Ağa Laçınlının torpaq sahəsi lə bağlı məsələ daşa dirəyib

Ötən il sentyabrın 26-da Səbail Rayon Məhkəməsində mərhum şair Ağa Laçınlının ailəsinə məxsus torpaq sahəsinin zəbt olunmasından verilən şikayət üzrə çəkişmə başlanmışdı. Oktyabrın 24-də hakim Nurəddin Bağırov Səbail rayonunun Badamdar qəsəbəsində yerləşən həmin torpaq sahəsində ekspertiza keçirilməsi barədə qərar çıxarmışdı. Qərara əsasən, ekspertiza keçiriləndən sonra məhkəmə prosesi davam etdirilməlidir. Hazırda iş nə yerdədir?
Bununla əlaqədar şairin oğlu, “Mediaforum.az” saytının baş redaktoru Azər Qaraçənliyə bildirib ki, hakim Nurəddin Bağırov ekspertizanın aparılmasını Ədliyyə Nazirliyi Məhkəmə Ekspertiza Mərkəzinə həvalə edib: “Qərara görə, ekspertizada Məhkəmə Ekspertiza Mərkəzinin eksperti ilə yanaşı Dövlət Torpaq və Xəritəçəkmə Komitəsinin Bakı şəhər şöbəsinin mütəxəssisi, iddiaçı kimi bizim ailənin və cavabdeh tərəfin – torpağı zəbt etmiş Məmmədovlar ailəsinin nümayəndəsi iştirak etməlidir.
Amma neçə vaxtdır ki, bu ekspertiza məsələsi daşa dirənib. Hakim ekspertizanı 2012-ci il noyabrın 20-nə təyin etmişdi. Həmin gün ekspertizada iştirak etməli olan adamların hamısı Badamdarda, torpaq sahəsi yerləşən ərazidə toplaşdıq. Ancaq bəlli oldu ki, Dövlət Torpaq və Xəritəçəkmə Komitəsinin nümayəndəsi ekspertiza üçün lazımi avadanlığı özü ilə gətirməyib. Həmin avadanlığın olması çox vacib idi, çünki onsuz ekspertiza keçirmək mümkün deyil. Bu səbəbdən noyabrın 20-də ekspertiza baş tutmadı.
Sonra hakim ekspertizanı dekabrın 6-na təyin etdi. Amma həmin gün Dövlət Torpaq və Xəritəçəkmə Komitəsindən bizə bildirdilər ki, komitənin Badamdar üzrə nümayəndəsinin ailəsində hüzr düşüb, gələ bilməyəcək. Komitə nəyə görəsə ekspertizaya başqa bir nümayəndə göndərmədi. Halbuki onların mütəxəssisləri çoxdur. Nəticədə dekabrın 6-na təyin olunan ekspertiza da baş tutmadı.
Bundan sonra hakim dekabrın 18-nə ekspertiza təyin etdi. Yenə həmin gün biz torpaq sahəsinə gəldik. Dövlət Torpaq və Xəritəçəkmə Komitəsindən də mütəxəssislər gəldi. Ədliyyə Nazirliyinin eksperti, həmçinin cavabdeh tərəfin nümayəndəsi də gəldi. Beləcə ekspertizada iştirak etməli olan tərəflərin hamısı toplaşdı. Amma Dövlət Torpaq və Xəritəçəkmə Komitəsinin mütəxəssisləri dedilər ki, indi yağış yağır, yer sürüşkəndir və biz torpaq sahəsinin koordinatını müəyyənləşdirə bilməcəyəyik. Dedilər, avadanlığı avtomobilin baqajından çıxartsaq, üstünə yağış düşəcək və texnika korlanacaq. Biz də dedik ki, bu yağış dünəndən, bu gün səhərdən yağır, əgər yağışda ekspertiza keçirmək olmursa, siz niyə bunu hakimə demirdiniz ki, ekspertizanı başqa vaxta təyin etsin. Bunun xeyri olmadı, onlar dediklərində durdular, nəticədə dekabrın 18-nə təyin olunan ekspertiza da baş tutmadı. Hazırda gözləyirik, hakim ekspertiza üçün hələ ki, yeni vaxt təyin etməyib”.
Azər Qaraçənli qeyd edib ki, məhkəmənin qərar verməsi üçün ekspertiza keçirilməlidir. Baş redaktor Dövlət Torpaq və Xəritəçəkmə Komitəsindən narazı olduqlarını vurğulayıb. Onun sözlərinə görə, komitə özünü çox şübhəli aparır: “Ekspertizanın baş tutmamasının səbəbkarı Dövlət Torpaq və Xəritəçəkmə Komitəsidir. Komitə əvvəldən bu işdə qanunsuzluqlar edib, bizim torpaq sahəsini zəbt edən tərəfin qanunsuz sənədlər əldə etməsində iştirak edib. İndi komitə həmin qanunsuzluğu davam etdirir, müxtəlif yollarla çalışır ki, ekspertiza baş tutmasın”.
Ağa Laçınlının ailəsinə məxsus torpaq sahəsi Səbail Rayon İcra Hakimiyyətinin keçmiş başçısı Rüstəm Məmmədovun icra başçısı işlədiyi zaman, 1995-ci il martın 15-də anası Biliy Məmmədovanın adına verdiyi sərəncam əsasında zəbt olunub. Torpaq sahəsi 2011-ci ildə zəbt edilib. 2012-ci il sentyabrın 5-də rəsmi dövlət qəzeti “Azərbaycan”da bu hadisəni kəskin pisləyən yazı dərc olunub. “Şairə verilən torpaq sahəsini saxta yolla ələ keçirmək istəyirlər” başlıqlı həmin yazıdan sonra məsələ ictimailəşərək başqa KİV-lərdə də geniş işıqlandırılıb. Nəticədə sabiq icra başçısı qanunsuz çəkdirdiyi hasarın 2 metrini sökdürüb. Lakin bu hasarın 6 metr yarımdan çox hissəsi hələ də Ağa Laçınlının ailəsinə məxsus torpaq sahəsini zəbt etməkdədir.
Torpağı zəbt olunmuş ailə hüquqlarının müdafiəsi üçün bir sıra dövlət instansiyalarına, həmçinin məhkəməyə müraciət edib.
Rasim