İş adamının Çindəki biznesi və zindana aparan yol heç də hamar olmayıb, fəaliyyəti əslində həbsini gecikdirib ki, tələsdirməyib: “İndi elədiklərinin cəzasını çəkir”
AMAY Abdullanın həbsi günlərdir müzakirə olunur. Mətbuatın gündəmini zəbt edən bu hadisənin əslində niyə baş verməsinə isə aydınlıq gətirilmir. Vaxtilə müxalifəti vuran əl kimi istifadə olunan və iqtidara kölə kimi qulluq edən Abdulla Abdullayevi zindana aparan yol heç də hamar olmayıb. Onun fəaliyyəti və davranışları əslində həbsini gecikdirib ki, tələsdirməyib.
AMAY Abdulla çoxdan həbs edilməli idi. Onun gördüyü işlər elə vəziyyət yaradıb ki, həbsindən sonra bir nəfər belə onu müdafiə etmir. Deməli, bayırda olarkən nə iqtidar, nə müxalifət, nə də mediada dost qazana bilib.
Ona görə də bu gün həbsdə olan sahibkarın həbsinə sərt reaksiyalar yoxdur, ona qahmar çıxan tapılmır. Necə deyərlər, vaxtında gərək mərhəmətli olasan. Mərhəmət hissindən uzaq və gücə boyun əyənlərin gec-tez aqibəti belə olur.
O da sirr deyil ki, AMAY Abdulla mənimsəmələrə yol verib. Mötəbər qaynaqlardan daxil olan məlumatlarda qeyd olunur ki, AMAY Abdulla doğurdan da əməllərinin cəzasını çəkir. İndi dəmir barmaqlıqlar arasında AMAY Abdullanı uzun müddətli sınaq gözləyir.
Mənbənin sözlərinə görə, son vaxtlar mətbuat konfransları təşkil edərək iqtidarın bəzi güc sahiblərinə qarşı meydan oxuyan AMAY Abdullanın həbsinə çoxdan hazırlıq gedirdi.
Ortada olan faktlardan biri də odur ki, Abdullanın İranla olan münasibətləri və bu münasibətlərə görə ona cinayət işinin başlanacağı gözlənilən idi. Yaxın günlərdə Abdulla Abdullayevin İranın hansı maliyyə təşkilatları ilə əməkdaşlıq etdiyini, onların adlarını və hansı təşkilatdan Azərbaycana daxil olan nə qədər vəsait aldığı rəsmən açıqlana bilər.
A.Abdullayev isə bu dövr ərzində ittihamlarının coğrafiyasını genişləndirdi. Başqa kommersiya və rəsmi dövlət orqanlarını da özünün “qara siyahısına” əlavə etdi. Onun ittiham etdiyi qurumlar və şəxslər də boş dayanmadılar - A.M.A.Y. prezidentini öz “silahı” ilə vurmağa qərar verdilər və məsələ böyüyərək siyasi mahiyyət aldı.
Bu haqda çox yazıldığından, danışıldığından təkrara ehtiyac görmürük. Sadəcə olaraq ortaya yeni məsələlər çıxdığından təkrar bu mövzuya müraciət etməli olduq.
Belə ki, mətbuatda A.Abdullayevin fırıldaqlarının qurbanı olmuş bir qrup şəxsin şikayəti dərc olunmuşdu. 300 nəfər vətəndaş 2002-2003-cü illərdə Atatürk prospektində 30/78 (A) yaşayış binasının tikilməsi üçün A.M.A.Y. şirkətinə məxsus olan "Xudafərin" MMC-yə 12.000.000 (on iki milyon) ABŞ dollarından artıq pul ödəmişdilər. Bununla əlaqədar bağlanmış müqaviləyə əsasən, 2006-cı ilin fevral-mart aylarında bina istifadəyə verilməli idi. Lakin bu günə kimi bina istifadəyə verilməyib. Dəfələrlə dövlət strukturlarına müraciət edilsə də problemin həlli istiqamətində heç bir tədbir görülməyib. Bu azmış kimi, şikayətçilər A.M.A.Y.-ın qoçuları tərəfindən təqiblərə məruz qalmışdılar.
Ötən illər ərzində firma tikinti işlərinin aparılması bəhanəsi ilə sakinlərdən 500 min dollardan çox əlavə vəsait toplayıb. Yüzlərlə digər vətəndaşların aldadılması yolu ilə mənimsədiyi pulların hesabına Abdulla Abdullayev Çində özünün biznesini qurub.
Göründüyü kimi, o, heç də müsbət əməllərin sahibi olmayıb. Onun həbsi də qaranlıq əməllərini gün işığına çıxardı. Məlum oldu ki, hakimiyyətin düşməni olan bu sahibkar heç xalqın da dostu deyilmiş. Ona görə də onun niyə vurulması və cəzalandırılmasında çox da mübhəmlər axtarmağa gərək yoxdur.
Bu günlərdə Baş Prokurorluq başqa bir iş adamının həbsi barədə məlumat yaymışdı. Söhbət “Meridian Company” MMC-nin təsisçisi Rauf Kərimovdan gedir. 2002-ci ildə yaradılan “Meridian Company” nəqliyyat şirkətidir və Rauf Kərimov da “Qaradağ Sement” ASC-nin əsas nəqliyyat partnyorlarından olub.
Həmin vaxt “Qaradağ-Sement” Abdulla Abdullayevlə yaxın əlaqələri olub. Əsas məsələ isə ondadır ki, Abdulla Abdullayevin milyon dollarlarla ölçülən külli miqdarda borcu var və bu borc sadəcə öz adına deyil. O, ətrafındakı iş adamlarının adına müxtəlif banklardan və investisiya qurumlarından milyon dollarlarla kreditlər çəkib.
Bu gün evini, bağını, bütün varidatını Abdulla Abdullayevə güvənərək, girov qoyan iş adamları var. Bu səbəbdən də Abdulla Abdullayevin həbsdən çıxa bilməməsi onların da sonunu gətirə bilər. Yəni, ya Abdulla Abdullayev oyunu qaydasına görə, oynayacaq, ya da hakimiyyətlə anlaşmaya getməyərək, bu iqtidarın sayəsində qazandıqlarının üstünə yatacaq. O zaman bəlkə 5-10 ildən sonra azadlığa çıxa biləcək, lakin o zaman çərçivəsində ona güvənən iş adamlarından çoxu həyatda olmayacaq.
Qeyd edək ki, A.M.A.Y. Şirkətlər Qrupunun prezidenti Abdulla Abdullayev evində həbs edilib. Baş Prokurorluqdan verilən məlumatda deyilir ki, İqtisadiyyat və Sənaye Nazirliyi yanında Sahibkarlığa Kömək Milli Fondundan A.Abdullayevlə bağlı daxil olan material Baş prokuror yanında Korrupsiyaya qarşı Mübarizə Baş İdarəsində araşdırılıb.
İlkin araşdırma zamanı toplanan sübutlar əsasında Cinayət Məcəlləsinin 179.3.2 (mənimsəmə və ya israf etmə) və 308.2-ci (vəzifə səlahiyyətlərindən sui-istifadə) maddələri ilə cinayət işi başlanıb.
RAFİQ