinin başçısına ünvanlanmalıydı. Çünki Aqrar İslahatı İcra Hakimiyyəti keçirib. Səhvə də onlar yol verib dövlət torpağını pay torpağı kimi bölüşüblər. Əgər Masallı rayon İcra Hakimiyyəti həmin səhvi düzəldərsə, yəni dövlət torpağından çıxıb başqa yerdə həmin şəxslərə pay torpağı verərsə Qərib Məmmədov həmin bölgünü də məmuniyyətlə qeydə alar və Baş nazirin sərəncamını yerinə yetirmiş olar.
Sözün düzü, çox uzundərə bir əhvalat oldu. Kimin necə başa düşməsindən asılı olmayaraq ortada olan fakt ondan ibarətdir ki, vətəndaş müraciətlərinə məhəl qoymayan Komitə sədri, göründüyü kimi, heç baş nazirin sərəncamına da əhəmiyyət vermir. Arxayındır ki, bunu ondan soruşan olmayacaq.

Rasim