İş adamının “Texnikabank” və Elman Rüstəmovla ədavətinin əsasında nə dayanırdı?

AMAY Şirkətlər Qrupunun prezidenti Abdulla Abdullayevin həbsi gündəmin əsas mövzularından biri olaraq qalır.
Abdulla Abdullayevin həbsi barədə Baş Prokurorluq məlumat yayıb. Məlumatda deyilir ki, İqtisadiyyat və Sənaye Nazirliyi yanında Sahibkarlığa Kömək Milli Fondundan A.Abdullayevlə bağlı daxil olan material Baş prokuror yanında Korrupsiyaya qarşı Mübarizə Baş İdarəsində araşdırılıb. İlkin araşdırma zamanı toplanan sübutlar əsasında Cinayət Məcəlləsinin 179.3.2 (mənimsəmə və ya israf etmə) və 308.2-ci (vəzifə səlahiyyətlərindən sui-istifadə) maddələri ilə cinayət işi başlanıb. Bu günlərdə Baş Prokurorluq başqa bir iş adamının həbsi barədə məlumat yaymışdı. Söhbət “Meridian Company” MMC-nin təsisçisi Rauf Kərimovdan gedir. 2002-ci ildə yaradılan “Meridian Company” nəqliyyat şirkətidir və Rauf Kərimov da “Qaradağ Sement” ASC-nin əsas nəqliyyat partnyorlarından olub. Həmin vaxt “Qaradağ-Sement” Cəlal Əliyevin patronajlığı altında fəaliyyət göstərib. Deməli, Rauf Kərimovun da Cəlal Əliyevlə hansısa bağlılığı olub. Abdulla Abdullayev də Cəlal Əliyevin yaxın adamlarından biri olub.
Lakin Abdulla Abdullayevin bir iş adamı olaraq çöküşü indidən başlamayıb. İş adamının yaxın qohumları 2010-cu ildə həbs edilmişdilər. Məhz o zaman “Texnikabank” ilə bağlı qalmaqala görə iş adamının yeznəsi və bacısı uşaqları həbsə atılmışdılar. 2010-cu ildən başlayan təzyiqlər cəmi 1 ildən sonra səngidi. Abdulla Abdullayevin qohumları azadlığa çıxdı. O zaman məlum oldu ki, iş adamının yaxın qohumları “Texnikbank”a 1 milyon manat həcmində kredit borcu olduqlarına görə həbsə atılıblar. Hətta A.Abdullayev mətbuata verdiyi açıqlamalarında bildirirdi ki, onun həbsini kimlərsə sifariş edib. Lakin iş adamının qohumları həbsdən çıxar-çıxmaz “Texnikabank”ın başı üzərində qara buludlar dolaşmağa başladı. Bankda təmizləmə aparıldı. Bankın rəhbərliyində həbslər oldu. Və yerli media yazdı ki, bu iş adamı Abdulla Abdullayevin qüdrətidir. O zaman “Texnikabank”da baş verənlərlə bağlı olaraq dolaşan informasiyalar arasında ən çox üzərində dayanılan Türkiyə prezidentinin Bakı səfəri ilə bağlı idi. Türkiyə prezidenti ilə Gürcüstanın o zamankı prezidenti Mixail Saakaşvilinin təkidləri nəticəsində bu bankda “təmizləmə” əməliyyatlarının aparıldığı barədə informasiyalar dolaşırdı. Məlumatlarda qeyd edilirdi ki, bank rəhbərliyi hansısa regional gizli maliyyə əməliyyatında iştirak edib. Nəticədə bankın rəhbərliyi həbsə atılıb. Lakin bankın rəhbərliyi ilə bağlı olaraq ortada olan kifayət qədər ilginc informasiyalar da yayılmışdı. Məlumatlara görə, bundan sonra Abdulla Abdullayev mövqelərini bir qədər möhkəmləndirə bilib. Lakin onun özünün də himayəsində olan “Birlik bank”ın iflasa uğruması və hətta Mərkəzi Bank tərəfindən lisenziyasının ləğv olunması məsələsi ortaya çıxmışdı. Abdullayev də məhz bu banka görə bir neçə gün öncə həbsə alınıb.
