Nəqliyyat nazirinin “qələmi niyə qırıldı”?

Azərbaycan iqtidarının ən iri oliqarxlarından biri, nəqliyyat naziri artıq yolun sonuna gəlib deyəsən. İllərdir ki, haqqında xeyli yazılar yazılan Ziya Məmmədov bu günə qədər sükutu pozmadan dayanıb. Hətta nazir bu günə qədər xatırlanmayacaq qədər mətbuatla problemlər yaşayıb. Ziya Məmmədov mətbuatla münasibətlərdə ən dözümlü nazirlərdən biri hesab edilir. Lakin onun “zəif yeri” də var. Nəqliyyat naziri adətən oğlu ilə bağlı yazılara həssaslıqla yanaşır. Anar Məmmədov haqqında bu günə qədər yazılan demək olar ki, bütün yazılarda mətbuatla çəkişmə yaşanıb. Və mətbuat məhkəmə çəkişmələrindən yayınmaq üçün Anar Məmmədov haqqında demək olar ki, susub. Və ya nazirin oğlu haqda yazılan məqalələrlə bağlı olaraq demək olar ki, həssaslıq nümayiş etdirib. Lakin Ziya Məmmədovu oğlu ilə hədəfə çevirmək istəyənlər artıq sanki məhkəmə çəkişmələrindən belə qorxmurlar ki, fəaliyyətə başlayıblar. Məsələ burasındadır ki, nazir təkcə oğlu ilə hədəfə çıxmayıb. Dövlət başçısının sərnişindaşınma ilə bağlı verdiyi sərəncamla oliqarx-nazirin böyük bir səlahiyyəti əlindən alınıb. Bunun ardından isə ABŞ-ın himayəsində olan “Azadlıq” radiosunda nazirin ən yaxın biznes ortaqlarından biri olan “Bağlan Qrup”un prezidenti Hafiz Məmmədov haqqında silsilə tənqidi məqalələr yazılıb. Hətta bəzi reytinq şirkətlərində belə Hafkanın biznesinin nifuzunun düşdüyü söylənilib. İş adamının biznesi ilə bağlı müzakirələr açılmasa da, onun nüfuzunun aşağı salınması istiqamətində əməllicə kampaniyaya start verilib. Və bütün bu kompleks piarın da əsas hədəfi nəqliyyat naziridir. Ara-sıra qardaşı, millət vəkili Elton Məmmədov Ziya Məmmədovu müdafiə etməyə çalışır. Və daha çox qardaşı oğlu Anar Məmmədovu müdafiə edir. Lakin bu müdafiə aparılan kampaniyanın qarşısında o qədər kiçik görünür ki, heç bir effekt vermir.
Bizə çatan çox ilginc məlumatlara görə, nəqliyyat nazirinin bundan sonra daha çox səlahiyyətləri əlindən alınacaq. Hətta nazirin rəqibləri onun yollarda yük maşınlarına nəzarət edən Nəqliyyat Müfəttişliyinin ləğv edilməsi məsələsini belə ən yüksək dairələrdə qaldıra biliblər. Z.Məmmədovun yol polisləri ilə münasibətlərində çox ciddi problemlərin olduğu hər kəsə bəllidir. Bu baxımdan da yollarda kütləvi narazılıqların yaranması, Bakıda taksi xidməti ilə əlaqədar olaraq nazirliyin qoçularının etdiyi hərəkətlərdən dolayı ən yüksək dairələrdə etirazlar yaşanır. Məsələ burasındadır ki, bununla bağlı olaraq artıq məsələ dövlət başçısı səviyyəsində müzakirə edilib.
Daxil olan informasiyalara əsasən, Ziya Məmmədovun maraqlarının müdafiə edilməsi üçün hələlik heç bir hərəkətlənmə yoxdur. Əslində nəqliyyat nazirini dayandığı dözümlülük nöqtəsindən çıxararaq bir müstəviyə çəkmək və onu hədəfə almaq istəyirlər. Hələliksə, aprarılan anti-Ziya Məmmədov kampaniyasının nə nəticələr verəcəyi bəlli deyil. Hətta onun ən yaxın adamını, köməkçisini belə Azərbaycanda artıq hədəfə çevrilmiş nurçularla əlaqələndirmələri belə vəziyyəti dəyişməyib. Yəni Ziya Məmmədov səbrlə susur. Onu sıradan çıxarmaq isə hakimiyyət daxilində böyük milyonlar uğrunda mübarizə aparan şəxs və ya şəxslərin marağındadır. Hər halda nəqliyyat nazirinin yolun sonuna çatdığını yavaş-yavaş iddia etmək olar…
RÜFƏT