Daha bir oliqarxlaşmış klanın sonu yaxınlaşır...

Anar Məmmədovun adının nurçu qalmaqalında çıxması, ABŞ-dakı çıxışı və müfəttişlərin qudurğanlığı nazirin işini bitirdi; “Transgeyt” şirkəti qovularaq sərnişindaşınma Abutalıbova verildi, qiymətlər bahalaşdı
Aprelin 14-də nəqliyyat naziri Ziya Məmmədova misli görünməmiş zərbə vurulub. Nazirin tərki-silah edilərək, zəiflədilib. Nazirin əlindən ana sütun olan sərnişindaşınma alınıb. Z.Məmmədovun müfəttişləri ilə başlayan kampaniyanın nəticəsi kimi səlahiyyətləri əlindən alındı. Nazirin “qələmi qırılıb” və bütün imkanları məhdudlaşıb.
Mənbə deyir ki, hakimiyyət Z.Məmmədovun imkanlarının güclənməsini görür. Bu da onun əl-qolunun daha geniş açılmasına şərait yaradır. Nazirə effektiv zərbə kimi sərnişin daşınmanın alınması qərarı verilib.

Köhnə qvardiya yola salınır

Qaynağımız deyir ki, hakimiyyət daxilində “köhnə qvardiya”ya məxsus bir sıra şəxslərin vurulması və vəzifəsindən yola salınması qərara alınıb. Hazırda bu istiqamətdə görüləcək işlərə hazırlıq gedir. Buna görə də vurulması nəzərdə tutulan iri ranqlı məmurlara və onların yaxın ətrafına güclü nəzarət var. Yola salınması nəzərdə tutulan yüksək vəzifəli şəxslərdən biri də nəqliyyat naziri Ziya Məmmədovdur. Etibarlı mənbələrdən daxil olan məlumata görə, Ziya Məmmədovun vurulması ilə bağlı son zamanlar baş vermiş 2 mühüm hadisə onun bu postdan alınmasını sürətləndirə bilər.
Birinci məlumat onunla bağlıdır ki, Ziya Məmmədovun rəhbərlik etdiyi nəqliyyat sektorunda olan çox saylı şikayətlər, qanun pozuntuları və ayrılan vəsaitlərin təyinatdan kənar xərclənməsi ilə bağlı məlumatlar artmaqda və geniş şəkildə ictimailəşməsidir.
Nəqliyyat nazirinin vurulmasına səbəb olan digər hadisə nə qədər qəribə olsa da, ABŞ-da onun oğlunun hərəkətləri nəticəsində baş verib. Belə ki, hərəkətləri hakimiyyət tərəfindən ciddi şəkildə nəzarət olunan, amma bu nəzarətdən xəbərsiz olan nazir oğlu Anar Məmmədov ABŞ- da keçirdiyi görüşlərdə, yüksək səviyyəli ziyafətlərdə və tədbirlərdə Azərbaycan hakimiyyətini və dövlət başçısını deyil, konkret olaraq atasını təbliğ edib.

Nurçu davası və...

Digər üçüncü faktor - Anar Məmmədovun nurçuların nəzarətində olan qeyri-hökumət təşkilatlarına maliyyə dəstəyi verməsi barədə xəbərdən gedir. Bu kifayət qədər ciddi ittihamdır. Anar Məmmədov faktiki olaraq nurçularla işbirliyində ittiham olunur.
Nurçular isə Türkiyənin baş naziri Rəcəb Tayyip Ərdoğanla Fətullah Gülənin toqquşmasından sonra Azərbaycanda hədəfə gəlib.
Əldə etdiyimiz məlumatlara görə, Ziya Məmmədovun vurulması ilə bağlı hakimiyyət daxilində onun əleyhinə kompramat və faktların toplanması prosesi sürətlə davam etdirilir. Bu əməliyyat “köhnə qvardiya”ya daxil olan bəzi digər yüksək səviyyəli məmurlara da qarşı aparılır.
Mənbə deyir ki, Cavid Qurbanovla əlaqələri yaxşı olmayan nazirin başına gətirilən bu müsibət çox ağır zərbədir. Cavid Qurbanov hakimiyyətin ən yüksək eşelonu ilə danışıqlara gedib, nazirlik postu uğrunda mübarizəyə girişib. Bütün bu prosesin başında Qurbanovun dayandığı iddia olunur. Nazir olduqdan sonra isə tamamilə başqa səlahiyyətlərə malik olacaq Azəryolservis ASC sədri qabağındakı maneəni aşmağa can atır.