Qohumları 2010-cu ildə həbsə alınan iş adamı mətbuata müsahibələrində deyirdi ki, ondan Bakının Xətai rayonunda inşa etdirdiyi “AMAY” Ticarət Mərkəzini istəyirlər. Hətta iş adamı Mərkəzi Bankın rəhbəri Elman Rüstəmovun adını gizlicə çəkir və ticarət mərkəzinin binasını ondan məhz baş bankirin istədiyini deyirdi. Lakin bir müddət ortalıq sakitləşdi. Abdulla Abdullayev Nərimanov rayonu ərazisində inşa etdirdiyi yeni yaşayış binasının zirzəmisindəki ofisinə çəkilib işə başladı. Bir müddət bu iş adamını orada asanlıqla tapmaq olurdu. Lakin 2013-cü ilin ortalarından sonra Abdulla Abdullayev ümumiyyətlə Azərbaycanı tərk etdi.
Dünən daxil olan informasiyalardan da aydın olurdu ki, “Amay Abdulla” uzun zamandan bəri Bakıda deyilmiş. O, daha çox Çindəki obyektlərinin fəaliyyəti ilə məşul olur, buradakı işlərini isə adamları idarə edirmiş. Bakıya qayıdış səbəbi isə adamlarının verdiyi xəbər olub. Belə ki, adamları hakimiyyətlə danışıqların nəticə verdiyini və artıq həbs təhlükəsinin olmadığını bildiriblər. Ondan istənilən obyektlərlə bağlı qiymət razılaşması da əldə edilib. Lakin Abdulla Abdulayev Bakıya qayıtdıqdan sonra Qaradağdakı zavodla bağlı qiymətlə razılaşmadığını bildirib, yenidən köhnə qiymətə yaxın bir pul tələb edib. Hakimiyyət də oyun şərtlərini pozan Abdulla Abdullayevi belə cəzalandırıb.
Əsas məsələ isə ondadır ki, Abdulla Abdullayevin milyon dollarlarla ölçülən külli miqdarda borcu var və bu borc sadəcə öz adına deyil. O, ətrafındakı iş adamlarının adına müxtəlif banklardan və investisiya qurumlarından milyon dollarlarla kreditlər çəkib. Bu gün evini, bağını, bütün varidatını Abdulla Abdullayevə güvənərək, girov qoyan iş adamları var. Bu səbəbdən də Abdulla Abdullayevin həbsdən çıxa bilməməsi onların da sonunu gətirə bilər. Yəni, ya Abdulla Abdullayev oyunu qaydasına görə, oynayacaq, ya da hakimiyyətlə anlaşmaya getməyərək, bu iqtidarın sayəsində qazandıqlarının üstünə yatacaq. O zaman bəlkə 5-10 ildən sonra azadlğa çıxa biləcək, lakin o zaman çərçivəsində ona güvənən iş adamlarından çoxu həyatda olmayacaq.
İş adamının həbsi ilə bağlı olaraq ortada olan əsas məqamlardan biri də, onun həbs edilməsi ilə Ərdoğanın Bakıya səfəri tarixləri arasında eynilikdir. Bu paralelliyin təsadüf və ya gerçək faktlarla bağlı olduğuna dair də araşdırma apardıq. Məlum oldu ki, əslində iş adamının həbs edilməsi ilə Ərdoğanın səfəri arasında mühim bir əlaqə var. Məlumatlara görə, İran İslam Respublikası ilə sıx əlaqələri olan Abdulla Abdullayevin bir müddət sonra Azərbaycanda daha böyük bir biznes qurmaq imkanları da olub. İnformasiyalara görə, iş adamı bütün hallarda İranla əlaqələrini bir qədər də yüksəltmək və Bakıda böyük bir biznes qurmaq istəyib. Lakin onun əsas iş ortaqlarından birinin Türkiyədə rüşvət əməliyyatları zamanı həbs edilmiş Sədərək Gömrük Məntəqəsinin rəhbəri Mirməhəmməd Seyidovun olması da diqqətdən yayınmayıb. İnformasiyalara görə, Türkiyə üzərindən Azərbaycanla İran arasında mühim biznes əlaqələrinin qurulmasında Abdulla Abdullayevə Mirməhəmməd Seyidov yaxından köməklik edib. Məlumatlarda həmçinin deyilir ki, iş adamının ortada olan ən iri projelərindən biri də məhz gizli valyuta əməliyyatları ilə bağlı olub. Bu isə Türkiyənin regional maraqları ilə toqquşmaya gətirib çıxara bilibmiş.
İnformasiyalardan belə aydın olur ki, Abdulla Abdullayevin həbs edilməsi prossesinə uzun müddətdən bəri hazırlıq görülürmüş. Sadəcə olaraq onun Bakıya qayıtması üçün zəmin hazırlanıb. Bildirilir ki, bütün bunlarla bağlı olaraq ortada olan informasiyalar iş adamının elə öz yaxın ətrafı tərəfindən ölkəyə qayıtması üçün zəmin hazırlanıb.
ELDAR