Cavid Qurbanovun sevinci

Nəqliyyat naziri Ziya Məmmədovla “Azəryolservis” ASC-nin sədri Cavid Qurbanovun münasibətlərinin gərgin olduğu və ikili arasında bir ildən artıqdır ki, soyuq savaşın getməsi artıq çoxdan mətbutın mövzusuna çevrilib. Savaşın başlamasına əsas səbəblərdən biri isə Ziya Məmmədovun qardaşlarını “Azəryolservis” ASC-nin gəlirlərinə şərik etməsi olub.
Daha doğrusu, Ziya Məmmədovun qardaşlarının Cavid Qurbanovla heç bir məsələdə anlaşmaq istəməmələri nəticəsində Ziya Məmmədovla Cavid Qurbanov arasında münasibətləri normal axarından çıxarıb. Hakimiyyət içində daxili çəkişmələrin bitmədiyi hər kəsə aydındır. Doğrudur, bu kimi faktlar hər zaman təkzib olunub. Amma fakt budur ki, çəkişmələr dərinləşib. Heç kimə sirr deyil ki, Məmmədovlar ailəsi ölkənin ən varlı ailələrindən biri hesab olunur və məlum deyil ki, vətən qarşısında hansı xidmətlərinə görə bu ailə ölkə iqtisadiyyatının ən gəlirli sahələrindən birinin istimarını həyata keçirir?

Məmmədovların milyardları...

Nəqliyyat Nazirliyinin illik dövriyyəsini hətta Maliyyə Nazirliyində belə bilmirlər. Bunu ona görə iddia edirik ki, heç bir dövlət orqanının hesabatlarında Ziya Məmmədovun imperiyasının statistik rəqəmləri yoxdur.
Təsadüfi deyil ki, hakim komandanın güclü simalarından biri olan nazir ölkə nəqliyyatını özünün holdinqi kimi idarə edir. Nəqliyyat Nazirliyi artıq uzun illərdir ki, özündə iri şirkətləri birləşdirən və milyardlarla manatlıq layihələri həyata keçirən gəlirli sahəyə çevrilir və bu sahənin gəliri ildən-ilə artır.
Ölkənin hər yerində quru üzərində hərəkət edən, sərnişin, yük daşıyan nəqliyyat vasitələri Ziya Məmmədovun nəzarətində, ya da tabeçiliyində olan nəqliyyat vasitələri ilə həyata keçirilir. Ona görə də asanlıqla demək olar ki, Nəqliyyat Nazirliyi bir ailə şirkətidir.
Ziya Məmmədov havadan Cahangir Əsgərova, dənizdən Aydın Bəşirova, yer altında isə Tağı Əhmədova hücumlar etdi. Məqsəd bu nəqliyyat vasitələrini ələ keçirmək idi. Lakin qarşısındakılar özü qədər güclü olduğuna görə Ziya Məmmədov tezliklə anladı ki, rəqibləri ilə mübarizədə sadəcə uduzur.

Bahalaşma və gözlənilən hadisələr

Ona görə də nazir bütün marağını quru nəqliyyatı üzərində cəmlədi. Hacıbala Abutalıbova qarşı başlatdığı savaşda Ziya Məmmmədov tam qələbə qazandı. Bakının bütün yerüstü nəqliyyatına nəzarəti ələ keçirən Zİya Məmmədov tez bir zamanda bütün marşrutları öz əlində topladı. Bunun üçün o, bütün ailəsini səfərbər etdi. Amma bu gün klanı sıradan çıxarılır.
Daxil olan məlumatda isə deyilir ki, Nazirlər Kabinetinin qərarından sonra avtobuslarda gediş haqlarının artırılması məsələsi də gündəmə gəlib. Qeyd olunur ki, bir həftə ərzində bununla bağlı təkliflər Tarif Şurasına təqdim olunacaq.
Mənbənin bildirdiyinə görə, qiymətlər marşrutların yaxın və uzaq məsafələrə hərəkət trayektoriyasına görə müəyyən ediləcək. Şəhərdaxili gediş haqları 20 qəpikdən 30 qəpiyə, Bakı kəndlərinə isə 50 qəpiyə qaldırılacaq.
Ümumiyyətlə, bu ilin mart ayında nəqliyyat sektorunda yükdaşıma tarifləri 0,2 faiz ucuzlaşıb, sərnişindaşıma tarifləri isə 0,3 faiz bahalaşıb. Bu ilin mart ayında nəqliyyat sektorunda yükdaşıma tarifləri 0,2 faiz ucuzlaşıb, sərnişindaşıma tarifləri isə 0,3 faiz bahalaşıb.
Dövlət Statistika Komitəsindən verilən məlumata görə, ay ərzində hava nəqliyyatında sərnişindaşıma tariflərində MDB ölkələri və digər xarici ölkələr üzrə müvafiq olaraq 0,4 və 1,9 faiz bahalaşma müşahidə olunub. Mart ayında MDB ölkələrinə dəniz nəqliyyatında yükdaşıma tarifləri 1,5 faiz ucuzlaşıb, dəmir yolu nəqliyyatında isə sərnişindaşıma tarifləri 1,8 faiz bahalaşıb.
Boru kəməri vasitəsilə neftin nəql olunma tarifi ay ərzində 0,3 faiz ucuzlaşıb. Avtomobil nəqliyyatında sərnişindaşıma və yükdaşıma tarifləri üzrə heç bir dəyişiklik müşahidə olunmayıb.
İndiyə qədər paytaxtda sərnişin daşınması xidmətini Nəqliyyat Nazirliyi təşkil edirdi. Paytaxtda sərnişin daşınması nəqliyyat naziri Ziya Məmmədova məxsus “Transqeyt” şirkətinin monopoliyasında idi.

Abutalıbovun qisası

Məlumat üçün deyək ki, Nazirlər Kabineti Bakı Şəhər İcra Hakimiyyətinin tabeliyində “BakuBus” Məhdud Məsuliyyətli Cəmiyyətinin yaradılması haqqında qərar verib. Qərarın tam mətni Nazirlər Kabinetinin rəsmi saytında yerləşdirilib.
Qərarda deyilir ki, MMC Bakı şəhərində sərnişinlərə avtobus nəqliyyatı sahəsində beynəlxalq standartlara uyğun xidmətin təşkili, bu sahənin müasir tipli nəqliyyat vasitələri ilə təchiz edilməsi, sərnişindaşımaların yerinə yetirilməsi zamanı texniki və ekoloji baxımdan təhlükəsizliyin təmin olunması məqsədi ilə yaradılır. Qərarda aşağıdakılar nəzərdə tutulub:
1. Bakı Şəhər İcra Hakimiyyətinin tabeliyində özünümaliyyələşdirmə prinsipi əsasında fəaliyyət göstərən payları dövlətə məxsus “BakuBus” Məhdud Məsuliyyətli Cəmiyyəti (bundan sonra - Cəmiyyət) yaradılsın.
2. Cəmiyyətin nizamnamə kapitalının formalaşdırılması, ilkin mərhələdə fəaliyyətinin təşkili və Cəmiyyət tərəfindən sərnişin daşınması üzrə avtobusların alınması məqsədi ilə həmin Cəmiyyətə Azərbaycan Respublikasının 2014-cü ilin dövlət büdcəsində nəzərdə tutulmuş Ehtiyat Fondundan 30,0 (otuz) milyon manat məbləğində vəsait ayrılsın.
3. Azərbaycan Respublikasının Maliyyə Nazirliyi bu qərarın 2-ci hissəsi ilə ayrılmış vəsaitin maliyyələşdirilməsini təmin etsin.
4. Azərbaycan Respublikasının Nəqliyyat Nazirliyi Bakı Şəhər İcra Hakimiyyəti ilə birlikdə Cəmiyyətə məxsus avtobusların marşrutlarını və hərəkət qrafiklərini müəyyən etsin.
Qərarda Bakı Şəhər İcra Hakimiyyətinə tapşırılır:
5.1. qanunvericilikdə nəzərdə tutulmuş qaydada Cəmiyyətin nizamnaməsinin təsdiq edilməsini, dövlət qeydiyyatına alınmasını və icra orqanlarının yaradılmasını təmin etsin;
5.2. Azərbaycan Respublikasının Əmlak Məsələləri Dövlət Komitəsi ilə birlikdə ən azı 200 ədəd iritutumlu avtobusun saxlanması məqsədi ilə avtonəqliyyat parkları (qarajları) üçün yerin ayrılmasını 1 ay müddətində təşkil etsin.
Qərar imzalandığı gündən qüvvəyə minir. İndiyə qədər paytaxtda sərnişin daşınması xidmətini Nəqliyyat Nazirliyi təşkil edirdi. Paytaxtda sərnişin daşınması nəqliyyat naziri Ziya Məmmədova məxsus “Transqeyt” şirkətinin monopoliyasında idi. Nazirlər Kabinetinin sözügedən qərarı ilə sərnişin daşınma xidməti meriyanın nəzarətinə keçdi.
Rafiq QARA